ព្រៃវែង ៖ ត្រីគល់រាំង ចំនួន ៤ក្បាល ដែលមានទម្ងន់សរុប ៦៨គីឡូក្រាម ដែលអ្នកនេសាទបាននេសាទបាន ត្រូវបានដោះលែងឲ្យរួចរស់ជីវិតវិញ ដោយអ្នកនេសាទ បានប្រគល់ត្រីគល់រាំង ធំៗ ទាំង៤ក្បាល ជូនដល់គម្រោងអច្ឆរិយមេគង្គ (Wonders of the Mekong project) ដើម្បីធ្វើការអភិរក្ស លែងចូលក្នុងទឹកធម្មជាតិវិញ។
តាមប្រភពគម្រោងអច្ឆរិយមេគង្គ បានឲ្យដឹងនៅថ្ងៃទី១៦ ខែមីនាឆ្នាំ២០២៣ ថា អ្នកនេសាទឧស្សាហកម្មដាយត្រី នៅគន្លងទី៤ដេ បានបរិច្ឆាគត្រីគល់រាំង ចំនួន ៤ក្បាល ដល់គម្រោងកាលពីថ្ងៃទី០៩ ខែមីនា ឆ្នាំ២០២៣ កន្លងទៅ។ ត្រីគល់រាំងទាំង ៤ក្បាលនោះ មានទម្ងន់ខុសៗគ្នា រួមមាន ទម្ងន់ ១៥គីឡូក្រាម ចំនួនពីរក្បាល ទម្ងន់ ១៧គីឡូក្រាម ចំនួន ១ក្បាល និងទម្ងន់ ២១គីឡូក្រាម ចំនួន១ក្បាល (សរុប ៦៨គីឡូក្រាម) ។
ប្រភពដដែល បន្តថា ដោយសារបច្ចុប្បន្ននេះ គឺជារដូវទឹកសម្រក មិនអាចលែងភ្លាមៗ បាន គម្រោងអច្ឆរិយមេគង្គ បានសហការជាមួយវិទ្យាស្ថានស្រាវជ្រាវនិងអភិវឌ្ឍន៍ជលផលទឹកសាប និងមជ្ឈមណ្ឌលស្រាវជ្រាវនិងអភិវឌ្ឍន៍វារីវប្បកម្មទឹកសាប របស់រដ្ឋបាលជលផល បានដឹកជញ្ជូនត្រីគល់រាំង ទាំងបួនក្បាលនេះ ទៅថែបំប៉ននៅក្នុងស្រះ នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាប ស្ថិតនៅក្នុងឃុំពាមរក៍ ស្រុកពាមរក៍ ខេត្តព្រៃវែង។
ប្រភពដដែល បន្តទៀតថា ត្រីគល់រាំង ទាំង៤ក្បាលនេះ នឹងត្រូវលែងចូលទៅក្នុងទឹកធម្មជាតិវិញ នាពេលសមស្រប ក្នុងរដូវទឹកឡើង នាឆ្នាំក្រោយ។
លោកនេត្រ ភក្ត្រា រដ្ឋលេខាធិការ និងជាមន្ត្រីនាំពាក្យក្រសួងបរិស្ថាន បានថ្លែងថា លោកសូមចូលរួមអបអរសាទរ និងសូមអរគុណបងប្អូនប្រជានេសាទ ដែលបានយល់ដឹងខ្ពស់ពីប្រភេទត្រីដែលងាយរងគ្រោះផុតពូជ និងបានប្រគល់ជូនមន្ត្រីជំនាញ ដើម្បីបន្ស៊ាំនិងលែងចូលជម្រកធម្មជាតិវិញ។ ការចូលរួមពីបងប្អូនប្រជាពលរដ្ឋទាំងអស់គ្នា ពិតជាមានភាពចាំបាច់ដើម្បីភាពគង់វង្សនៃធនធានមច្ឆជាតិ៕ ខៀវទុំ