ភ្នំពេញ ៖ ក្រសួងព័ត៌មាន បានសម្រេចលុបអាជ្ញាប័ណ្ណមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) តាមបញ្ជានាយករដ្ឋមន្រ្តី ក្រោមហេតុផល សារព័ត៌មាន វីអូឌី (VOD) ដែលជាផ្នែកមួយនៃ CCIM បានរំលោភយ៉ាងធ្ងន់ធ្ងរលើវិជ្ជាជីវៈសារព័ត៌មាន និងធ្វើឲ្យប៉ះពាល់ដល់កិត្តិយសរាជរដ្ឋាភិបាល ហើយធ្វើការសុំទោសយឺតពេលកំហិត ។
គួររំលឹកថា កាលពីថ្ងៃទី០៩ ខែកុម្ភៈ ឆ្នាំ២០២៣ វិទ្យុវីអូឌី (VOD) បានចុះផ្សាយព័ត៌មានថា មន្ត្រីរាជរដ្ឋាភិបាលថា ការដែលលោកហ៊ុន ម៉ាណែត ដើរតួនាទីជំនួសឪពុក ក្នុងការផ្តល់ជំនួយឱ្យតួកគី មិនមែនជារឿងខុសឆ្គង។ វិទ្យុនេះបានសរសេរថា លោកហ៊ុន ម៉ាណែត បានតំណាងឱ្យសម្ដេចនាយករដ្ឋមន្ត្រី ហ៊ុន សែន ក្នុងការចុះហត្ថលេខាផ្តល់ជំនួយ ខណៈសម្ដេចហ៊ុន សែន កំពុងកាន់មរណទុក្ខចំពោះការបាត់បង់ប្អូនថ្លៃស្រី ។
ក្រោយការចុះផ្សាយនេះ សម្ដេចហ៊ុន សែន បានប្រតិកម្មយ៉ាងខ្លាំង និងបានដាក់ឱសានវាទឱ្យវិទ្យុវីអូឌី សុំទោសរាជរដ្ឋាភិបាល និងលោកហ៊ុន ម៉ាណែត ជាសាធារណៈ ក្នុងរយៈពេល ៧២ម៉ោង ដោយសម្ដេច បញ្ជាក់ថា សម្ដេច ធ្វើដូច្នេះ ដើម្បីបញ្ចប់នូវការភាន់ច្រឡំ ឬរហូតដល់ការមួលបង្កាច់ដោយចេតនាពីវិទ្យុវីអូឌី ។
សម្ដេចហ៊ុន សែន បានសរសេរនៅក្នុងទំព័របណ្ដាញសង្គម ហ្វេសប៊ុក ផ្លូវការ របស់សម្ដេច នៅថ្ងៃទី១១ ខែកុម្ភៈ ឆ្នាំ២០២៣ ថា “ដើម្បីបញ្ចប់នូវការភាន់ច្រឡំ ឬរហូតដល់ការមួលបង្កាច់ដោយចេតនា ពីវិទ្យុ VOD មិនត្រឹមតែលើហ៊ុន ម៉ាណែត ប៉ុណ្ណោះទេ តែវាជារឿងរបស់រាជរដ្ឋាភិបាល ទាំងមូល លើការគ្រប់គ្រងថវិកាជាតិ ខ្ញុំសូមចែករំលែកនូវរបៀបគ្រប់គ្រងថវិកា និយាយជារួម និងនិយាយដោយឡែកលើការផ្តល់ជំនួយចំពោះប្រទេសតួកគី។ ច្បាប់និងការអនុវត្តនៅប្រទេសយើង គឺមានតែនាយករដ្ឋមន្ត្រី ម្នាក់គត់ មានសិទ្ធិបញ្ជាចំណាយក្រោមច្បាប់ថវិកាជាតិដែលជាអគ្គបញ្ជាការកំពូល។ ឯរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ គឺជានាយអគ្គសេនាធិការសម្រាប់ដឹកនាំអនុវត្ត ឯថ្នាក់ដឹកនាំផ្សេង រាប់ទាំងឧបនាយករដ្ឋមន្ត្រី មិនមានសិទ្ធិឬមកលូកលាន់កិច្ចការនេះឡើយ លើកលែងតែការបញ្ជាចំណាយក្នុងស្ថាបន័របស់ខ្លួនដែលច្បាប់ថវិកាផ្តល់ជូន។
សម្រាប់ជំនួយទៅប្រទេសតួកគី យោបល់ទីមួយ គឺរដ្ឋមន្ត្រីការបរទេស ប្រាក់ សុខុន ព្រឹកថ្ងៃ 8 កុម្ភៈ ម៉ោង 6.56នាទី ។
បញ្ជាខ្ញុំឲ្យប្រកាស 10ម៉ឺនដុល្លារ ម៉ោង 7.12នាទី និងបញ្ជូនសំណេរទាំងពីរ ជូនឯកឧត្តម អូន ព័ន្ធមុនីរ័ត្ន ដែលគាត់ឆ្លើយទទួលអនុវត្ត នៅម៉ោង 7.18 នៅព្រឹកថ្ងៃ 8 កុម្ភៈ 2023 ដូចគ្នា។
តើការចោទលើហ៊ុន ម៉ាណែត ជាការវាយប្រហារខាងនយោបាយ ឬជាការភាន់ច្រឡំ?
ខ្ញុំទុកពេលឲ្យសូមទោសជាសាធារណៈ រយៈពេល 72ម៉ោង ដោយសុំទោសរាជរដ្ឋាភិបាលផង និងសុំទោសហ៊ុន ម៉ាណែត ផង។
ក្រសួងព័ត៌មាន ត្រូវធ្វើការជាមួយ VOD ព្រមជាមួយគ្នា ឯកឧត្តម គី តិច ប្រធានមេធាវីរាជរដ្ឋាភិបាល ត្រូវត្រៀមពាក្យបណ្តឹងទៅកាន់តុលាការ ក្នុងករណីពួកគេមិនព្រមសុំទោស។យើងមិនចង់បានអ្វីក្រៅពីភាពស្អាតស្អំនិងត្រឹមត្រូវរបស់យើងនោះឡើយ។
សូមកុំថាយើងគំរាមឱ្យសោះ (សិទ្ធិរបស់អ្នក មានព្រំដែនជាមួយសិទ្ធិរបស់អ្នកដទៃ)។
មិត្តភក្តិបរទេស ឬសង្គមស៊ីវិល មុនបញ្ចេញមតិ សូមស្រាវជ្រាវរឿងនេះជាមុនសិន ទាំងអង្គហេតុនិងអង្គច្បាប់។
ចុងក្រោយ ខ្ញុំសូមរំលឹកនូវពាក្យដាស់តឿនរបស់ខ្ញុំ សម្រាប់អ្នកសារព័ត៌មាន កាលពីថ្ងៃ 14 មករា 2023 កន្លងទៅ គឺ (អ្នកសារព័ត៌មាន កុំបំពានអ្នកដទៃ កុំបំភ្លៃការពិត)“ ។
ជាការបញ្ជាក់បន្ថែមលើសំណេរតាមហ្វេសប៊ុក ខាងលើនេះ សម្ដេចហ៊ុន សែន បានសរសេរបន្ថែម នៅថ្ងៃទី១២ ខែកុម្ភៈ ឆ្នាំ២០២៣ ថា “មុននេះបន្តិច ខ្ញុំបានឆ្លើយតបជាមួយឈ្មោះ Min Pov ទាក់ទងដល់វិទ្យុ VOD ដូចមានខ្លឹមសារជូនភ្ជាប់មកជាមួយ។ ខ្ញុំកំពុងរង់ចាំចម្លើយពីគាត់វិញ។ ពេលនេះខ្ញុំសម្រេចកាត់បន្ថយពេលវេលាសូមទោស មកនៅត្រឹម ២៤ម៉ោង គឺកំណត់ត្រឹមម៉ោង 10.00នាទីព្រឹក ថ្ងៃ១៣ កុម្ភៈ ២០២៣ វិញ។
