ភ្នំពេញ៖មុននេះពេជ្រ សោភា មិនហ៊ាននិយាយទេថាតើនាងនៅតែជាCoach របស់កម្មវិធីប្រលងចម្រៀងThe Voice Cambodia នារដូវកាលទី៣ ទៀតឬយ៉ាងណា ព្រោះមិនទាន់មានការជូនដំណឹងពីថ្នាក់ដឹកនាំហង្សមាស ខណៈដែលរយៈពេលចុងក្រោយនេះថៅកែផលិតកម្មនេះបានផ្លាស់ប្ដូរCoach និងJudge រួមទាំងMC របស់កម្មវិធីប្រលងចម្រៀងរបស់លោកជាបន្ដបន្ទាប់ដែលធ្វើឲ្យគ្រូបង្វឹក និងគណៈកម្មារមួយចំនួនប្រឈមបាត់បង់កៅអីរបស់ខ្លួន។ប៉ុន្ដែកាលពីថ្ងៃទី១៤ កុម្ភៈ ពេជ្រ សោភា បានបង្ហាញស្នាមញញឹមឡើងវិញ ព្រោះនៅទីបំផុតតំណែងរបស់នាងត្រូវបានថៅកែធានាសុវត្ថិភាព១០០% តែម្ដងនារដូវកាលថ្មីនេះ ខណៈដែលCoach ៣រូបផ្សេងទៀតរួមមានលោកណុប បាយ៉ារិទ្ធ ,ឆន សុវណ្ណារាជ និងឱក សុគន្ធកញ្ញា ក៍មិនមានការដកចេញម្នាក់ណាមួយដាក់ជំនួសដោយអ្នកថ្មីដែរ។
សម្រាប់សោភា នៅរដូវកាលនេះនាងមានការតុបតែងខ្លួនប្លែកជាងឆ្នាំមុនៗ ប៉ុន្ដែក្ដីសុបិន របស់តារាវ័យ៤០ឆ្នាំរូបនេះថាតើអាចនឹងនាំកូនក្រុមរបស់ខ្លួនលើកពានបានដូចបំណងឬអត់នោះនៅតែមិនទាន់អាចមើលដឹង ស្របពេលដែលកម្មវិធីខាងលើតំណើរការបាន២រដូវកាលកន្លងមកគឺមានតែលោកឆន សុវណ្ណារាជ នាំកូនក្រុមរបស់ខ្លួនលោកប៊ុត សីហា លើកពានរដូវកាលទី១ និងឱក សុគន្ធកញ្ញា ជួយលោកថែល ថៃ ឈ្នះពាននារដូវកាលទី២ តែសោភា និងលោកបាយ៉ារិទ្ធ មិនទាន់អាចនាំកូនក្រុមលើកពានដូចគ្នា។ក្រៅពីចេញមុខរ៉ាប់រងកៅអីជាCoach របស់ខ្លួនThe Voice Cambodia រដូវកាលទី៣ នោះ សោភា ក៍មានតំណែងធំ១ទៀតនោះគឺជាគណៈកម្មាការBeat The Best រដូវកាលទី១ ផងដែរ ដែលមានន័យថាថៅកែលែងមើលរំលងនាងទៀតហើយ បើទោះជាការក្ដាប់បានកៅអី២ព្រមគ្នារបស់នាងមិនអាចប្រៀបធៀបជាមួយឱក សុគន្ធកញ្ញា ដែលចេញមុខធ្វើជាCoach និងJudge ស្ទើតែគ្រប់កម្មវិធីប្រលងចម្រៀងធំៗរបស់ហង្សមាសក្ដី។
