ភ្នំពេញ ៖ ជនសង្ស័យចំនួន ២នាក់ បានធ្វើសកម្មភាពឆក់ទូរស័ព្ទដៃ ពីនារីម្នាក់ បានសម្រេច ប៉ុន្តែរត់គេចមិនរួច ដោយសារត្រូវកម្លាំងសមត្ថកិច្ចប្រដេញចាប់ឃាត់ខ្លួនបាន នាំយកទៅចាត់ការតាមច្បាប់។
ករណីឆក់ទូរស័ព្ទនេះ បានកើតឡើង កាលពីវេលាម៉ោង ២និង៣០នាទីរសៀល ថ្ងៃទី២៨ ខែកក្កដា ឆ្នាំ២០២២ នៅតាមបណ្តោយផ្លូវ OCIC ក្រុមទី៨ ភូមិដើមគ សង្កាត់ជ្រោយចង្វា ខណ្ឌជ្រោយចង្វា។
ជនរងគ្រោះមានឈ្មោះយ៉ោក រឺណា ភេទស្រី មុខរបរនៅផ្ទះ ស្នាក់នៅបន្ទប់ជួលគ្មានលេខ ផ្លូវលំ ភូមិកៀនឃ្លាំង សង្កាត់ជ្រោយចង្វា ខណ្ឌជ្រោយចង្វា។ ចំណែកទូរស័ព្ទដែលជនសង្ស័យឆក់យកទៅ ម៉ាក VIVO ពណ៌ខ្មៅ។ ចំណែកជនសង្ស័យទាំង២នាក់ ដែលត្រូវសមត្ថកិច្ចចាប់ ឃាត់ខ្លួន ទី១-ឈ្មោះអន វិសាល ភេទប្រុស អាយុ២០ឆ្នាំ មុខរបរបុគ្គលិករត់តុ ស្នាក់នៅផ្ទះគ្មានលេខ ផ្លូវបេតុង ភូមិ១៥ សង្កាត់ស្រះចក ខណ្ឌដូនពេញ (មានផ្ទុកសារធាតុញៀន) និងទី២-ឈ្មោះហេង ស៊ីថន ភេទប្រុស អាយុ២១ឆ្នាំ មុខរបរបុគ្គលិករត់តុ ស្នាក់នៅផ្ទះគ្មានលេខ ផ្លូវព្រះស៊ីសុវត្ថិ សង្កាត់ដូនពេញ ខណ្ឌដូនពេញ (មានផ្ទុកសារធាតុញៀន)។ សម្ភារៈដកហូត ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ស៊េរី ឆ្នាំ២០១៨ ពាក់ស្លាកលេខ ភ្នំពេញ 1HG-5395 (ជារបស់ជនសង្ស័យឈ្មោះអន វិសាល)។
ជនសង្ស័យខាងលើ ត្រូវបានឃាត់ខ្លួននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿង បញ្ជូនទៅសាលាដំបូងរាជធានីភ្នំពេញ ចាត់ការបន្តតាមនីតិវិធី៕