ដើម្បីកុំឲ្យយប់យូរសុបិនច្រើន និងអន្ទង់វែងឆ្នាំងវែង ខ្ញុំបញ្ជាឲ្យក្រសួងព័ត៌មាន លុបចោលអាជ្ញាប័ណ្ណ បញ្ចប់ការផ្សាយរបស់វិទ្យុ VOD ត្រឹមម៉ោង 10.00នាទី ថ្ងៃទី១៣ កុម្ភៈ ២០២៣ ស្អែកនេះ ក្នុងករណីដែលពួកគេមិនបានធ្វើការសូមទោស។
ដំបៅមិនឈឺ កុំយកឈើចាក់។ បើគង់តែពួកគេចោទថា ខ្ញុំប្រើអំណាច ខ្ញុំត្រូវតែប្រើអំណាចនេះ ដើម្បីបំពេញបំណងរបស់ពួកគេ។
ស្អែកនេះ ឯកឧត្តមប៊ិន ឈិន នឹងត្រូវធ្វើជានាយករដ្ឋមន្ត្រីស្តីទី ត្រូវធ្វើកិច្ចការនេះឲ្យបាន ព្រោះទាំងខ្ញុំ សម្តេច ស ខេង ទៀ បាញ់ លោកជំទាវម៉ែន សំអន នឹងទស្សនកិច្ចនៅឡាវ ជាមួយគ្នា“ ។
នៅថ្ងៃទី១២ ខែកុម្ភៈ ឆ្នាំ២០២៣ ដដែល នៅពេលបានឃើញសម្ដេចហ៊ុន សែន បានសរសេរបញ្ជាក់ដាក់ឱសានវាទបែបនេះ នាយិកាស្តីទី នៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ អ្នកស្រី ឆន សុគន្ធា បានសរសេរលិខិតមួយច្បាប់ គោរពជូនសម្ដេចនាយករដ្ឋមន្រ្តី ហ៊ុន សែន ។ ប៉ុន្តែនៅក្នុងលិខិតនោះ អ្នកស្រី ឆន សុគន្ធា មិនបានជម្រាបពីការសុំទោសទេ គឺគ្រាន់តែសរសេរដោយស្រង់ប្រសាសន៍ដើមរបស់អ្នកនាំពាក្យរាជរដ្ឋាភិបាល លោក ផៃ ស៊ីផាន ដែលបានប្រាប់អ្នកសារព័ត៌មានរបស់វីអូឌី ក្នុងន័យដើមថា ដោយសារសម្ដេចហ៊ុន សែន ជាប់រវល់ លោក «ក៏បានទុកការហ្នឹង ផ្តល់ជូនទៅ» លោកហ៊ុន ម៉ាណែត ដែលទទួលបន្ទុកខាងអន្តរាគមន៍នៃសកម្មភាពមនុស្សធម៌អន្តរជាតិ។ លិខិតដដែល បញ្ជាក់ជំហរថា វីអូឌី តែងតែប្រកាន់ខ្ជាប់នូវគោលការណ៍ក្រមសីលធម៌វិជ្ជាជីវៈសារព័ត៌មាន និងថា វីអូឌី សូមសម្តែងការសោកស្តាយ និងសូមអធ្យាស្រ័យ ប្រសិនបើមានកំហុសឆ្គងណាមួយដោយអចេតនាដែលកើតឡើងទៅលើលោកហ៊ុន សែន និងលោកហ៊ុន ម៉ាណែត ។
