ខេត្តបាត់ដំបង ៖ នៅយប់ថ្ងៃទី០៨ ខែសីហា ឆ្នាំ២០២២ អនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង រួមនិងយោបល់លោកឧត្តមសេនីយ៍ត្រី កុយ ហៀង ស្នងការរង ផែនការងារប្រឆាំងគ្រឿងញៀន កម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្ត សហការជាមួយក្រុមអន្តរាគមន៍ប្រឆាំងបទល្មើស រួមនិងកម្លាំងអធិការដ្ឋាននគរបាលក្រុងបាត់ដំបង ដឹកនាំដោយលោកវរសេនីយ៍ឯក សុខ និមល នាយការិយាល័យប្រឆាំងគ្រឿងញៀន បានឃាត់ខ្លួនក្រុមក្មេងស្ទាវ ប្រមូលផ្តុំតាមទីសាធារណៈ ១លើក ស្ថិតនៅចំណុចក្រុមទី៣ ភូមិរំចេក៤ សង្កាត់រតនៈ ក្រុងបាត់ដំបង។
ក្នុងកិច្ចប្រតិបត្តិការនេះ សមត្ថកិច្ចបានឃាត់ខ្លួនក្រុមក្មេងប្រមូលផ្តុំតាមទីសាធារណៈ សរុបចំនួន ៧៩នាក់ (ស្រី១៩នាក់) ក្នុងនោះបានរកឃើញមុខសញ្ញាជួញដូរថ្នាំញៀន ចំនួន២នាក់ អ្នកមានផ្ទុកសារធាតុញៀន ចំនួន៦នាក់ (ស្រី៤នាក់) និងប្រើប្រាស់ដំបង កាំបិត ចំនួន១នាក់។
វត្ថុតាងដកហូត រួមមាន ៖ ១-ថ្នាំញៀនប្រភេទមេតំហ្វេតាមីន (ម៉ាទឹកកក ICE) ចំនួន៤ថង់។ ២-ថ្នាំញៀនប្រភេទមេតំហ្វេតាមីន (យ៉ាម៉ា WY) ចំនួន២៤គ្រាប់កន្លះ។
ក្រុមក្មេងទំនើង ទាំង៧៩នាក់ខាងលើ ត្រូវបានសមត្ថកិច្ចជំនាញធ្វើការអប់រំ និងធ្វើកិច្ចសន្យា រួចអនុញ្ញាតឱ្យអាណាព្យាបាលមកធានាត្រឡប់ទៅមូលដ្ឋានវិញ៕