ភ្នំពេញ៖យូរី បានបង្ហាញកម្មវិធី(Schedule)ច្រៀងសម្ដែងរបស់នាងនៅខែ១២ ដែលរវល់ជាប់ ជារៀងរាល់សប្ដាហ៍ពេញ១ខែត្រូវបានគេកក់អស់ ដែលនេះបញ្ជាក់ថាទីផ្សារសិល្បៈនាងត្រូវ បានម្ចាស់Sponsor ចាប់អារម្មណ៍និងពេញចិត្តនាង។សកម្មភាពស្ទុះឡើងបែបនេះរបស់យូរី ត្រូវបានគេកត់សម្គាល់ថាកើតមានក្រោយពីនាងចែកផ្លូវគ្នាជាមួយលោកថៅកែពោះម៉ាយជា នី ជាង១ឆ្នាំទៅហើយ ក្រោយអ្នកទាំងពីរផ្អែមល្ហែមគ្នាជាច្រើនខែ។
ប៉ុន្ដែយូរី ច្រើនតែបង្ហាញទឹកមុខស្រងូតស្រងាត់ជាងរីករាយព្រោះការងារសិល្បៈកាន់តែច្រើននាងក៍ហត់នឿយរឹតតែខ្លាំង និងគ្មានអ្នកកាន់ចង្កូតរថយន្ដជូននាងទៅច្រៀងសម្ដែងគ្រប់ឆាកជំនួសលោកថៅកែឡើយ។យ៉ាងណាគេជឿរថារូបសម្រស់ស្អាតដូចយូរី ឲ្យតែនាងព្រមបើកបេះដូងនោះច្បាស់ជារកបានសង្សារថ្មីដែលជាអ្នកមាន ហើយរូបសង្ហារជាងលោកថៅកែជាមិនខាន។តែមូលហេតុដែលយូរី ពន្យាពេលយកសង្សារថ្មីឬអាចមានហើយតែមិនទាន់ចង់បង្ហាញមុខគូស្នេហ៍នាពេលនេះនោះអាចមកពីនាងខ្លាចដើរជាន់ដានចាស់ជាថ្មីម្ដងទៀត ព្រោះថានាងធ្លាប់ប្រេះឆាស្នេហ៍មិនក្រោម៣លើកមកហើយនោះទេ។
អតីតតារាចម្រៀងRock និងសាន់ដេនាងយូរី ត្រូវបានគេចាត់ទុកថានាងស្ថិតក្នុងចំណោមតារាស្រីវ័យក្មេងដែលប្រជែងទីផ្សារចម្រៀងផ្នែកយុវវ័យនាពេលបច្ចុប្បន្នដូចជានាងរ៉េត ស៊ូហ្សាណា និងតន់ ច័ន្ទសីម៉ា ជាដើម។ប៉ុន្ដែយូរី មិនសូវជោគជ័យបទស្លូវឡើយគឺស្រីស្រស់ត្រូវបានគេចាប់អារម្មណ៍ខ្លាំងទៅលើការការតុបតែងខ្លួន,ក្បាច់រាំ និងច្រៀងបទញាក់ច្រើនជាងប្រើសម្លេង។អ្នកដឹកនាំកម្មវិធីប្រគុំតន្រ្ដីម្នាក់បានឲ្យដឹងថាក្រោយចេញពីសាន់ដេពេលនេះយូរី ស៊ីថ្លៃច្រៀងConcerts ធំ១កម្មវធីជិត២ពាន់ដុល្លារ ហេតុនេះក្នុង១រដូវក្ដៅស្រីស្អាតរូបនេះក៍អាចរកប្រាក់ចំណូលបានម៉ឺនដុល្លារផងដែរ។យូរី ធ្លាប់បង្ហើបថានាងចង់ថតភាពយន្ដបន្ថែមពីលើអាជីពចម្រៀងដើម្បីឲ្យទីផ្សារសិល្បៈរបស់នាងកាន់តែទូលាយ ប៉ុន្ដែពេលនេះនាងមិនទាន់ភ្លក្សរសជាតិតួឯកជាលើកដំបូងឡើយ។
ទស្សនិកជនរងចាំមើលថាតើតារាស៊ិចស៊ីយូរី នឹងជ្រើសគូស្នេហ៍ថ្មីជាបុរសនៅក្នុងឬក្រៅសិល្បៈ?