អ្នកស្រី ឆន សុគន្ធា ពន្យល់ថា ឆ្លើយតបនឹងករណីនេះ វីអូឌី បានរៀបចំចេញអត្ថបទថ្មីមួយដោយយោងលើព័ត៌មាន និងការស្រាយបំភ្លឺរបស់សម្ដេចហ៊ុន សែន និងលោកហ៊ុន ម៉ាណែត។
ជាការឆ្លើយតប ក្នុងន័យមិនពេញចិត្តនឹងលិខិតខាងលើនេះ សម្ដេចហ៊ុន សែន បានបញ្ជាក់ថា សម្ដេច មិនអាចទទួលយកលិខិតរបស់ស្ថាប័នសារព័ត៌មានវីអូឌី ផ្ញើជូនសម្ដេច ដោយប្រើត្រឹមពាក្យសូមអធ្យាស្រ័យ និងសម្ដែងការសោកស្ដាយ ជំនួសឱ្យការសូមទោសនេះទេ ព្រោះអ្វីដែលសម្តេច ចង់បាន គឺការសូមទោសជាសាធារណៈ។ ដូច្នេះសម្ដេច បញ្ជាឲ្យក្រសួងព័ត៌មាន លុបចោលអាជ្ញាប័ណ្ណវិទ្យុវីអូឌី (VOD) ចាប់ពីពេលនេះតទៅ និងត្រូវបញ្ចប់ការផ្សាយនៅត្រឹមម៉ោង 10.00នាទី ថ្ងៃ១៣ ខែកុម្ភៈ ឆ្នាំ២០២៣ ជាកំហិត ។ ជាមួយនេះ សម្ដេច ក៏បានប្រាប់ទៅលោក ផៃ ស៊ីផាន ដែលជាប្រធានអង្គភាពអ្នកនាំពាក្យរដ្ឋាភិបាល ឱ្យពិនិត្យលទ្ធភាពប្តឹងវិទ្យុនេះ ទៅតុលាការផងដែរ ។
សម្ដេចហ៊ុន សែន បានសរសេរនៅក្នុងទំព័រហ្វេសប៊ុក ផ្លូវការ របស់សម្ដេច នៅថ្ងៃទី១២ ខែកុម្ភៈ ឆ្នាំ២០២៣ ថា “តើការប្រើពាក្យសោកស្តាយ និងសូមអធ្យាស្រ័យ វាជំនួសឲ្យពាក្យសុំទោស បានដែរឬទេ? សម្រាប់ខ្ញុំ មិនអាចទទួលយកបានឡើយ។
តើការបកស្រាយបំភ្លឺនៅទីនេះ មានចេតនាទម្លាក់កំហុសឲ្យមន្ត្រីរាជរដ្ឋាភិបាល មែនទេ? ទុកជូនឯកឧត្តមផៃ ស៊ីផាន ពិនិត្យលទ្ធភាពប្តឹងទៅតុលាការ។
ខ្ញុំកាន់តំណែងក្នុងរដ្ឋ រយៈពេលជាង ៤៤ឆ្នាំហើយ ក្នុងនោះតំណែងនាយករដ្ឋមន្ត្រី រយៈពេលជាង៣៨ឆ្នាំ ខ្ញុំពិតជាយល់ដឹងល្មមគ្រប់គ្រាន់នូវពាក្យពេចន៍ដែលត្រូវបានប្រើ រាប់ទាំងពាក្យសម្ដីវាគ្មិនមួយចំនួនដែលចូលមកសម្ភាសក្នុងរឿងផ្លូវច្បាប់ ទាក់ទងដល់ការផ្តល់ជំនួយដល់ប្រទេសកួកគី ដែលវាគ្មិនខ្លះព្យាយាមវាយទាំងឪ វាយទាំងកូន ដែលកូននោះគឺហ៊ុន ម៉ាណែត ដែលគាត់ពុំបានដឹងរឿងអ្វីសោះ។ តើនេះឬជាវិជ្ជាជីវៈដែលអស់លោកចង់ផ្សាយដោយអចេតនានោះ?
ដើម្បីកុំឲ្យវែងឆ្ងាយ ខ្ញុំសម្រេចមិនទទួលយកការសម្ដែងការសោកស្តាយនិងសូមការអធ្យាស្រ័យ ជំនួសឲ្យការសុំទោសរបស់អស់លោកដែលជាសេចក្តីថ្លៃថ្នូរនិងកិត្តិយសរបស់អស់លោកនោះឡើយ ។
ក្នុងនាមរាជរដ្ឋាភិបាល ដែលត្រូវការពារកិត្តិយសរបស់ខ្លួន ខ្ញុំសម្រេចបញ្ចប់រឿងនេះ ដោយឲ្យក្រសួងព័ត៌មាន លុបចោលអាជ្ញាប័ណ្ណវិទ្យុវីអូឌី(VOD) ចាប់ពីពេលនេះតទៅ និងត្រូវបញ្ចប់ការផ្សាយ នៅត្រឹមម៉ោង 10.00នាទី ថ្ងៃ១៣ កុម្ភៈ ២០២៣ ជាកំហិត។
សូមសាលារាជធានីភ្នំពេញ និងស្ថាប័នពាក់ពន្ធ័ ជួយការពារសណ្តាប់ធ្នាប់និងទ្រព្យសម្បត្តិនៃវិទ្យុនេះ ឲ្យបានគង់វង្ស។យើងបិទតែការផ្សាយគ្រប់ប្រភេទនៃវិទ្យុនេះប៉ុណ្ណោះ តែយើងមិនប៉ះពាល់ទ្រព្យសម្បត្តិរបស់គេទេ។
សូមមិត្តភក្តិបរទេសដែលផ្តល់លុយឲ្យវិទ្យុនេះ បង្វិលលុយទៅប្រទេសវិញ ឬជួយទៅប្រទេសផ្សេង។សូមបុគ្គលិកដែលធ្វើការនៅវិទ្យុនេះ ស្វែងរកការងារធ្វើនៅកន្លែងផ្សេងទៀត“ ។
គោរពតាមបញ្ជារបស់សម្ដេចនាយករដ្ឋមន្រ្តី ហ៊ុន សែន ខាងលើនេះ លោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានចេញប្រកាស ចុះថ្ងៃទី១៣ ខែកុម្ភៈ ឆ្នាំ២០២៣ សម្រេចលុបអាជ្ញាប័ណ្ឌមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ដែលអាសយដ្ឋានទីស្នាក់ការនៅផ្ទះលេខ១៤ ផ្លូវលេខ៣៩២ ភូមិ៩ សង្កាត់បឹងកេងកងទី១ ខណ្ឌចម្ការមន រាជធានីភ្នំពេញ ធ្វើសកម្មភាពការងារលើវិស័យព័ត៌មាន និងសោតទស្សន៍ នៅក្នុងព្រះរាជាណាចក្រកម្ពុជា ដោយបញ្ជាក់ថា អង្គភាពសារព័ត៌មាននេះ បានរំលោភយ៉ាងធ្ងន់ធ្ងរលើវិជ្ជាជីវៈសារព័ត៌មាន ធ្វើឱ្យប៉ះពាល់ដល់កិត្តិយស និងកិត្យានុភាពរបស់រាជរដ្ឋាភិបាលកម្ពុជា ហើយមិនព្រមធ្វើការកែសម្រួលតាមបទប្បញ្ញត្តិច្បាប់ស្តីពីរបបសារព័ត៌មាន ។
