ភ្នំពេញ៖ បុរសជាជាងចម្លាក់ឈើគ្រឿងសង្ហារឹមម្នាក់ ចាញ់បោកមិត្តភក្កិអស់ម៉ូតូមួយគ្រឿងទើបនឹងទិញមិនទាន់បានជិះផងស្តាយម៉ូតូពេកដើររកម៉ូតូបានជួបស្រី្តម្នាក់ប៉ះចំជើងបោកទៀតនាំទៅដេកផ្ទះសំណាក់ដាក់ថ្នាំសណ្តំបោកយកលុយអស់ចំនួន៨០ម៉ឺនរៀល និង៥០០០បាតទូរស័ព្ទ១គ្រឿង បង្កឲ្យមានការភ្ញាក់ផ្អើលកាលពីវេលាម៉ោង៨ និង១៥នាទីព្រឹកថ្ងៃទី២៤ ខែធ្នូ នៅចំណុចផ្ទះសំណាក់លេខ៨៥ ផ្លូវលេខ៧០ ក្រុមទី៨ ភូមិទួលសង្កែ ខណ្ឌឬស្សីកែវ ។
ជនរងគ្រោះមានឈ្មោះហង្សណារ័ត្នហៅរ៉ាភេទប្រុសអាយុ៣៩ឆ្នាំ មុខរបរជាងចម្លាក់ឈើមានទីលំនៅភូមិស្រះក្តុលឃុំស្រះក្តុលស្រុកស្រអែមខេត្តព្រះវិហារ សំភារៈដែលស្រីស្នេហ៍យកទៅនោះមានទូរស័ព្ទម៉ាកសាំសុងណូត១គ្រឿងលុយចំនួន៨០ម៉ឺនរៀល និង៥០០០បាត ។ ចំណែកឯស្រីស្នេហ៍ដែលដាក់ថ្នាំសណ្តំយកលុយហើយរត់គេចខ្លួនបាត់នោះមានឈ្មោះស្រីដា អាយុ២៥ឆ្នាំ ជាស្រ្តីមេម៉ាយកូន២នាក់ មានមុខមិនពិតប្រាកដ ស្នាក់នៅភូមិទួលគោកសង្កាត់ទួលសង្កែ ខណ្ឌឬស្សីកែវ ។
តាមប្រភពព័ត៌មានពីជនរងគ្រោះបានឱ្យដឹងថា រូបគាត់ជាជាងចម្លាក់គ្រឿងសង្ហារឹមឈើ ពេលដែលឆ្លាក់បានហើយយកមកលក់នៅភ្នំពេញជាង១ឆ្នាំមកហើយ និងបានស្គាល់បុរសម្នាក់ឈ្មោះពៅ អាយុ៣៥ឆ្នាំ តែងតែនាំគាត់ឲ្យយកគ្រឿងសង្ហារឹមទៅលក់ឲ្យម៉ូយនៅផ្សារទួលទំពូងបានចំណេញក្បាលកាក់ខ្លះ ។
ជនរងគ្រោះបានបន្តថានៅអំឡុងកន្លះខែមុនរូបគាត់បានពឹងពាក់ឱ្យឈ្មោះពៅជួយជូនរូបគាត់ទៅទិញម៉ូតូនៅផ្សារឃ្លាំងរំសេវមួយគ្រឿងម៉ាកគុបមូលក្នុងតំលៃ៧០០ដុល្លារបន្ទាប់ពីទិញនិងធ្វើស្លាកលេខរួចរាល់ហើយ ជនរងគ្រោះបានបបួលឈ្មោះពៅ ទៅផឹកស៊ីតាំងពីថ្ងៃរហូតដល់យប់ជ្រៅស្រវឹងជោករាងៗខ្លួនហើយក៏បាននាំគ្នាមកដេកនៅផ្ទះសំណាក់មួយកន្លែងមិនចាំយីហោនៅតាមបណ្តោយផ្លូវលេខ៧០ សង្កាត់ទួលសង្កែ ខណ្ឌឬស្សីកែវ ។ លុះព្រឹកឡើងក្រោកពីដំណេកស្រាប់តែឈ្មោះពៅបានយកម៉ូតូរបស់ខ្លួនជិះទៅបាត់ ។
