ភ្នំពេញ ៖ ត្រឹមរយៈពេល ១យប់ ក្រុមជនសង្ស័យជាមុខសញ្ញាឆក់យ៉ាងសកម្ម នៅម្តុំស្ពានអាកាសស្ទឹងមានជ័យ បានធ្វើសកម្មភាពឆក់ ចំនួន២ករណីផ្ទួនៗ ដោយបានសម្រេច ១ករណី ហើយក្រុមជនសង្ស័យគេចខ្លួនបាត់ ដោយសុវត្ថិភាព បន្សល់ទុកស្រីស្អាត ជាជនរងគ្រោះអង្គុយទួញយំស្តាយរបស់ទ្រព្យខ្លួន។ លុះរំលងមិនបានប៉ុន្មានម៉ោងផង ជនសង្ស័យបានក៏ធ្វើកម្មភាពជាលើកទី២ មិនបានសម្រេច តែបណ្តាលឱ្យជនរងគ្រោះដួលរងរបួសធ្ងន់។
ករណីទី១-កើតឡើង កាលពីវេលាម៉ោង ១និង៣០នាទីរំលងអធ្រាត្រ ឈានចូលថ្ងៃទី២៧ ខែតុលា ឆ្នាំ២០២២ នៅចំណុចម្តុំស្ពានអាកាសស្ទឹងមានជ័យ តាមបណ្តោយផ្លូវព្រះមុនីរ៉េត សង្កាត់ស្ទឹងមានជ័យទី២ ខណ្ឌមានជ័យ ដោយជនរងគ្រោះ ជានារីវ័យក្មេង ត្រូវជនសង្ស័យឆក់ទូរស័ព្ទម៉ាក iPhone 11Pro តម្លៃ៤៥០ដុល្លារ យកទៅបាត់ និងមានគ្នាជនសង្ស័យម្នាក់ទៀត បានមកប្រាប់ជនរងគ្រោះថា បើចង់បានទូរស័ព្ទ ឱ្យលុយ ១០ម៉ឺនមក វាទៅយកឱ្យវិញ ទាំងក្នុងខ្លួននាងពុំមានលុយសោះ។
ករណីទី២-កើតឡើងនៅវេលាម៉ោង ៥និង៣០នាទីព្រឹក ថ្ងៃទី២៧ ខែតុលា ឆ្នាំ២០២២ នៅម្តុំស្ពានស្ទឹងមានជ័យ ដដែល មានករណីឆក់កាបូប តែមិនបានសម្រេច ខណៈពេលជនរងគ្រោះ ២នាក់បងប្អូន កំពុងជិះម៉ូតូរ៉ឺម៉ក ធ្វើដំណើរចេញពីផ្ទះ ទៅទិញផ្លែឈើ នៅផ្សារនាគមាស បណ្តាលឱ្យបុរសម្នាក់ធ្លាក់ពីលើរ៉ឺម៉ក រងរបួសធ្ងន់ បញ្ជូនទៅសង្គ្រោះភ្លាមៗនៅមន្ទីរពេទ្យ។
ចំពោះករណីខាងលើនេះ ជនរងគ្រោះបានទទូចសុំឱ្យសមត្ថកិច្ចជំនាញមូលដ្ឋានសង្កាត់ស្ទឹងមានជ័យទី១ និងទី២ មេត្តាជួយយាមល្បាតផង ព្រោះម្តុំស្ពានអាកាសស្ទឹងមានជ័យ នេះ ឃើញថា ជនសង្ស័យធ្វើសកម្មភាពឆក់ពលរដ្ឋដែលធ្វើដំណើរឆ្លងកាត់ម្តុំនោះ ជាញឹកញយណាស់៕