ក្រៅពីបានចេញប្រកាស លោករដ្ឋមន្រ្តីខៀវ កាញារីទ្ធ ក៏បានបញ្ជាក់នៅក្នុងគណនីបណ្ដាញសង្គមហ្វេសប៊ុក របស់លោក នៅថ្ងៃទី១២ ខែកុម្ភៈ ឆ្នាំ២០២៣ ថា ដំណាក់ចុងក្រោយដែលធ្វើឲ្យទឹកហៀរចេញពីធុង មិនដឹងអ្នកណាជាអ្នកឲ្យយយោបល់ VOD តែមានតែស្ថានទូតទេដែលប្រឹងចៀសមិនប្រើពាក្យ «សូមទោស» ។ លោកថា ស្ថាប័នកាសែត ប្រើភាសាទូត ទោះចង់ជួយ ក៏ពិតជាយ៉ាប់ហើយ តែក៏ជាមេរៀនដល់ស្ថាប័នផ្សព្វផ្សាយព័ត៌មានឯទៀតដែរ។ ជាពិសេសស្ថាប័នដែលមិនព្រមចុះការបំភ្លឺរបស់គេ អាចប្រឈមនឹងការដកអាជ្ញាប័ណ្ណដូចគ្នា ។
ចំណែកមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ក្រោយពេលមានការបញ្ជាពីសម្ដេចនាយករដ្ឋមន្រ្តី ហ៊ុន សែន និងមុនពេលក្រសួងព័ត៌មាន ចេញប្រកាសលុបអាជ្ញាប័ណ្ណ VOD នោះ អ្នកស្រី ឆន សុគន្ធា នាយិកាស្ដីទីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានសរសេរលិខិតដាច់ដោយឡែកមួយទៀត ទាំងយប់ ជូនសម្ដេចហ៊ុន សែន ។
លិខិតវិទ្យុ VOD ចុះថ្ងៃទី១២ ខែកុម្ភៈ ឆ្នាំ២០២៣ មានខ្លឹមសារថា «វីអូឌី ពិតជាមានការសោកស្តាយជាពន់ពេក ចំពោះការផ្សព្វផ្សាយព័ត៌មានរបស់វីអូឌី ដែលបានធ្វើឱ្យប៉ះពាល់ដល់កិត្តិយសរបស់ឯកឧត្តម ហ៊ុន ម៉ាណែត និងរាជរដ្ឋាភិបាល ដែលមានសម្តេច ជាប្រមុខដឹកនាំ ។ វីអូឌី សូមទោសសម្តេច ផ្ទាល់ ក៏ដូចជាឯកឧត្តមបណ្ឌិត ហ៊ុន ម៉ាណែត ចំពោះការផ្សាយអត្ថបទព័ត៌មាននោះ។ សូមសម្តេចនាយករដ្ឋមន្ត្រី មេត្តាទទួលនូវការគោរពដ៏ខ្ពង់ខ្ពស់ពីយើងខ្ញុំ» ។
ការសរសេរលិខិតទាំងយប់ របស់វីអូឌី នោះ សង្ឃឹមថា នឹងមានការឆ្លើយតបជាវិជ្ជមាន ឬព្រមទទួលយកសុំទោសរបស់ខ្លួន ពីសម្ដេចនាយករដ្ឋមន្រ្តី ហ៊ុន សែន ។ ប៉ុន្តែផ្ទុយពីការរំពឹងទុក សម្ដេចហ៊ុន សែន បានរក្សាជំហរដើមថា មិនផ្លាស់ប្តូរការសម្រេចចិត្តបិទចោលវិទ្យុវីអូឌី នោះឡើយ ហើយថាទាល់តែត្រូវមួយកំផ្លៀង ទើបភ្ញាក់ខ្លួនមកសុំទោស តែវាយឺតពេលហើយ ព្រោះល្ងាច មិនសូមទោស បែរជាមកសូមទោស ក្រោយម៉ោង១២អធ្រាត្រទៅវិញ ។
