ភ្នំពេញ៖ដួង វីរៈសិទ្ធ ដែលជាតារាប្រុសឈានមុខគេនៅរាម នោះបានប្រាប់”នគរធំ”កាលពីរសៀលថ្ងៃទី៧ មីនា ថាលោកនៅតែច្រៀងឲ្យផលិតកម្មរាម ជាបន្ដទៅទៀត តែចំនួនកុងត្រានៅប៉ុន្មានឆ្នាំលោកមិនអាចនិយាយបានឡើយ។ការអះអាងរបស់លោកវីរៈសិទ្ធ នាពេលនេះក្រោយពីដៃគូពិសេសរបស់លោកវីរៈសិទ្ធ គឺមាស សុខសោភា បានចាកចេញពីរាម ទៅហើយ បន្ទាប់ពីផ្ញើរខ្លួននៅទ្រនុំនេះបានត្រឹមតែ២ឆ្នាំប៉ុណ្ណោះ។
លោកដួង វីរៈសិទ្ធ ថ្លែងថាលោកនឹងត្រៀមចេញបទចម្រៀងថ្មីៗជាបន្ដបន្ទាប់ទៀតនៅរាម មិនមានគម្រោងផ្លាស់ប្ដូរផលិតកម្មនៅឆ្នាំ២០២៣ នេះទេ។ប៉ុន្ដែលោកវីរៈសិទ្ធ ថាអំឡុងពេលលោកចូលរាម ដំបូងនោះលោកក៍បានប្រាប់ទៅថ្នាក់ដឹកនាំផលិតកម្មនេះហើយថាលោកមកធ្វើការ និងជួយការងារនៅរាម បានប៉ុណ្ណាយកប៉ុណ្ណឹង ពោលគឺមិនជាប់មានល័ក្ខខណ្ឌតឹងរឹងនោះទេ។អតីតតារាចម្រៀងហង្សមាសរូបនេះក៍បានឲ្យដឹងថាការឈជើងនៅរាម ២ឆ្នាំនេះលោកធ្លាប់និពន្ធឲ្យមាស សុខសោភា ច្រៀងបាន២បទគឺបទ”ខូចចិត្តច្រើនដង”និងបទ”ឆ្នេអនុស្សា” តែលោកនិងរៀមច្បងរូបនេះក៍ធ្លាប់ច្រៀងឆ្លងឆ្លើយគ្នានូវបទចម្រៀងមួយចំនួនទៀតជាដែលនិពន្ធដោយក្រុមការងាររាម ផងដែរ។លោកវីរៈសិទ្ធ ថាក្រោយមាស សុខសោភា ចាកចេញលោកនៅតែអាចចាប់ដៃគូជាមួយតារាស្រីម្នាក់ណាផ្សេងទៀតរបស់រាម ក៍បានដែរ ពោលគឺឲ្យតែផលិតកម្មតម្រូវ ព្រោះលោកមិនប្រកាន់ដៃគូនោះទេ ប៉ុន្ដែជាទូទៅលោកថាបទចម្រៀងរបស់លោកគឺមានតែទោលច្រើនជាងច្រៀងជាដៃគូតាំងពីនៅផលិតកម្មចាស់ដល់រាម នេះ។
ដួង វីរៈសិទ្ធ ធ្លាប់ច្រៀងឆ្លងឆ្លើយជាមួយមាស សុខសោភា នៅរាម មានដូចជាបទ”បុស្បា ម្ចាស់ស្នេហ៍”,”ព្រួយខ្លាចបាត់បង”និងបទ”ច្រវាដងខ្លី”ជាដើមដែលទស្សនិកជនភាគច្រើនចូលចិត្តស្ដាប់ព្រោះតារាទាំង២មានសម្លេងស៊ីគ្នាទោះជាសោភា អាយុបងវីរៈសិទ្ធ ដល់ទៅជាង១០ឆ្នាំក្ដី ប៉ុន្ដែអ្នកជំនាញសិល្បៈលោកនូ ស៊ឹប ធ្លាប់បានលើកឡើងថាបញ្ហាអាយុខុសគ្នាមិនមែនជាឧបស័ក្កសម្រាប់ការច្រៀងជាដៃគូគ្នាឡើយ ព្រោះថាកន្លងមកលោកព្រាប សុវត្ថិ អាយុប្អូនហ៊ឹម ស៊ីវន ជាច្រើនឆ្នាំតែតារាទាំងពីរធ្លាប់ចាប់ដៃគ្នាជោគជ័យបទចម្រៀងជាច្រើនមកហើយ។ដោយឡែកសម្រាប់លោកវីរៈសិទ្ធ ការចាកចេញពីហង្សមាសចូលរាម ជាង២ឆ្នាំនេះលោកបានឲ្យដឹងថាពេលនេះអ្វីដែលប្លែកគឺលោកទទួលបានតម្លៃខ្លួនច្រៀងConcerts ថ្លៃខ្ពស់ជាងមុនទ្វេដងឯណ្ណោះ តែលោកមិនប្រាប់ថាច្រៀងម្ដងបានប៉ុន្មាននោះនោះទេ។
ដួង វីរៈសិទ្ធ អះអាងថា”នៅរដូវក្ដៅនេះខ្ញុំចេញច្រៀងតាមConcerts នៅតាមខេត្ត និងច្រៀងកម្មវិធីគេនៅភ្នំពេញសឹងរាល់ថ្ងៃ។និយាយទៅប្រាក់ចំណូលខ្ពស់ជាងមុនតាំងពីខ្ញុំចូលរាម នេះ”។
ដួង វីរៈសិទ្ធ ជាអតីតតារាចម្រៀងផលិតកម្មមហាហង្ស,Pleng Record (ហង្សមាស) ហើយចុងក្រោយមកទើរនៅរាម នេះតែម្ដង ដែលលោកម្នាក់អាចធ្វើជាតារាចម្រៀងផង,និពន្ធទំនុកច្រៀង និងMelody រួមទាំងMix ផងដែលតារាផ្សេងៗពិបាកធ្វើបានដូច។យ៉ាងណាការបាត់ដៃគូសំខាន់គឺមាស សុខសោភា នាពេលនេះអ្នកខ្លះហ៊ានព្យាករណ៍ថាលោកវីរៈសិទ្ធ នឹងអាចចាកចេញពីរាម នាពេលខាងមុខដែរជាមិនខាន ព្រោះលោកខ្វះដៃគូដ៍សាកសម ប្រសិនបើរាម មិនទិញតារាស្រីល្បីរូបណាទៅចាប់ដៃជាមួយលោក ប្រាកដជាធ្វើឲ្យអ្នកលេងហ្គីតារូបនេះប្រឈមធ្លាក់កូដក៍ថាបាន។
លោកដួង វីរៈសិទ្ធ បន្ថែមថារូបលោកមិនដែលបារម្ភខ្លាចប្ដូរផលិតកម្ម ឬគ្មានដៃគូច្រៀងអាចធ្លាក់កូដនោះទេ ព្រោះលោកយល់ថាតាំងពីលោកក្លាយទៅជាអ្នកចម្រៀងមកភាគច្រើនគឺលោកច្រៀងបទនិពន្ធដោយខ្លួនឯង ច្រៀងទោលច្រើនជាងដៃគូ ហេតុនេះលោកនិយាយដោយជំនឿរថាទោះជាលោកទៅដល់ទីណា ក៍នៅតែប៉ុណ្ណឹងដែរ។
គូរបញ្ជាក់ថាដួង វីរៈសិទ្ធ ម្ចាស់ពានI Am A Singer Cambodia រដូវកាលទី១មានបងប្អូនប្រុស៣នាក់គឺសុទ្ធតែជាតារាចម្រៀងដូចគ្នាក្នុងនោះគឺទី១៖លោកម៉ម សំនៀង ជាកូនច្បង ទី២៖រូបលោផ្ទាល់,ម៉ម វាសនា ហៅដួង វីរៈសិទ្ធ និងទី៣៖លោកម៉ម ពេជ្ជរិទ្ធ ៕