ភ្នំពេញ៖តារាចម្រៀងប្រៀបដូចកីឡាករបាល់ទាត់ពោលគឺមានការផ្លាស់ប្ដូរផលិតកម្ម ក្លឹប ជារឿងធម្មតាដែលពួកគេធ្វើទៅតាមពេលវេលា។ប៉ុន្ដែគេកត់សម្គាល់ថាមានតារាខ្លះក្រោយប្ដូរផលិតកម្មច្រៀងកាន់តែល្បី តែតារាមួយចំនួនទៀតចុះខ្សោយក្រោយផ្លាស់ទ្រនុំ។ដោយឡែកនៅឆ្នាំ២០២៣ នេះគេកត់សម្គាល់ថាមានតារា៤ដួងក្រោយប្ដូរផលិតកម្មច្រៀង សន្ទុះរបស់ពួកគេហាក់នៅទ្រឹង បើទោះជាម្នាក់ៗក្លាយជាតួឯកប្រចាំផលិតកម្មទាំងនោះរៀងៗខ្លួនក្ដី។
១៖ព្រាប សុវត្ថិ ៖តារាវ័យ៤៨ឆ្នាំរូបធ្លាប់គ្រងតំណែងតួឯកនៅហង្សមាសរយៈពេល២៣ឆ្នាំ(១៩៩៧-២០២០)ដោយគ្មានតារាប្រុសណាវ៉ាលោកដាច់ម្ដងណាឡើយ។ប៉ុន្ដែនៅខែសីហា ឆ្នាំ២០២០ លោកសុវត្ថិ អស់និស្ស័យជាមួយហង្សមាសក៍ទៅចូលជ្រកនៅGalaxy រហូតដល់បច្ចុប្បន្នពោលគឺជាង២ឆ្នាំនេះគ្រប់គ្នាអាចមើលឃើញថាបទចម្រៀងរបស់លោកឧកញ៉ារូបនេះលែងសូវមានចេញមកផ្ទុះខ្លាំងដូចមុនទៀតហើយ ពោលគឺFan នៅតែនិយមស្ដាប់បទលោកនៅផលិតកម្មចាស់ជាងច្រៀងនៅទ្រនុំថ្មី។ប៉ុន្ដែភាពប្រែប្រួលរបស់លោកសុវត្ថិ នាពេលនេះក៍មានចំណែកដោយសារតែលោកក្លាយជាឧកញ៉ាលែងសូវសម្រុកធ្វើការងារសិល្បៈទាំងស្រុងដូចមុន ព្រោះងាកទៅធ្វើជំនួញដែលនេះក៍ជាបញ្ហាចោទដែរ។
២៖មាស សុខសោភា៖តារាចម្រៀងសំនៀងផ្អែមមាស សុខសោភា បានជ្រកនៅថោនអស់រយៈពេល៩ឆ្នាំទើបនាងដើរចេញចូលរាម រយៈពេលជិត២ឆ្នាំមកហើយ ដែលពេលនេះសោភា ក៍មិនទាន់អាចធ្វើឲ្យទីផ្សារចម្រៀងប្រែប្រួលដែរ ព្រោះមិនទាន់មានបទខ្លាំងៗដូចមុន។យ៉ាងណាតាមបណ្ដារConcerts ធំៗសោភា នៅតែចេញមុខជាបន្ដបន្ទាប់ដែលអាចបញ្ជាក់ថាទោះជានាងលែងសូវខ្លាំងដូចមុនក៍មិនធ្លាក់ដែរ។ក្រោយប្ដូរទ្រនុំនេះសោភា បានក្លាយទៅជាថៅកែហាងលក់ផលិតផលនៅក្រុងតាខ្មៅ និងហាងកាហ្វេ១នៅកំពង់សោមផងដែរ ដែលបញ្ជាក់ថានាងមិនពឹងទៅលើប្រាក់ចំណូលពីអាជីពចម្រៀងទាំងស្រុងដូចមុនទេ។
៣៖ខេមៈអតីតតារាថោន រូបនេះក្លាយជាតួរងនៅGalaxy ព្រោះព្រាប សុវត្ថិ គឺជាតួឯក ហើយសន្ទុះរបស់លោកប៉ុន សុណារិន នាពេលនេះក៍មិនទាន់ខ្លាំងក្លាដូចកាលលោកនៅច្រៀងផលិតកម្មចាស់ដែរ។ទោះជាយ៉ាងណាអ្នកជំនាញសិល្បៈបានលើកឡើងថាលោកសុណារិន ច្រៀងស្ទីលស្អក តែពិរោះ ហេតុនេះនៅតែគ្មានតារាផ្សេងៗអាចដណ្ដើមតំណែងលោកបានទេ។ប្រភពបានឲ្យដឹងថាលោកសុណារិន ក៍មិនពឹងលើអាជីពចម្រៀងទាំងស្រុងដែរ ព្រោះលោកមានដីធ្លីជាច្រើនកន្លែង គ្រាន់តែលោកខេម មិនចេះអួតអាងដូចគេប៉ុណ្ណោះ។
៤៖ដួង វីរៈសិទ្ធៈ អតីតតារាហង្សមាសលោកម៉ម វាសនា ហៅវីរៈសិទ្ធ បានក្លាយទៅជាតួឯករបស់រាម និងជាដៃគូសំខាន់ជាមួយមាស សុខសោភា ទៀតផង ហេតុនេះការចេញពីហង្សមាសចូលទ្រនុំថ្មីនេះមិនមានអ្នកណាលោកវាសនា ជ្រើសផ្លូវខុសឡើយ ព្រោះសម្អាងថាអំឡុងពេលតារារូបនេះនៅហង្សមាសលោកមិនធ្លាប់បានស្គាល់រសជាតិតួឯកឡើយ។ប៉ុន្ដែបទចម្រៀងរបស់លោកសិទ្ធ ក៍មិនសូវលេចធ្លោដូចអំឡុងពេលលោកច្រៀងដៃគូជាមួយរ៉េត ស៊ូហ្សាណា នៅផលិតកម្មចាស់ដែរ ហេតុនេះហើយទើបមិនសូវមានសន្ទុះខ្លាំងក្លាឡើយ ស្របពេលដែលអ្នកជំនាញសិល្បៈលើកឡើងថារាម ផលិតបទចម្រៀងមិនមែនដើម្បីប្រជែងជាមួយហង្សមាស និងGalaxy នោះទេ ព្រោះផលិតកម្មនេះធ្វើជាព័ណសំបុររបស់គេ។ប៉ុន្ដែវីរៈសិទ្ធ ធ្លាប់ប្រាប់ថាទោះជាលោកទៅផលិតកម្មណាក៍នៅតែធ្វើបទដោយខ្លួនឯងដែរ ហេតុនេះមិនមានការបារម្ភខ្លាចប្ដូរទ្រនុំនាំឲ្យចុះខ្សោយនោះទេ៕