ភ្នំពេញ៖ បុរសម្នាក់ជាសន្តិសុខក្រុមហ៊ុនថៃប៊ុនរ៉ុងយាមនៅផ្សារអូឡាំពិកតូចចិត្តប្រពន្ធសុំលែង សម្រេចចិត្តបាញ់សម្លាប់ខ្លួនឯងចំកខាងឆ្វេងធ្លាយទៅលលាដ៍ក្បាល រងរបួសធ្ងន់ធ្ងរ កាលពីវេលាម៉ោង៩ និង៣០នាទីព្រឹកថ្ងៃទី២៧ ខែធ្នូ នៅលើមជ្ឃមណ្ឌលពាណិជ្ជកម្មផ្សារអូឡាំពិកជាន់ទី៣ក្រុម១៣ ស្ថិតនៅភូមិ២ លើអាងស្តុបទឹកផ្សារអូឡាំពិក សង្កាត់អូឡាំពិក ខណ្ឌចំការមន ។
ជនរងគ្រោះមានឈ្មោះ ស្រ៊ុន ឈិនឡុង ភេទប្រុស អាយុ២៦ឆ្នាំ មុខរបរសន្តិសុខក្រុមហ៊ុនថៃប៊ុនរ៉ុង យាមនៅផ្សារអូឡាំពិកស្នាក់នៅផ្សារអូឡាំពិក មានស្រុកកំណើតនៅភូមិទេពមន្រ្តី ឃុំព្រះប្រសប់ ស្រុកខ្សាច់កណ្ដាល ខេត្តកណ្ដាលរបួសត្រង់កខាងឆ្វេងធ្លាយទៅលលាដ៍ក្បាល ។ ស្រ្តីជាប្រពន្ធមានឈ្មោះអានីមានស្រុកកំណើតនៅស្រុកកោះធំខេត្តកណ្តាល ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបានឡើងទៅសម្រាក នៅជាន់ទី៣ នៅលើមជ្ឃមណ្ឌលពាណិជ្ជកម្មផ្សារអូឡាំពិក ដើម្បីសម្រាកព្រោះទីនោះ ជាកន្លែងសម្រាកហូបបាយពេលថ្ងៃត្រង់ ខណៈពេលជនរងគ្រោះឡើងទៅដល់បានអង្គុយសរសេរសំបុត្រទុកឲ្យអតីតប្រពន្ធ ចំនួន៣សន្លឹក ក្នុងនោះសន្លឹកទីមួយបានសរសេរថាអានីអូនសំលាញ់បងលាហើយបងគ្មានអ្វីគ្រប់យ៉ាងឲ្យអូនដូចជាគេទេត្រឹមជាសន្តិសុខមិនដូចគេកូនថៅកែ ។ អានី ( NyNy Love ) ជូនពរអូនឲ្យអូនមានក្តីសុខ រស់នៅមានសុភមង្គល ជាមួយគេរហូតដល់ចាស់ កុំធ្វើបាបចិត្តគេដូចបងអី ស្មោះនឹងគេណា ឈប់ធ្វើមនុស្សក្បត់ ទៀតយល់នៅ បងសុំទោសអូនផង ចាំមើលអូនការបានហើយ អរគុណអូនដែលក្បត់បង ឥលូវអូនធ្វើបានសម្រេចហើយ ភ្លេចអស់ពាក្យសន្យាជាមួយបង លាហើយអូនសំលាញ់ ពីបងឈិនឡុង ។ សំណេរនៅក្នុងសន្លឹកទី២ អូនផ្តល់ក្តីស្រឡាញ់ឲ្យបងហើយ ហេតុអ្វីអូន មិនចេះស្មោះ អូនទុកការស្រឡាញ់នេះជារបស់លេង អូនដឹងទេបងពិតជាឈឺចាប់ណាស់ បងមិនដែលគិតឲ្យអូនបែកពីបងទេ ពេលនេះបងព្រមតាមហើយ ។ ០៦.