ភ្នំពេញ ៖ ជនសង្ស័យ ២នាក់ (ជាគូស្នេហ៍) ក្នុងចំណោមបក្ខពួក ៣នាក់ ត្រូវបានសមត្ថកិច្ចជំនាញនៃអធិការដ្ឋាននគរ បាលខណ្ឌសែនសុខ ធ្វើការស្រាវជ្រាវ ឃាត់ខ្លួនបាន នៅព្រឹកថ្ងៃទី២៥ ខែកក្កដា ឆ្នាំ២០២២ បន្ទាប់ពីក្រុមជនសង្ស័យ បានធ្វើសកម្មភាពឆក់ទូរស័ព្ទទំនើប ១គ្រឿង ពីនារីម្នាក់ បានសម្រេច រួចនាំគ្នាទៅសម្ងំដេករួមរ័កនៅក្នុងផ្ទះសំណាក់។
តាមប្រភពពីសមត្ថកិច្ច បានឱ្យដឹងថា មុនពេលកើតហេតុ កាលពីល្ងាចថ្ងៃទី២១ ខែកក្កដា ឆ្នាំ២០២២ ជនសង្ស័យចំនួន ៣នាក់ ក្នុងនោះមាន២នាក់ គឺជាគូស្នេហ៍ បានធ្វើសកម្មភាពឆក់ទូរស័ព្ទពីនារីម្នាក់ ដែលកំពុងធ្វើដំណើរនៅតាមបណ្តោយផ្លូវ៥៩៨ សង្កាត់ភ្នំពេញថ្មី ខណ្ឌសែនសុខ បានសម្រេច បន្ទាប់មក បានព្យាយាមរត់គេចខ្លួនបាត់។
ប្រភពដដែល បន្តថា ក្រោយកើតមានករណីខាងលើ សមត្ថកិច្ចនៃអធិការដ្ឋាននគរបាលខណ្ឌសែនសុខ ដឹកនាំដោយលោកវរសេនីយ៍ឯក ហួរ ម៉េងវាង អធិការនគរបាលខណ្ឌ បានស្រាវជ្រាវ រហូតឈានដល់ការឃាត់ខ្លួនជនសង្ស័យបាន នៅព្រឹកថ្ងៃទី២៥ ខែកក្កដា ឆ្នាំ២០២២ នៅចំណុចផ្ទះសំណាក់ មួយកន្លែង ស្តិតក្នុងភូមិដំណាក់ សង្កាត់គោកឃ្លាង ខណ្ឌសែនសុខ ដោយដកហូតបានម៉ូតូ ១គ្រឿង ជាមធ្យោបាយធ្វើសកម្មភាព និងទូរស័ព្ទជនរងគ្រោះ ចំនួន ១គ្រឿង។
ចំពោះបក្ខពួកម្នាក់ទៀតដែលកំពុងរត់គេចខ្លួន សមត្ថកិច្ចកំពុងស្រាវជ្រាវ ដើម្បីតាមឃាត់ខ្លួន យកមកអនុវត្តតាមនីតិវិធី៕