ជនរងគ្រោះបានបន្តឱ្យដឹងទៀតថាក្រោយពីបាត់ម៉ូតូរូបគាត់បានដើរចេញពីផ្ទះសំណាក់ខាងលើ មកដល់ចំណុចផ្លូវរថភ្លើងកែងផ្លូវលេខ២៧៣ក៏ជួបស្រ្តីឆបោកខាងលើបានសួរទៅរូបគាត់ថាពូដើរមកពីណាទៅណាហើយរូបគាត់បានឆ្លើយតបវិញថាដើរកម៉ូតូដែលត្រូវមិត្តភក្កិលួចជិះទៅបាត់ហើយមិនដឹងដើររកនៅណាទេភ្លាមៗនោះនារីខាងលើបានប្រាប់ថាបើបាត់ម៉ូតូមែនចាំខ្ញុំជូនដើររក។បន្ទាប់មកស្រ្តីនោះបាននាំនាងជិះម៉ូតូឌុបទៅដើររកនៅម្តុំផ្សារឃ្លាំងរំសេវស្រាប់តែប្រទះឃើញម៉ូតូរបស់ខ្លួននៅក្នុងហាងបញ្ចាំមួយកន្លែងដោយឈ្មោះពៅ យកមកបញ្ចាំក្នុងតំលៃ១០០ដុល្លារ ភ្លាមៗនោះខ្លួនគ្មានប្រាក់លោះយកម៉ូតូវិញទេ បានសន្យាជាមួយម្ចាស់ហាងបញ្ចាំថា កន្លះខែទៀត រូបគាត់នឹងយកលុយមកលួសវិញហើយ និងបានសុំលេខទូរស័ព្ទស្រ្តីខាងលើ ដើម្បីទាក់ទងគ្នា ។ ខណៈពេលដែលគាត់ត្រឡប់ទៅស្រុកកំណើតវិញ ស្រ្តីខាងលើតែងតែទូរស័ព្ទទៅរូបគាត់ជាញឹកញាប់ និងបានសុំលុយជាញយដងផងដែរដោយយកលេសថា រូបគេជាស្រ្តីមេម៉ាយកូន២នាក់ កូនឈឺអត់លុយព្យាបាលទើបរូបគេចេះតែផ្ញើមកឲ្យនិងបានទាក់ទងគ្នាតាមរយៈទូរស័ព្ទរហូតមក ។
ជនរងគ្រោះបានបន្តថានៅវេលាម៉ោង២រសៀលថ្ងៃទី២៣ ខែធ្នូ ឆ្នាំ២០១៦ រូបគាត់បានជិះរថយន្តតាក់ស៊ីចេញពីខេត្តព្រះវិហារមកភ្នំពេញ ដើម្បីយកលុយមកលោះម៉ូតូវិញបានមកដល់ភ្នំពេញ នៅវេលាម៉ោង៩យប់ ពេលរូបគាត់មកដល់ចំណុចរង្វងមូលគួចកាណុង ក៏បានទូរស័ព្ទទៅស្រ្តីខាងលើឱ្យមកទទួល ហើយបាននាំគ្នាដើរផឹកស៊ីជាមួយនាងនិងប្អូនធម៌ប្រុសរបស់គាត់ម្នាក់ទៀត ដោយដើរផឹកចំនួន៣ហាង អស់លុយចំនួនជាង២០០ដុល្លារផឹកហូតដល់ស្រវឹងជោកជាំរាងៗខ្លួនក៏បានបបួលនាងទៅដេកនៅផ្ទះសំណាក់ខាងលើតែពីរនាក់ ។
មុននឹងចូលដេក ស្រ្តីខាងលើបានសុំទៅទិញបង្អែម២ថង់ យកមកហូប២នាក់ ក្រោយពីហូបរួចជនរងគ្រោះបានដេកលុងលក់ទាំងមិនបានរួមរក្សទេ ដេកលក់រហូតដល់៨និង១៥នាទីព្រឹកថ្ងៃទី២៤ ខែធ្នូ ទើបដឹងខ្លួនក្រោកឡើង ស្រាប់តែបាត់ស្រីស្នេហ៍ហើយបាត់លុយនិងទូរស័ព្ទអស់រលីងពីខ្លួន ធ្វើឲ្យមានការភ្ញាក់ផ្អើលរត់ទៅប្តឹងនគរបាលប៉ុស្តិ៍រដ្ឋបាលទួលសង្កែឱ្យជួយអន្តាគមន៍៕
ដោយ៖ កែវ ឈីម