សម្ដេចហ៊ុន សែន បានសរសេរនៅក្នុងទំព័រហ្វេសប៊ុក ផ្លូវការរបស់សម្ដេច នៅថ្ងៃទី១៣ ខែកុម្ភៈ ឆ្នាំ២០២៣ ថា “យើងពិតជាមិនមែនកូនក្មេងបៀមដៃនោះឡើយ។ ហេតុអ្វីមិនសូមទោសពីល្ងាច និងមកសូមទោសពេលយប់ជ្រៅ ក្រោយម៉ោង ១២យប់ទៅវិញ។ តើឈឺណាស់ទៅឬ ក្រោយត្រូវមួយកំផ្លៀង? មុនត្រូវមួយកំផ្លៀង គិតណាស់រឿងកិត្តិយស សូម្បីពាក្យសូមទោស មួយម៉ាត់ មិនហ៊ាននិយាយផង តែក្រោយត្រូវមួយកំផ្លៀង បែរជាភ្លេចអស់កិត្តិយស មកសូមទោសជាងពាក់កណ្តាលអធ្រាត្រទៅវិញ។ ខ្ញុំហ៊ុន សែន នាយករដ្ឋមន្ត្រី នៃកម្ពុជា មិនផ្លាស់ប្តូរការសម្រេចចិត្តបិទចោលវិទ្យុវីអូឌី នោះឡើយ។
ស្ថាបន័មានសមត្ថកិច្ច ត្រូវអនុវត្តភារកិច្ចដូចដែលបានប្រគល់ កាលពីល្ងាចថ្ងៃ១២ កុម្ភៈ២០២៣ ដោយគ្មានការកែប្រែ។
សម្រាប់បងប្អូនដែលបាត់បង់ការងារ ត្រូវបន្ទោសមេដឹកនាំបងប្អូន ឬប្រទេសម្ចាស់លុយ ដែលកសាងកំហុសតាំងពីការផ្សាយព័ត៌មានមូលបង្កាច់ រហូតដល់ល្ងង់ មិនចេះទទួលខុសត្រូវលើការសូមទោស ធ្វើឲ្យបងប្អូនបាត់បង់ការងារធ្វើ“ ។
បន្ទាប់ពីត្រូវបានបិទការផ្សាយ តាមប្រកាសរបស់ក្រសួងព័ត៌មាន នៅព្រឹកថ្ងៃទី១៣ ទី១២ ខែកុម្ភៈ ឆ្នាំ២០២៣ មានអ្នកសារព័ត៌មានជាច្រើន បានចុះថតផ្ដិតយករូបភាពទិដ្ឋភាពនៅក្នុងការិយាល័យធ្វើការរបស់វីអូឌី ស្របពេលមានសមត្ថកិច្ចចុះទៅពិនិត្យការអនុវត្តប្រកាសរបស់ក្រសួងព័ត៌មានផងដែរ ដោយនៅការិយាល័យ មានសភាពស្ងប់ស្ងាត់ បុគ្គលិកវីអូឌី ទាំងអស់ត្រូវសម្រាក អស់ការងារ ក៏បានប្រកាសលាមហាជន អ្នកតាមដានព័ត៌មានទាំងអាល័យ ។ រហូតដល់មានបុគ្គលិកខ្លះ ស្រកទឹកភ្នែកដើម្បីសុំការសន្ដោសប្រណីពីសម្ដេចនាយករដ្ឋមន្រ្តី ។
អ្នកស្រីលឹម ធីតា បុគ្គលិកម្នាក់របស់វីអូឌី បានសរសេរនៅក្នុងគណនីបណ្ដាញសង្គម ហ្វេសប៊ុក របស់អ្នកស្រី នៅព្រឹកថ្ងៃទី១៣ ទី១២ ខែកុម្ភៈ ឆ្នាំ២០២៣ ថា “ក្នុងនាមជាបុគ្គលិកផ្នែកផលិតកម្មវិធីរបស់ VOD ជាង១០ឆ្នាំ និងបានចូលបម្រើការងារក្នុងអាជីពនេះ ២០ឆ្នាំកន្លងមក នាងខ្ញុំសូមថ្លែងអំណរអរគុណដល់វាគ្មិនគ្រប់រូប និងបងប្អូនពលរដ្ឋទាំងអស់ ដែលបានចូលរួម និងគាំទ្រកិច្ចការងាររបស់ពួកយើង។ នាងខ្ញុំគ្មានពាក្យអ្វីក្រៅពីសូមជូនពរលោកអ្នកជួបតែសំណាងល្អ លាទាំងក្ដីអាល័យ»៕ កុលបុត្រ