ភ្នំពេញ៖ថ្មីៗនេះពេជ្រ សោភា បានចេញសារសរសើរលោកឆន សុវណ្ណារាជ ចំៗនិងថែមទាំងបន្ទាបខ្លួនថានាងអាចរឹងមាំ និង ល្បីល្បាញឡើងវិញដោយសារតែបុរសរោមទ្រូងច្រើនរូបនេះព្រមធ្វើដៃគូនាងកាលពីឆ្នាំ២០០៩ អំឡុងពេលដែលនាងធ្លាក់កូដខ្លាំងនោះទៀតផង។Fan តារាវ័យ៤០ឆ្នាំរូបនេះបានភ្ញាក់ផ្អើល និងថាសោភា ជារៀមច្បងនិងល្បីល្បាញមុនឆន សុវណ្ណារាជ តែនាងមិនខ្លាចអន់ឬប៉ៈពាល់ដល់កេរ្តិ៍ឈ្មោះខ្លួនទេ គឺបែជាមកលើកលោកសុវណ្ណារាជ ដោយចេញពីបេះដូងតែម្ដង តាមរយៈការសារភាពថារយៈពេល១៤ឆ្នាំមុននោះតារាស្រីដែលធ្លាក់ដូចនាង ពិបាករកដៃគូណាស់ តែលោករាជ ដែលកំពុងតែឡើងកូដ បែជាស្ម័គ្រចិត្តចាប់ដៃជាមួយនាងដោយគ្មានការរារែកនិងថែមទាំងហ៊ានព្យាករណ៍ថានាងនឹងល្បីដូចមុនទៀតផង។តារាដែលជ្រកកោនក្រោមដំបូលហង្សមាសអស់រយៈពេល១៨ឆ្នាំ(២០០៥-២០២៣)នោះថ្លែងថាពេលនេះនាងអាចធ្វើបានហើយ (ល្បីឡើងវិញ)និងអរគុណដល់អតីតតារាU2 លោកសុវណ្ណារាជ ។
តាមរយៈការទទួលស្គាល់ការពិតនិងមិនខ្លាចការបន្ទាបខ្លួននោះពេជ្រ សោភា ជាគំរូល្អមួយក្នុងសិល្បៈព្រោះនាងមិនភ្លេចអ្នកដែលបានជួយនាងក្នុងគ្រាដ៍លំបាក។ប៉ុន្ដែមជ្ឈដ្ឋានមហាជនមើលឃើញថាក្រៅពីលោកឆន សុវណ្ណារាជ តារាចម្រៀងដែលជាដៃគូដ៍សាកសមបំផុតរបស់សោភា ហើយធ្វើឲ្យនាងឡើងកូដឡើងវិញតាមរយៈការច្រៀងរ៉េបរង្គើរឆាកតន្រ្ដីទាំងឡាយនោះគឺនៅពេលដែលនាងចាប់ដៃជាមួយលោកងួន ចាន់ដេវីត តែពេលនេះសោភា មិនបានរំលឹកដល់អតីតដៃគូម្នាក់នេះឡើយ ខណៈដែលត្រង់ចំណុចនេះគេអាចយល់បានថាដោយសារតែនាងជាអ្នកជួយជ្រោមជ្រែងឲ្យលោកដេវីត ចូលហង្សមាស ហេតុនេះហើយពេលស្វាមីរបស់ទេព បូព្រឹក្ស រូបនេះល្បីល្បាញគូរតែនៅចាំឈ្មោះរបស់នាង ជាជាងនាងត្រូវអរគុណ។
ប៉ុន្ដែក្នុងបទសម្ភាន៍កន្លងមកដេវីត ក៍ទទួលស្គាល់ថាលោកមានថ្ងៃនេះក៍ដោយសារតែចំណុចផ្ដើមនៅហង្សមាសដែរ ពោលគឺមានន័យស្មើនឹងទទួលស្គាល់ថាគឺពេជ្រ សោភា ជាអ្នកត្រួសត្រាយផ្លូវឲ្យលោកដើរលើវិថីនេះ។តែពេជ្រ សោភា នាងមិនដែលនិយាយថាបានជួយដល់ដេវីត នោះទេ ដោយកន្លងមកនាងអះអាងថាងួន ចាន់ដេវីត មានសម្ថភាព គ្រាន់តែមុនស្គាល់នាងរូបគេខ្វះទីតាំងឈជើងនិងបង្ហាញទេពកោសល្យ ហេតុនេះនាងពិតជាបានយកខ្លួនទៅធានាឲ្យចូលហង្សមាសមែនយកដេវីតមែន ប៉ុន្ដែដេវីត គេល្បីដោយសារសម្ថភាពផ្ទាល់ខ្លួនរបស់គេមិនមែននាងជួយទេ។