០៣.១៩៩០ ជីវិតបង ។ ១៥.០១.២០១៧ បានជួបអូន អតីតកាល បច្ចុប្បន្នកាល អនាគតកាល របស់ខ្ញុំ មានតែការឈឺចាប់ប៉ុណ្ណោះក្នុងជីវិតនៅជាតិនេះ ។ ចំណែកសំណេរសន្លឹកទី៣ ជូនអូនចុង ក្រោយថ្ងៃទី២៧ ខែធ្នូ ឆ្នាំ២០១៧ អូនមិនដឹង តែបងចង់ប្រាប់ការពិត បងតែងគិតដល់អូន គ្រប់ពេលវេលា នឹកពីរឿងស្នេហា និងនឹកពីរឿងស្រឡាញ់គ្នា អូនគឺជាមនុស្សបងស្នេហ៍បំផុត ដើរលើផ្លូវដែលមានមនុស្សម្នាជាច្រើន កែវភ្នែកបងមើលតែអូនម្នាក់គត់ ចិត្តដែលស្រឡាញ់អូនមិនខ្លាចនឿយហត់ បេះដូងបងសុំឈប់ចតត្រង់ចំណតពេលមានអូន នឹកដល់អូនមុនគេពេលបងភ្ញាក់ពីគេង ទោះអ្នកផ្សេងនិយាយអ្វីក៏បងមិនចាប់អារម្មណ៍ សន្យាស្រឡាញ់គ្នា ទោះជាសើច រឺយំ ក៏មិនអាចបែកគ្នាបានឡើយ ទោះអ្នកណាមកបង្ខំ យ៉ាងណាក៏ដោយ នឹកដល់អូនមុនគេពេលបងចេញទៅដល់កន្លែងណាផ្សេង ស្នេហ៍ពិតមានតែអូនគ្មានអ្នកបន្ទាប់ឡើយ រស់មិនបានបើគ្មានអូនរស់ក្បែររូបបង ។
បន្ទាប់ពីសរសេរសំបុត្រទុករួចហើយបុរសខាងលើបានដេកលើប៉ៅអ៊ីអង្គុយយកកាំភ្លើង អាកា៤៧ បាញ់ខ្លួនឯងមួយគ្រាប់ចំកខាងឆ្វេងធ្លាយទៅលលាដ៍ក្បាល ភ្លាមៗនោះត្រូវសន្តិសុខធ្វើការជាមួយគ្នាដឹកយកទៅព្យាបាលនៅមន្ទីរពេទ្យមិត្តភាពខ្មែរសូវៀត ។
បើតាមសំដីលោក ស្រ៊ុន សុភ័ណ្ឌ ភេទប្រុស អាយុ២៣ឆ្នាំមុខរបរសន្តិសុខឯកជននៅក្រុងតាខ្មៅ ស្នាក់នៅក្រុងតាខ្មៅ ខេត្តកណ្ដាលបានប្រាប់សមត្ថកិច្ចថាបុរសដែលបាញ់សម្លាប់ ខ្លួនឯងនេះត្រូវជាបងប្រុសបង្កើតរបស់គាត់។ ចំពោះមូលហេតុដែលគាត់បាញ់សម្លាប់ខ្លួនឯងដោយសារមានវិបត្តិគ្រួសារបន្ទាប់ពីគាត់បានលែងលះជាមួយប្រពន្ធជិត១ឆ្នាំមកហើយ គឺគាត់តែងតែពិបាកចិត្តមិននឹកស្មានថាគាត់គិតខ្លីដល់ថ្នាក់បាញ់សម្លាប់ខ្លួនឯងបែបនេះ ។
បច្ចុប្បន្នជនរងគ្រោះកំពុងតែសង្គ្រោះនៅមន្ទីរពេទ្យមិត្តភាពខ្មែរសូវៀត ៕
