ខេត្តស្វាយរៀង ៖ កម្លាំងសមត្ថកិច្ចអធិការដ្ឋាននគរបាលស្រុករមាសហែក កាលពីវេលាម៉ោង១ និង៣០នាទីរសៀល ថ្ងៃទី២៧ ខែកក្កដា ឆ្នាំ២០២២ បានចាប់ឃាត់ខ្លួនជនសង្ស័យម្នាក់ នៅចំណុចភូមិត្រស់ ឃុំត្រស់ ស្រុករមាសហែក ដែលជនសង្ស័យរូបនេះជាប់ពាក់ព័ន្ធទៅនឹង ករណីលួចម៉ូតូកាលពី៣ថ្ងៃមុន នៅចំណុចភូមិត្រពាំងពពេល ឃុំអំពិល ស្រុករមាសហែក។
ជនសង្ស័យដែលត្រូវបានសមត្ថកិច្ចចាប់ឃាត់ខ្លួន មានឈ្មោះម៉ា តុលា អាយុ១៦ឆ្នាំ មុខរបរមិនពិតប្រាកដ រស់នៅភូមិត្រស់ ឃុំត្រស់ ស្រុករមាសហែក។ ចំណែកវត្ថុតាងដកហូត ម៉ូតូ១គ្រឿង ម៉ាកហុងដាស្កុបពី ពណ៌ស ពាក់ស្លាកលេខ ភ្នំពេញ 1BB-6066 លេខតួ និងលេខម៉ាស៊ីន 26C 131558 (ជារបស់ជនរងគ្រោះ)។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ កាលពីវេលាម៉ោង២ និង១០នាទីរសៀល ថ្ងៃទី២៥ ខែកក្កដា ឆ្នាំ២០២២ នៅចំណុច ភូមិត្រពាំងពពេល ឃុំអំពិល ស្រុករមាសហែក មានករណីកាច់កម៉ូតូ១បានកើតឡើង ដោយជនសង្ស័យបានធ្វើសកម្មភាពលួចកាច់ក ម៉ូតូរបស់ជនរងគ្រោះ១គ្រឿង ម៉ាកហុងដាស្កុបពី ពណ៌ស ពាក់ស្លាកលេខ ភ្នំពេញ 1BB-6066 រួចគេចខ្លួនបាត់ដោយសុវត្ថិភាព។
ក្រោយពីទទួលបានពាក្យបណ្តឹងពីជនរងគ្រោះ សមត្ថកិច្ចជំនាញ បានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យខាងលើ នាំយកមកសាកសួរ។
ជនសង្ស័យខាងលើ ត្រូវបានសមត្ថកិច្ចឃាត់ខ្លួនបញ្ជូនបន្តទៅអយ្យការអមសាលាដំបូងខេត្តស្វាយរៀង ដើម្បីចាត់ការបន្តតាមច្បាប់៕