ភ្នំពេញ ៖ មនុស្សប្រុសស្រី ១ក្រុម ក្រោយពីជួបជុំផឹកស៊ីនៅក្នុងហាងកាហ្វេរបស់កីឡាករបាល់ទាត់ល្បីឈ្មោះមួយរូប ស្រវឹងធ្លាក់ភ្នែក មានម្នាក់បានចេញទៅឈរលេងនៅលើផ្លូវខាងមុខហាង ស្រាប់តែរំពេចនោះ មានម៉ូតូ ១គ្រឿង ជិះមកកៀរ ធ្វើឱ្យបុរសនោះខឹង ក៏ដកកាំភ្លើងបាញ់ ១គ្រាប់ បង្កឱ្យមានការភ្ញាក់ផ្អើលដល់ប្រជាពលរដ្ឋ រាយការណ៍ប្រាប់សមត្ថកិច្ច ចុះមកអន្តរាគមន៍ភ្លាមៗ។
ហេតុការណ៍ផ្ទុះអាវុធនេះ បានកើតឡើង កាលពីវេលាម៉ោង ១០និង៣០នាទីយប់ ថ្ងៃទី៣១ ខែកក្កដា ឆ្នាំ២០២២ នៅតាមបណ្តោយផ្លូវវត្តទួល ស្ថិតក្នុងហាងកាហ្វេ យីហោ KSS COFEE សង្កាត់ឫស្សីកែវ ខណ្ឌឫស្សីកែវ។
តាមប្រភពពីប្រជាពលរដ្ឋ បានឱ្យដឹងថា ហាងកាហ្វេកើតហេតុនោះ គឺជាហាងកាហ្វេរបស់កីឡាករបាល់ទាត់ល្បីឈ្មោះម្នាក់ (សុំមិនបង្ហាញអត្តសញ្ញាណ) ហើយមុនពេលមានការភ្ញាក់ផ្អើល នៅក្នុងហាងកាហ្វេខាងលើ គឺមានការជួបជុំផឹកស៊ីសប្បាយក្អាកក្អាយ។ ខណៈ ពេលកំពុងតែផឹកស៊ីសប្បាយស្រវឹង ក៏មានបុរសម្នាក់ក្នុងចំណោមគ្នីគ្នាទាំងអស់ បានចេញមកឈរនៅក្រៅ ហើយក៏មានម៉ូតូ ១គ្រឿង មិនចាំម៉ាក ជិះលឿនឆ្លងកាត់ផ្លូវនោះ មកកៀរ ជាហេតុធ្វើឱ្យបុរសរូបនេះខឹង ក៏ដកកាំភ្លើងខ្លីចេញពីក្នុងហោប៉ៅខោ មកអាម៉េ បញ្ចូលគ្រាប់ រួចក៏ផ្ទុះអាវុធ១គ្រាប់ តែមិនបង្កឱ្យមានមនុស្សរងរបួសនោះទេ។
ប្រភពដដែល បន្តថា បន្ទាប់ពីបង្កហេតុរួច ខ្មាន់កាំភ្លើង បានប្រមូលយកសំបកគ្រាប់ទុក រួចធ្វើដូចគ្មានរឿងអ្វីកើតឡើង ប៉ុន្តែប្រជាពលរដ្ឋដែលឃើញហេតុការណ៍ បានរាយការណ៍ប្រាប់សមត្ថកិច្ច ចុះអន្តរាគមន៍ភ្លាមៗ។
ក្រោយពេលកើតហេតុ សមត្ថកិច្ចបានចុះឃាត់ខ្លួនមនុស្សប្រុស ចំនួន៥នាក់ ក្នុងនោះមានម្នាក់ជាខ្មាន់កាំភ្លើង នាំទៅកាន់អធិកាដ្ឋាននគរបាលខណ្ឌឫស្សីកែវ ដើម្បីសាកសួរ៕