ភ្នំពេញ ៖ ជនសង្ស័យម្នាក់ បានធ្វើសកម្មភាពលួចទូរស័ព្ទដៃ ១គ្រឿង របស់បុរសជាជាងសំណង់ម្នាក់ កំពុងសាងសង់ ចេតិយនៅក្នុងវត្ត តែត្រូវជនរងគ្រោះជាម្ចាស់ទូរស័ព្ទប្រទះឃើញ ស្រែកឆោឡោ ដេញចាប់ពេញវត្ត រួចយកទៅប្រគល់ ឱ្យសមត្ថកិច្ច នាំយកទៅសាកសួរ។
ករណីនេះ បានកើតឡើង កាលពីវេលាម៉ោង ៩ព្រឹក ថ្ងៃទី២៨ ខែកក្កដា ឆ្នាំ២០២២ នៅការដ្ឋានសំណង់ចេតិយមួយកន្លែង ស្ថិតនៅក្នុងបរិវេណវត្តអរុណវតី ភូមិត្រពាំងអណ្តូង សង្កាត់ត្រពាំងក្រសាំង ខណ្ឌពោធិ៍សែនជ័យ។
តាមប្រភពព័ត៌មានពីកន្លែងកើតហេតុ បានឱ្យដឹងថា ជនសង្ស័យ ពុំត្រូវបានស្គាល់អត្តសញ្ញាណឡើយ នៅពេលសាកសួរ ជននេះនិយាយហាក់ដូចជាមានសតិមិនគ្រប់ ។ ដោយឡែកទូរស័ព្ទដែលលួច ពុំបានសម្រេចនោះ ជាកម្មសិទ្ធិរបស់បុរសម្នាក់ ឈ្មោះទួន សុវណ្ណ អាយុ៣៩ឆ្នាំ មានមុខរបរជាងសំណង់ មានលំនៅ ភូមិអក្សរ សង្កាត់ត្រពាំងក្រសាំង ខណ្ឌពោធិ៍សែនជ័យ។
ប្រភពដដែល បន្តថា មុនពេលកើតហេតុ ខណៈដែលជាងសំណង់កំពុងកាត់ដែក ដើម្បីសាងសង់ចេតិយ ហើយបានទុកទូរស័ព្ទនៅក្បែរខ្លួន ស្រាប់តែជនសង្ស័យ ដើរទៅជិត រួចធ្វើសកម្មលួចយកបាន ហើយព្យាយាមដើរចេញ គេចខ្លួនដែរ ប៉ុន្តែភ្លាមៗនោះ ជាងសំណង់បានក្រឡេកឃើញទាន់ ក៏ស្រែកឆោឡោ បង្កឱ្យមានការភ្ញាក់ផ្អើល និងឃាត់ខ្លួនបាន រួចបានប្រគល់ជូនទៅឱ្យនគរបាលប៉ុស្តិ៍ត្រពាំងក្រសាំង ដើម្បីនាំទៅសាកសួរ។
ខណៈពេលដែលសមត្ថកិច្ចធ្វើការសាកសួរ ជនសង្ស័យនិយាយហាក់ដូចជាមានសតិមិនគ្រប់ ឬបែកថ្នាំ ពុំអាចយកជាការបានឡើយ សូម្បីតែឈ្មោះខ្លួនឯង ក៏ពុំស្គាល់ផង។ នៅពេលឃើញស្ថានភាពបែបនេះ បុរសជាជាងសំណង់ ពុំបានដាក់ពាក្យប្តឹងទេ ដោយសុំយកតែទូរស័ព្ទរបស់ គាត់វិញតែប៉ុណ្ណោះ។ បន្ទាប់មក នគរបាននាំយកជននេះទៅកាន់ប៉ុស្តិ៍ ធ្វើការអប់រំ រួចដោះលែងវិញ៕