ភ្នំពេញ៖អតីតតារាកំប្លែងCtn អ្នកនាងវ៉ាន់ នីឡា និងនាយក្រាន់ បានបង្ហាញខ្លួនជាផ្លូវការនៅប៉ុស្ដិ៍លេខ៥ក្នុងកម្មវិធីសម្ពោធជាផ្លូវការ”ចៅលោកតា”តាមរយៈការធ្វើសន្និសីទកាសែតកាលពីព្រឹកថ្ងៃទី១ ខែកុម្ភៈ ឆ្នាំ២០២៣ ដែលនេះជាជំហ៊ានថ្មីមួយទៀតសម្រាប់តារាកំប្លែងទាំងពីរ នៅឆ្នាំថ្មី ហើយពួកគេសង្ឃឹមយ៉ាងមុតមាំថានឹងទទួលបានការគាំទ្រពីទស្សនិកជនតាមរយៈការសហការណ៍រវាងប៉ុស្ដិ៍លេខ៥ និងផលិតកម្ម9 Colors Production ដែលមានការដឹកនាំផ្ទាល់ពីក្រុមកំប្លែងលោកសុវណ្ណ រិទ្ធី ហៅលោកតាវ៉ិច ទ័រ។
អ្នកនាងវ៉ាន់ នីឡា ដែលទើបសម្រាលកូនបានជាង៤ខែនោះបានឲ្យដឹងថានាងមានអារម្មណ៍រំភើបចំពោះការងារថ្មីនៅប៉ុស្ដិ៍លេខ៥”ចៅលោកតា”នេះ ហើយនាងនឹងប្រឹងឲ្យអស់ពីសម្ថភាពដើម្បីបម្រើអារម្មណ៍ទស្សនិកជន។នីឡា ក៍បានឲ្យដឹងដែរថាអាជីពកំប្លែងជាអ្វី១ដែលនាងបានស្រលាញ់បំផុត ហេតុនេះក្រោយមានកូននាងមិនចេះនៅផ្ទះទេ ព្រោះពេលបានធ្វើការងារនេះឡើងវិញនាងមានអារម្មណ៍ថាសប្បាយចិត្ត។ជាមួយគ្នានេះដែរនាងថានឹងខំពង្រឹងសម្ថភាពរបស់ខ្លួនថែមទៀតទៅតាមអ្នកដឹកនាំសម្ដែងតម្រូវការ ខណៈដែលស្វាមីនាងបានគាំទ្រ និងលើកទឹកចិត្តចំពោះការវិលវិញរបស់នាង ដោយមិនប្រចណ្ឌនិងឈុតឆាកមានស្នេហាខ្លះដែលនាងនិងដៃគូលេងលើឆាកឡើយ។
ចំណែកនាយក្រាន់ វិញថាការបានចូល”ចៅលោកតា”នៅប៉ុស្ដិ៍លេខ៥ វាជាការងារថ្មីមួយទៀតសម្រាប់រូបនាយ ហើយការសម្ដែងភាគច្រើនរបស់នាយអាចនឹងប៉ៈជាដៃគូជាមួយប្អូនស្រីវ៉ាន់ នីឡា ដែលលេងជាប្ដីប្រពន្ធ ឬគូសង្សារជាដើមហើយនាយពេញចិត្តធ្វើការជាមួយដៃគូម្នាក់នេះ និងជាមួយក្រុមកំប្លែងទាំងមូល។នាយក្រាន់អះអាងថាការចាប់អាជីពកំប្លែងមិនពិបាកនោះទេ ព្រោះការលេងឈុតឆាកទាំងអស់គឺមានអ្នកដឹកនាំសរសេរប៉ារ៉ូលឲ្យ ហេតុនេះទាំងរូបនាយ និងមិត្តរួមក្រុមមានតែចាប់ដៃគ្នា ដើម្បីប្រឹងធ្វើការឲ្យបានល្អបំផុតទៅតាមឈុតឆាកដែលអ្នកដឹកនាំរបស់9Colors Production និងប៉ុស្ដិ៍លេខ៥ ចង់បាន។
ក្រៅពីវ៉ាន់ នីឡា និងនាយក្រាន់ ក្រុមកំប្លែង”ចៅលោកតា”ក៍មានតារាកំប្លែងជាច្រើនដួងទៀតផងដែរដូចជានាយជ័រ,នាយថ្លែន ,ណាន ណាន និងស្រីមុំ ជាដើម។ដោយឡែកMc “ចៅលោកតា”វិញគឺមានពិធីការិនីស្រីស្អាតដាំ សុភ័ក្រ្តស៊ីនឌី និងលោកពូម៉ា ។
លោកជំទាវរស់ ឡុងម៉ាឡែន ប្រធានទីផ្សារ និងទំនាក់ទំនងនៃសា្ថនីយ៍ទូរទស្សន៍ប៉ុស្ដិ៍លេខ៥ បានឲ្យដឹងថា”ចៅលោកតា” ជាកម្មវិធីផ្សាយផ្ទាល់រៀងរាល់ថ្ងៃសៅរិ៍របស់ប៉ុស្ដិ៍លេខ៥ ដែលចាប់ពីថ្ងៃសៅរ៍ទី៤ កុម្ភៈ ឆ្នាំ២០២៣ នេះតទៅវេលាម៉ោង ១២ថ្ងៃត្រង់ ដល់១ ថ្ងៃ។កម្មវិធីនេះផលិតឡើងបំពេញតម្រូវការទស្សនិកជន និងជម្រុញឲ្យសិល្បៈកំប្លែងកាន់តែរីកចម្រើនទៅមុខ ធ្វើឲ្យទស្សនិកជនសើចសប្បាយរីករាយ បំបាត់ភាពតាមតឹង។លោកស្រីថាផលិតករ”ចៅលោកតា”នឹងព្យាយាមរកConcepts ល្អៗដើម្បីជាចំណីអារម្មណ៍ដល់ទស្សនិកជន។
ដោយឡែកលោកស៊ិន សណ្ដោស ផលិតករ 9 Colors Production បានឲ្យដឹងថាក្រុមការងាររបស់លោកនឹងធ្វើឲ្យទស្សនិកជនរីករាយ ព្រោះផលិតតែសាច់រឿងណាដែលមានគុណភាព បង្កប់ទៅដោយការអប់រំ ជួយដល់សង្គម។លោកថា”ចៅលោកតា”នឹងធ្វើឲ្យអាជីពកំប្លែងកាន់តែផុសផុលជាមិនខាន៕