អ្នកជំនាញសិល្បៈបានលើកឡើងថាពេជ្រ សោភា ដែលបង្ហាញភក្ដីភាពចំពោះហង្សមាសតាមរយៈការមិនចាកចេញពីផលិតកម្មធំនេះកាលពីចុងឆ្នាំ២០២០ ក្រោយមានព័តមានថាGalaxy ចង់ទិញនាងដើម្បីឲ្យទៅចាប់ដៃជាមួយលោកព្រាប សុវត្តិ តែសោភា ស៊ូក្រាញនៅហង្សមាស ព្រោះ”ឆ្នាំងចាស់បាយឆ្ងាញ់”នោះ គេជឿរថាថៅកែផលិតកម្មនេះនឹងមិនដកនាងចេញពីបណ្ដារកម្មវិធីណាដែលនាងកំពុងអង្គុយឡើយ ផ្ទុយទៅវិញមានតែបន្ថែមតួនាទីស្រដៀងនេះបន្ថែមទៀតជាមិនខានដើម្បីកុំឲ្យនាងរើរបង្វេចចេញទៅតាមលោកឧកញ៉ាព្រាប សុវត្ថិ ។ការលើកតម្លៃសោភា ពីសំណាក់ថៅកែក៍មិនខុសដែរព្រោះនាងច្រៀងនៅហង្សមាសរយៈពេល២៣ឆ្នាំ(២០០៥-២០២៣)ទៅហើយ ដែលអាចនិយាយបានថានាងមានបទពិសោធន៍និងជំនាញច្រៀងគ្រប់គ្រាន់ដើម្បីផ្ដល់ឲ្យយុវវ័យស្រលាញ់សិល្បៈនាជំនាន់ក្រោយបន្ដវេន។តែរឿងថានាងមានទិចនិកក្នុងការយកបានកូនក្រុមល្អៗមកបង្វឹកឲ្យពួកគេសង្ឃឹមឈ្នះពាននារដូវកាលទី៣ នេះបានឬអត់នោះគឺមានតែទស្សនិកជនទេអាចវាយតម្លៃសម្ថភាពជាគ្រូបង្វឹករូបនេះបាន។
សូមបញ្ជាក់ថាពេជ្រ សោភា អាយុ៤០ឆ្នាំ បានទុកជីវីតរស់នៅជាស្រី្ដមេម៉ាយរយៈពេលជិត៦ឆ្នាំ ក្រោយនាងចែកផ្លូវអតីតស្វាមីអាណិកជនខ្មែរមកពីអាមេរិកកាលពីឆ្នាំ២០១៦ ហើយទើបតែនៅថ្ងៃទី១១ខែ១១ ឆ្នាំ២០២២ សោភា បានបង្ហាញពិធីភ្ជាប់ពាក្យជាមួយលោកឆឹម សក្កដា ជាចំហ ដើម្បីបន្សាបពាក្យចរចាមអារ៉ាមថារូបនាងនិងលោកសក្កដា សាងស្នេហា”ក្លែងក្លាយ” ។សោភា ប្រាប់ថានាងនឹងដឹកដៃប្រុសកំពូលស្នេហ៍រូបនេះចូលរោងការនៅឆ្នាំ២០២៣ នេះហើយ ប៉ុន្ដែថ្ងៃខែណា នាងក្រាបផ្ទឹមនោះអ្នកមេម៉ាយរូបនេះថានាងមិនចង់ប្រាប់ឲ្យគេដឹងមុន។
គេកត់សម្គាល់ថាតាំងពីសោភា ចាប់ដៃប្រុសក្មេងលោកសក្កដា ជាង៣ខែមកនេះ នាងហាក់មានយីអ៊ុនល្អជាងមុន ព្រោះបានធ្វើBA ក្រុមហ៊ុនធំៗជាបន្ដបន្ទាប់ ខណៈតារាចម្រៀងថោនរូបនោះបានសម្របខ្លួននិងផ្គាប់ចិត្តនាងគ្រប់បែបយ៉ាងទាំងអស់ចំពោះអនាគតភរិយាលោកដូចជាពេលខ្លះសោភា វិលពីការច្រៀងសម្ដែងកណ្ដាលអាទ្រាធលោកចំហុយសំបុកត្រចៀកកាំឲ្យនាងញាំប៉ូវកំលាំងមិនចាំបាច់ដល់ថ្ងៃរះទៀតផង។សកម្មភាពបែបនេះធ្វើឲ្យសោភា សែនពេញចិត្តសក្កដា ស្ដូកតែម្ដង ប៉ុន្ដែគេរងចាំមើលថាពួកគេពិតជារៀបការជាមួយគ្នាមែន ឬមួយក៍នាងចង់លេងល្ខោនស្នេហ៍ដើម្បីសណ្ដោងលោកសក្កដា ឲ្យល្បី?