ភ្នំពេញ៖អ្នកនាងសឿ សុធារ៉ា បានបង្ហាញអារម្មណ៍រីករាយក្រោយត្រូវឯកឧត្តមខៀវ កញ្ញារិទ្ធ រដ្ឋមន្រ្ដីក្រសួងព័តមានបានផ្ដល់វីឡារទោល១ខ្នងដល់នាងដែលផ្ទះនោះមានតម្លៃ២ម៉ឺនដុល្លារ ព្រោះតែលោករដ្ឋមន្រ្ដីអាណិតនាងកំពុងតែមានជីវភាពខ្វះខាត ។សុធារ៉ា បានលើកម្រាមដៃដប់សំពះថ្លែងអំណរគុណលោករដ្ឋមន្រ្ដីហើយនាងចេញសារដោយរំភើបនិងចាត់ទុកឯកឧត្តមនិងភរិយាជាឪពុកម្ដាយរបស់នាងទៀតផង ស្របពេលអំណោយ១នេះនាងចាត់ទុកថាជាការផ្ដល់ជម្រកឲ្យនាងនិងកូនៗបានសាងជីវិតរស់រានឡើងវិញ។ជាមួយគ្នានេះដែរសុធារ៉ា បានសន្យាថារូបនាងក៍ដូចជាកូនៗនឹងខិតខំបម្រើរសិល្បៈសារជាថ្មីឲ្យអស់ពីកំលាំងកាយចិត្តតែម្ដង។
អ្នកសិល្បករជាច្រើនបានសម្ដែងការសាទរចំពោះសឿ សុធារ៉ា ដែលត្រូវបានលោករដ្ឋមន្រ្ដីក្រសួងព័តមានផ្ដល់ជម្រកថ្មីឲ្យនាងនាពេលនេះហើយពួកគេបានលើកទឹកចិត្តនាងឲ្យបន្ដអាជីពសិល្បៈជាមួយកូនស្រីច្បងដោយកុំបាក់ទឹកចិត្ត។ចំណែកលោកកៅ សីហា ដែលជាអ្នកដឹកនាំសម្ដែងភាពយន្ដនៅហង្សមាសវិញបានថ្លែងថាអ្នកនាងសុធារ៉ា និងកូនស្រីនិងលេចមុខសម្ដែងរួមគ្នាក្នុងរឿង”ម្ចាស់កីតម្បាញ”ក្រោមការដឹកនាំរបស់លោកហើយនេះជារឿងទី២របស់នាង បន្ទាប់ពីនាងវិលចូលសិល្បៈសារជាថ្មីឡើងវិញ ក្រោយបាត់មុខអស់ជាង១០ឆ្នាំ។
សូមបញ្ជាក់ថាសឿ សុធារ៉ា បានជំពាក់បំណុលគេច្រើនម៉ឺនដុល្លារទាក់ទងការលេងតុងទីន ,ប្រាក់ចំណូលពីសិល្បៈរបស់នាងបានធ្លាក់ចុះ ហើយនាងបានក្លាយទៅជាវង្វេងវង្វាន់ស្មារតីខ្លាំងរហូតសឹងតែពេលខ្លះបាត់បង់ការចងចាំទៀតផងបន្ទាប់ពីម្ដាយនាងឧបាសិកាណោ សុខន បានទទួលមរណភាពក្នុងអាយុ៧៩ឆ្នាំ កាលពីថ្ងៃទី២៨ ខែតុលា ឆ្នាំ២០២២ ។សុធារ៉ា ដែលបានចែកផ្លូវគ្នាជាមួយលោកសាពួន មីដាដា ទៅហើយនោះបានបានរ៉ាប់រងកូនប្រុសស្រីទាំងពីរ ខណៈដែលមុននេះនាងដេកបន្ទោកសេរ៉ូមនៅក្រៅរបងមន្ទីពេទ្យមួយគូរឲ្យសង្វេកទើបលោកមីដាដា ផ្ញើរសារដាស់តឿននាងថាឲ្យហូបគ្រប់ ដេកគ្រប់ ហាត់កីឡា សំអាតចិត្ត តាំងសមាធិ និងព្រមទទួលគ្រប់យ៉ាង … ព្រះពុទ្ធ អង្គបានត្រាស់សម្តែងថា សីល សមាធិ បញ្ញា ព្រោះគ្រូពេទ្យមិនអាចជួយនាងបានច្រើនឡើយ។
អ្វីដែលគូរឲ្យកត់សម្គាល់អតីតស្វាមីសុធារ៉ា ហាក់មិនចង់ឲ្យកូនស្រីច្បងរបស់លោកឈ្មោះសាពួន តារាពិមាន ចូលសិល្បៈនោះទេដោយលោកឲ្យយោបល់កូនថាត្រូវយក ព្រះពុទ្ធ ព្រះធម៍ ព្រះសង្ឃ ជាទីពឹងទីរលឹក រលាស់ខ្លួនចេញពីលោកីយ៍នេះ ទៅរកនិពាន្វជាត្រើយសុខ…៕