ខេត្តបន្ទាយមានជ័យ ៖ ក្មេងប្រុសតូចម្នាក់ ត្រូវក្រុមគ្រួសារទុកឱ្យដើរលេងតែម្នាក់ឯង ក្បែរៗផ្ទះ លុះចាស់ៗភ្លេចខ្លួន ក្មេងប្រុសបានដើរមកលេងទឹកប្រឡាយ មួយកន្លែង បណ្តាលឱ្យលង់ស្លាប់យ៉ាងអាណោចអាធ័ម។
ហេតុការណ៍នេះ បានកើតឡើង កាលពីវេលាម៉ោង ២និង៣០នាទីរសៀល ថ្ងៃទី០៩ ខែសីហា ឆ្នាំ២០២២ នៅចំណុចប្រឡាយទឹក ខាងកើតភូមិតាវង (ពន្សៃបេង) ចម្ងាយប្រហែល១៥ម៉ែត្រ ស្ថិតភូមិតាវង ឃុំពន្លៃ ស្រុកភ្នំស្រុក។
ក្មេងប្រុសរងគ្រោះដែលលង់ទឹកស្លាប់ មានឈ្មោះរ៉េត វិសិទ្ធ ភេទប្រុស អាយុ០៣ឆ្នាំ រស់នៅក្នុងបន្ទុកឪពុកម្តាយ និងមានលំនៅក្នុងភូមិតាវង ឃុំពន្លៃ ស្រុកភ្នំស្រុក។
តាមការបំភ្លឺពីឈ្មោះ គ្រី ការ៉ូ ភេទប្រុស អាយុ៥២ឆ្នាំ ត្រូវជាជីតាក្មេងរងគ្រោះ បានឱ្យដឹងថា មុនកើតហេតុ ក្មេងប្រុសរងគ្រោះ បានដើរលេង ហើយបានចុះងូតទឹកលេងតែម្នាក់ឯង ពុំមាន មនុស្សចាស់នៅក្បែរ លុះក្រោយពីបាត់ក្មេង ក៏នាំគ្នាដើររក ប្រទះឃើញស្នាមជើងដើរចុះទឹកប្រឡាយ ពេលនាំគ្នាចុះរាវរក ក៏ប្រទះឃើញក្មេងស្លាប់នៅក្នុងទឹកប្រឡាយបាត់ទៅហើយ ទើបរាយការណ៍ប្រាប់សមត្ថកិច្ច ចុះមកពិនិត្យតែម្តង។
ក្រោយទទួលបានព័ត៌មានខាងលើ សមត្ថកិច្ចជំនាញ បានចុះពិនិត្យនិងធ្វើកោសល្យវិច័យសព រួចបញ្ជាក់ថា ពុំមានអ្វីទាក់ទិនក្នុងករណីឃាតកម្មនោះឡើយ ពោលគឺក្មេងប្រុសរងគ្រោះ ពិតជាស្លាប់ដោយសារតែលង់ទឹក ប្រាកដមែន។
សពក្មេងប្រុសរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