ភ្នំពេញ៖អ្នកជំនាញសិល្បៈលោកនូ ស៊ឹប ធ្លាប់អះអាងថារឿងអាយុមិនមែនជាបញ្ហាសម្រាប់តារាក្នុងការកំណត់ថាល្បីតទៅទៀត ឬត្រូវធ្លាក់ចុះនោះទេ ព្រោះជាក់ស្ដែងដូចជារូបលោកអាយុជាង៧០ឆ្នាំទៅហើយនៅតែអាចបន្ដអាជីព១នេះបានតទៅទៀតប៉ុន្ដែលោកថាបញ្ហាចោទនោះគឺនៅលើសុខភាព បើយើងចេះថែទាំសុខភាពឲ្យបានល្អគឺអ្វីៗគ្មានបញ្ហាឡើយ។ដោយឡែកលោកហួ ឡាវី វិញ ក៍ធ្លាប់អះអាងដែរថាតារាចម្រៀងសម្លែងខ្លាំង និងល្អយ៉ាងណាក៍ដោយ តែបើមិនចេះថែទាំងសុខភាពរបស់ខ្លួនទេ គង់តែសម្លេងនោះធ្លាក់ចុះវិញទេ។
សម្រាប់ឆ្នាំ២០២៣ នេះគេកត់សម្គាល់ថាមានតារាស្រីល្បីឈ្មោះដល់ទៅ៣ដួងដែលជួបផលវិបាកក្នុងការបន្ដអាជីពរបស់ពួកគេឲ្យខ្លាំងក្លាថែមទៀត ប៉ុន្ដែតារាទាំងនោះនៅតែមិនរាថយ ពីអាជីពចាស់ដែលម្នាក់ៗបានតស៊ូជាង១០ឆ្នាំមកហើយនោះទេ។
១៖មាស សុខសោភាៈ តារាចម្រៀងសំនៀងផ្អែមរូបនេះបានចាកចេញពីរាម កាលពីពេលថ្មីៗនេះ បន្ទាប់ពីនាងបានផ្ញើរខ្លួននៅផលិតកម្មថ្មីនេះរយៈពេល២ឆ្នាំ។ជុំវិញការមិនបន្ដច្រៀងឆ្នាំទី៣ ឲ្យរាម នេះមានព័តមានថាដោយសារតែសុខសោភា មិនបានសម្រេចផែនការណ៍វាយលុកទីផ្សារចម្រៀងនៅឆ្នាំ២០២២ តាមការរៀបគម្រោងរបស់នាង ទើបនាងវិលទៅធ្វើចម្រៀងនៅផលិតកម្មផ្ទាល់ខ្លួនCamtrax ដែលគ្រប់គ្រងដោយស្វាមីនាងលោកអ៊ឹត រ៉ាដា វិញ។យ៉ាងណាតាមព័តមានថាក្រៅពីហេតុផលខាងលើសោភា ក៍មានបញ្ហាសុខភាពផ្ទាល់ខ្លួនផងដែរ នោះគឺនាងមានជំងឺផ្នែកបំពង់ក ទើបធ្វើឲ្យមានផលរំខានខ្លះៗដល់ការប្រើប្រាស់សម្លេង។ មហាជនរងចាំមើលថាការច្រៀងនៅផលិតកម្មផ្ទាល់ខ្លួននឹងធ្វើឲ្យសុខសោភា ល្បីថែមទៀត ឬក៍បន្ដនៅទ្រឹង?
២៖សួស វីសាៈតារាកូន១រូបនេះបានចេញចូលទៅពេទ្យថៃជាញឹកញាប់ដើម្បីព្យាបាលជំងឺរលាកបំពង់កធ្ងន់ធ្ងរបស់ខ្លួនដែលជាដើមហេតុធ្វើឲ្យនាងអាកខានឡើងឆាកដល់ទៅជាង១ឆ្នាំ។គ្រូពេទ្យបានផ្ដាំវីសា ថាហាមនាងប្រើប្រាស់សម្លេងមុនពេលជំងឺនាងបានជាសះស្បើយដូចដើម ប៉ុន្ដែក្នុងនាមជាអ្នកចម្រៀងបើមិនឲ្យប្រើសម្លេងប្រៀបដូចចុងភៅ មិនឲ្យកាន់កាំបិត ឬអ្នកនិពន្ធហាមប្រើប៊ិច នោះទើបវីសា សម្រេចិត្តវិលមកឡើងច្រៀងរាំវិញកាលពីខែវិច្ឆិកា ឆ្នាំ២០២២ ហើយពេលនេះជំងឺនាងនាងហាក់បានធូស្រាលឡើងវិញ និងមិនមានការណាត់ជួបពេទ្យថៃ ទៀតនោះទេ។អ្វីដែលគូរឲ្យតក់សម្គាល់នោះមកលើកនេះវីសា ថែមទាំងនាំប្ដីនាងលោកថមមី ឡើងច្រៀងជាញឹកញាប់ជាមួយគ្នាទៀតផង។
៣៖វី ឌីណែតៈកូនក្រមុំលោកហួ ឡាវី រូបនេះមានជំងឺពកក ដែលតម្រូវឲ្យលេបថ្នាំអស់១ជីវិតតែម្ដង។ឌីណែត ធ្លាប់ប្រកាសកាលពីដើមឆ្នាំ២០២០ ថានាងចង់បញ្ចប់អាជីពសិល្បៈ ដោយពេលនោះមានការសន្និដ្ឋានថាមកពីនាងរងការខកចិត្តរឿងច្រៀងនៅហង្សមាសមិនសូវលេចធ្លោ ដូចការរំពឹងទុក ហើយនៅឆ្នាំ២០២១ ជំងឺនាងកាន់តែធ្វើទុក្ខខ្លាំងថែមទៀត ហើយនាងបានប្រាប់ថាវាបានរងផលប៉ៈពាល់យ៉ាងខ្លាំង ក្នុងការប្រើប្រាស់សម្លេងរបស់នាង។ប៉ុន្ដែពេលនេះគេឃើញឌីណែត នៅតែបន្ដអាជីពចម្រៀងជាមួយផលិតកម្មរស្មីហង្សមាសដដែល ពោលគឺនាងច្រៀងផង លេបថ្នាំផង៕