ក្រៅពីមិនភ្លេចគុណសិស្សប្អូនលោកឆន សុវណ្ណារាជ នោះពេជ្រ សោភា កន្លងមកនាងក៍តែងតែដាក់ខ្លួនជាទម្លាប់របស់នាងទៅហើយដែលនាងថានាងបានតោងកាលីពពីលោកឧកញ៉ាព្រាប សុវត្ថិ ច្រើនណាស់ អំឡុងពេលច្រៀងនៅហង្សមាសជាមួយគ្នា ហើយពេលលោកស្នាយ ចាកចេញពីហង្សមាសនាង ក៍ធ្លាប់បង្ហាញអារម្មណ៍សោកស្ដាយផងដែរ ព្រោះនាងចាត់ទុកថាលោកសុវត្ថិ ជាតារាជើងខ្លាំង ច្បាស់លាស់ ចេញ១បទដឹង១បទ…។តែសោភា ខ្លួនឯងដែលធ្លាប់មានព័តមានថាGalaxy ចង់ទិញនាងដែរដើម្បីឲ្យនាងចាប់ដៃគូជាមួយលោកព្រាប សុវត្ថិ កាលពីខែកញ្ញា ឆ្នាំ២០២០ នោះបែជាចុងក្រោយនាងសម្រេចចិត្តបន្ដច្រៀងឲ្យហង្សមាសតទៅទៀតវិញ បើទោះជាតាំងពីបែកពីដៃគូលោកងួន ចាន់ដេវីត និងព្រាប សុវត្ថិ មករហូតមកដល់ពេលនេះនាងមិនទាន់អាចរកបានដៃគូណាដ៍សាកសមបំផុតដូចមុនក្ដី។
គូរបញ្ជាក់ថាពេជ្រ សោភា បានទុកជីវិតជាស្រ្ដីម៉ាយអស់រយៈពេល៦ឆ្នាំ ក្រោយនាងចែកផ្លូវជាមួយអតីតប្ដីអាណិកជនខ្មែរមកពីអាមេរិកកាលពីឆ្នាំ២០១៦ ហើយទើបតែនៅថ្ងៃទី១១ ខែ១១ ឆ្នាំ២០២២ ទើបនាងព្រមភ្ជាប់ពាក្យជាមួយលោកឆឹម សក្កដា ដើម្បីបញ្ចប់មន្ទិលស្នេហ៍”ក្លែងក្លាយ”។អ្វីដែលហាក់ច្របូលច្របល់ក្រោយសោភា-សក្កដា ក្លាយទៅជាគូដណ្ដឹងគ្នាជាង៤ខែនេះពួកគេបែជាខ្វែងគំនិតគ្នារឿងរៀបការទៅវិញព្រោះសោភា ថាចង់រៀបការនៅឆ្នាំ២០២៣ តែលោកសក្កដា ថាឆ្នាំនេះអត់មានផែនការណ៍រៀបការទេ ។ចំណែកដំណឹងថាសោភា នឹងរៀបការឲ្យផ្អើលមេឃហៅភ្ញៀវរាប់រយតុនោះ លោកសក្កដា បែជាថារឿងនោះមិនពិតហើយបើលោកនិងនាងរៀបការជាមួយគ្នាមែនគឺធ្វើមិនឲ្យលើសពី១០តុទេ។តាមរយៈមតិពួកគេផ្ទុយបែបនេះធ្វើឲ្យFan ទាំងសងខាងបារម្ភខ្លាចតែចំណងស្នេហាសោភា និងគូដណ្ដឹងមានការប្រែប្រួល ព្រោះភស្ដុតាងខាងលើបញ្ជាក់ថាគូស្នេហ៍តារា១គូនេះមិនទាន់ចិត្ត១ ថ្លើម១ និងគ្នាឡើយ៕
