អាមេរិក៖អ្នកនាងអម្ពរ ទេវី នឹងហោះមកខ្មែរសារជាថ្មីនៅខែតុលាឆ្នាំ២០២៣ ខាងមុខនេះដើម្បីថតសម្ដែងភាពយន្ដភាគនិពន្ធ និងដឹកនាំដោយឯកឧត្តមហ្វៃ សំអាង នោះគឺរឿង”អប្សារា មហាអង្គរ”ដែលប្រើពេលថតដល់ទៅ១ឆ្នាំកន្លះ និងមាន៥០ភាគ។ការមកខ្មែរម្ដងទៀតរបស់អតីតតារាសម្ដែងទសវត្សន៍៨០ និង៩០ រូបនេះអ្នកនាងនឹងបានជួបដៃគូចាស់របស់ខ្លួនសារជាថ្មីម្ដងទៀតនោះគឺលោកទេព រិនដារ៉ូ និងមិត្តរួមអាជីពម្នាក់ទៀតដែលបែកគ្នាជាមួយនាងអស់រយៈពេលជាង២០ឆ្នាំមកហើយនោះគឺអ្នកនាងនារីរ័ត្ន គន្ធា ផងដែរ។
ឯកឧត្តមហ្វៃ សំអាង បានប្រាប់អ្នកយកព័តមានយើងតាមទូរស័ព្ទកាលពីរសៀលថ្ងៃទី២៨ កុម្ភៈ ថាអ្នកនាងអម្ពរ ទេវី នឹងមកដល់ខ្មែរនៅខែតុលា ឆ្នាំ២០២៣ ខាងមុខនេះហើយ ព្រោះនៅពេលនោះប្លង់ដែលនាងត្រូវលេងនឹងមកដល់។លោកសំអាង បន្ថែមថាបច្ចុប្បន្នរឿង”អប្សារា មហាអង្គរ”កំពុងថតតាមលំដាប់លំដោយសាច់រឿងហើយនៅពេលចូលដល់ខែ១០ ទើបត្រូវដល់វេនអ្នកនាងអម្ពរ ទេវី ថតហើយប្លង់របស់គាត់ត្រូវថតមានសរុបប្រើពេលដល់ទៅជាង១ខែទើបចប់។
នេះជាការបង្ហាញស្នាដៃឡើងវិញថ្មីមួយទៀតរបស់អ្នកនាងអម្ពរ ទេវី ខណៈដែលកាលពីឆ្នាំ២០១៧ តារាជើងចាស់វ័យជាង៥០ឆ្នាំរូបនេះធ្លាប់មកខ្មែរថតរឿង”ទឹកចិត្តម្ដាយសម័យថ្មី” របស់អ្នកស្រីពាន់ ភួងបុប្ផា និងផលិតកម្មLD រឿង”ឆន្ទា” ផងដែរ។យ៉ាងណាមិនទាន់មានព័តមានច្បាស់ការថាអ្នកនាងទេវី នឹងស៊ីថ្លៃប៉ុន្មានចំពោះការសម្ដែងរឿង”អប្សារា មហាអង្គរ”នេះទេ ខណៈដែលការមកថតរឿងមុននេះអតីតស្វាមីនាងលោកពេជ្រ ភិរុណ ធ្លាប់បានប្រាប់អ្នកយកព័តមានយើងថាអ្នកនាងទេវី ទទួលបានតម្លៃ១ម៉ឺនដុល្លារពីការថតរឿង១ហើយក្នុងនោះតម្លៃសំបុត្រយន្ដហោះទៅមក និងការស្នាក់នៅសណ្ឋាគារគឺជាបន្ទុករបស់ផលិតករទាំងអស់។
អ្នកយកព័តមានយើងបានទូរស័ព្ទទៅលោកពេជ្រ ភិរុណ កាលពីពេលថ្មីៗនេះតែទូរស័ព្ទចូលជាច្រើនដងគ្មានអ្នកទទួលឡើយ ទើបមិនអាចសួររឿងអ្នកនាងទេវី មកថតភាពយន្ដថ្មីលើកនេះថាតើលោកភិរុណ នៅតែជាអ្នករ៉ាប់រងការរៀបចំសម្លៀកបំពាក់ជូនអតីតភរិយាលោកដូចលើកមុនៗទៀតឬយ៉ាងណាឡើយ។ប៉ុន្ដែតាមព័តមានថាការប្រើពេលជាង១ខែសម្រាប់អ្នកនាងទេវី ក្នុងការថតរឿង”អប្សារា មហាអង្គរ”នោះគឺត្រូវថតសម្រុកយកប្លង់នាងឲ្យឆាប់ចប់តែម្ដង ដើម្បីឲ្យនាងឆាប់បានវិលទៅអាមេរិកវិញ។
លោកហ្វៃ សំអាង ថាជាការពិតពេលអ្នកនាងអម្ពរ ទេវី មកដល់ខ្មែរគឺប្លង់គាត់ពិតជាត្រូវថតសម្រុកយកមែនដែលប្រើពេលជាង១ខែទើបចប់។យ៉ាងណាលោកសំអាង ថាទោះជាសម្រុកយ៉ាងណាក៍ត្រូវធ្វើទៅតាមលំដាប់លំដោយនៃផ្ទៃរឿងទាំងមូលតែម្ដង។
គូររំលឹកថាអ្នកនាងអម្ពរ ទេវី បានរៀបការជាមួយលោកពេជ្រ ភិរុណ កាលពីខែតុលា ឆ្នាំ១៩៩២ និងបានចែកផ្លូវគ្នា ក្រោយទទួលបានកូន២(ស្រី១)ហើយអ្នកនាងបានចេញទៅរស់នៅអាមេរិករៀបការស្វាមីថ្ងៃទី២៨ ធ្នូ ២០១៤ និងមានកូនស្រី១ទៀតជាមួយស្វាមីថ្មី។បច្ចុប្បន្នទំនាក់ទំនងរវាងអ្នកនាងអម្ពរ ទេវី និងលោកភិរុណ គឺដូចជាបងប្អូនតែជាទូទៅអ្នកនាងទេវី បានហៅលោកភិរុណ ថាជាប៉ាៗទៅវិញ ។អ្វីដែលចម្លែកលោកពេជ្រ ភិរុណ ក្រោយពីបែកបាក់អ្នកនាងទេវី អតីតតារាសម្ដែងវ័យ៦៨ឆ្នាំ រូបនេះមិនយកភរិយាថ្មីនោះទេហើយរឿងដែលមនុស្សប្រុសភាគច្រើនមិនអាចធ្វើបាននោះគឺទោះជាអស់និស្ស័យជាប្ដីប្រពន្ធគ្នាមែន តែលោកនៅតែទៅទទួលនិងជូនបាច់ផ្កាដល់អ្នកនាងទេវី ដល់ព្រលានយន្ដហោះរៀងរាល់ពេលនាងមកខ្មែរ។
លោកពេជ្រ ភិរុណ ធ្លាប់ប្រាប់អ្នកយកព័តមានយើងថាលោកហ៊ានលះបង់គ្រប់បែបយ៉ាងដើម្បីឲ្យតែកូនប្រុសស្រីរបស់លោកមានអនាគតល្អ។ប៉ុន្ដែការមកខ្មែរជើងនេះរបស់អ្នកនាងទេវី គេមិនទាន់ដឹងច្បាស់ថាអតតីស្វាមីនាងយកចិត្តទុកដាក់ដូចលើកមុនៗទៀតឬយ៉ាងណានោះទេ៕