ភ្នំពេញ៖អតីតតារាសម្ដែងដ៍ល្បីល្បាញលោកសុវណ្ណ មុន្នី ដែលបានទៅរស់នៅរដ្ឋកាលីហ្វ័រញ៉ា ទីក្រុងឡងប៊ិច សហរដ្ឋអាមេរិក រយៈពេលជិត២០ឆ្នាំមកហើយនោះលោកបានមកលេងខ្មែរជាលើកទី៥កាលពីថ្ងៃទី២៤ខែធ្នូ ដែលគោលបំណងគឺមកកម្សាន្ដនិងដើម្បីជួបជុំមិត្តភក្ដិចាស់ៗដែលធ្លាប់រួមអាជីពជាមួយគ្នាហើយនឹងធ្វើពិធីជប់លៀងធំនៅថ្ងៃទី២៧ខែធ្នូឆ្នាំ២០២២ នៅហាងចំការដូងតាសម្បត្តិ ស្ថិតនៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។
លោកសុវណ្ណ មុន្នី បានប្រាប់អ្នកយកព័តមាន”នគរធំ”តាមទូរស័ព្ទកាលពីរសៀលថ្ងៃទី២៦ ធ្នូ ថាពិធីជួបជុំមិត្តចាស់នោះនឹងធ្វើចាប់ពីម៉ោង១២ថ្ងៃត្រង់រហូតដល់១២យប់ ថ្ងៃទី២៧ ធ្នូ ហើយភ្ញៀវដែលលោកអញ្ជើញចូលរួមមានដូចជាលោកទេព រិនដារ៉ូ,ហម ឈរ៉ា,សាវិន ហ្វីលីព,យុត្ថារ៉ា ឆាន្នី ចា រិទ្ធី ,អ្នកនាងកែវ កល្យាណ និងអ្នកនាងចាន់ តារាទី និងតារាធ្លាប់រួមអាជីពជាមួយគ្នាមួយចំនួនទៀត។តារាវ័យ៥៤ឆ្នាំតែនៅរក្សាររូបរាងបានសង្ហារនិងសាច់ដុំធំមាំរូបនេះថាកាលពីឆ្នាំ១៩៩៧ មុនពេលលោកចេញទៅអាមេរិកលោកក៍ធ្លាប់បានធ្វើពិធីជួបជុំមិត្តមិត្តរួមអាជីពនេះម្ដងហើយដែរដែលរៀបចំនៅសណ្ឋាគាអាំងទែរកុងទីណង់តាល់(The Great Duke )ដែលកាលនោះមានលោកខៃ ប្រសិទ្ធ ,ពិសិដ្ឋ ពីលិកា,អ្នកនាងអ៊ូ លក្ខិណា និងតារាជាច្រើនទៀតបានចូលរួម។
ដោយឡែកសម្រាប់ពិធីជួបជុំមិត្តចាស់នៅឆ្នាំនេះវិញគឺធ្វើឡើងដើម្បីបង្ហាញពីការនឹករលឹកមិត្តភក្ដិចាស់ៗដែលធ្លាប់រួមអាជីពជាមួយគ្នាហើយពេលនេះខកខានជួបគ្នាជាច្រើនឆ្នាំតែចិត្តនៅតែចងចាំធ្លាប់ថតរឿងជាមួយគ្នានាពេលកន្លងមកនិងចង់ដឹងពីសុខទុក្ខគ្នានាពេលបច្ចុប្បន្នផងដែរ។លោកសុវណ្ណ មុន្នី បានឲ្យដឹងដែរថាក្រៅពីមានកម្មវិធីខាងលើនេះការមកលេងស្រុកជាលើកទី៥របស់លោកនាពេលនេះគឺលោកគ្មានគម្រោងថតភាពយន្ដនោះទេ ពោលគឺរយៈពេល៣សប្ដាហ៍ដែលលោកមានវត្តមាននៅខ្មែរនេះក្រៅពីជួបមិត្តចាស់លោកនឹងដើរកម្សាន្ដតាមរម្យនីយដ្ឋានខ្មែរឲ្យបានច្រើនមុនពេលលោកឡើងយន្ដហោះទៅអាមេរិកវិញនៅថ្ងៃទី១១ ខែមករា ឆ្នាំ២០២៣ ។
លោកសុវណ្ណ មុន្នី បានឲ្យដឹងទៀតថាការមកលេងស្រុកជើងនេះលោកមកតែម្នាក់ឯង មិនបានយកប្រពន្ធនិងកូនមកទេ ព្រោះថាភរិយាលោកជាប់ធ្វើការនៅកាស៊ីណូ ហេតុនេះអត់ចំថ្ងៃសម្រាកមកបាន។
ឆ្លើយតបសំណួរថាតើលោកសុវណ្ណ មុន្នី ចង់បន្ដរស់នៅអាមេរិកជារៀងរហូត ឬលោកមានគម្រោងចង់មករស់នៅស្រុកខ្មែរវិញពេលដែលលោកមានអាយុច្រើនជាងនេះលោកមុន្នី អះអាងថាចិត្តលោកចង់មករស់នៅខ្មែរវិញនៅពេលដែលមានវ័យចាស់ជរាទៅ ព្រោះថាបើនៅខ្មែរចង់ទៅណាជិះតែទុកទុកគឺអាចទៅបានហើយ តែបើនៅអាមេរិកទាល់តែកូនជូនទៅបានកើត។អតីតតារាសម្ដែងជើងចាស់រូបនេះបន្ថែមថាការមកស្រុកខ្មែរលើកនេះលោកកាន់តែមានអារម្មណ៍ភ្ញាក់ផ្អើលព្រោះតែស្រុកយើងមានការអភិវឌ្ឍន៍ខ្លាំង ស្ពាន ផ្លូវ ថ្នល់ ក្វាត់ក្វែង ហេតុនេះហើយលោកចង់មកនៅខ្មែរវិញនាថ្ងៃអនាគត។
គូរបញ្ជាក់ថាលោកសុវណ្ណ មុន្នី បានចេញទៅរស់នៅអាមេរិកតាំពីឆ្នាំ១៩៩៧ ពោលគឺរយៈពេលជាង១៨ឆ្នាំមកហើយដែលលោកផ្ញើរខ្លួននៅស្រុកគេហើយលោកមានភរិយានិងកូន២នាក់នៅទីនោះ។អំឡុពេលចាប់អាជីពសិល្បៈពេញទំហ៊ឹងកាលពីទសវត្សន៍៩០ នោះលោកមុន្នី ធ្លាប់រួមអាជីពជាមួយទេព រិនដារ៉ូ,យស បូវណ្ណៈ ,ហម ឈរ៉ា,យុត្ថារ៉ា ឆាន្នី,ចា រិទ្ធី ,ខៃ ប្រសិទ្ធ ,សម ដារ៉ា,ហង្ស ផល្លីមធុរ៉ា ,សាវិន ហ្វីលីព ,អ្នកនាងចាន់ តារាទី ,អម្ពរទេវី ,កែវ កល្យាណ ,ពិសិដ្ឋ ពីលិកា និងសុខ ស្រីមុំ ជាដើម។កាលពីឆ្នាំមុនលោកសុវណ្ណ មុន្នី ក៍ធ្លាប់ចុះមកថតភាពយន្ដឲ្យផលិតកម្មមហាហង្សម្ដងដែរ ក្រោយលោកអាកខានធ្វើការវិស័យមួយនេះជាង១ទសវត្សន៍៕
