ភ្នំពេញ៖ខៀវ សុខារ៉ាវី បានចេញទៅរស់នៅអាមេរិកតាមគូស្នេហ៍ថ្មីហើយបានរៀបការតាមបែបគ្រីស្ទានកាលពីចុង ខែតុលា ឆ្នាំ២០១៨ នឹងគ្រោងមករៀបការនៅខ្មែរនៅចុងឆ្នាំដដែល តែត្រូវបានលើកពេលទៅវិញរហូតមកដល់ បច្ចុប្បន្ន។បើគិតមកដល់ពេលនេះសុខារ៉ាវី បានឃ្លាតឆ្ងាយពីអាជីពសិល្បៈរយៈពេលជាង៥ឆ្នាំទៅហើយ តែនាង រស់នៅយ៉ាងមានសុភមង្គលជាមួយម្ចាស់ចិត្តថ្មីនៅរដ្ឋកាលីហ្វ័រញ៉ា សហរដ្ឋអាមេរិក នឹងមិនទាន់កំណត់ពេលវេលាជាក់លាក់់ក្នុងការនាំស្វាមីមកលេងនៅខ្មែរឡើយ។
ថ្វីត្បិតតែខៀវ សុខារ៉ាវី បានទៅរស់នៅអាមេរិកមែន ប៉ុន្ដែគេកត់សម្គាល់ថាអាជីវកម្មរបស់នាងដែលបានបើកជា ច្រើនឆ្នាំមកហើយគឺហាងសួគ័ អមរា ម៉ាស្សា និងស្បា ដែលមានទីតាំងនៅផ្ទះ១៦៥ E0 ផ្លូវស៊ីសុវត្ថិ សង្កាត់ ផ្សារ កណ្ដាល ខណ្ឌដូនពេញ រាជធានីភ្នំពេញ នោះនៅតែតំណើរការជាធម្មតា ហើយម្ដាយនាងលោកស្រីនិន រ៉ាត់ ជាអ្នកគ្រប់គ្រងជំនួសកូនស្រី។
ម្ដាយខៀវ សុខារ៉ាវី បានប្រាប់អ្នកយកព័តមានយើងថារ៉ាវី បានទាក់ទងជាប្រចាំមកលោកស្រី ហើយនាងនៅអា មេរិកសុខសប្បាយជាមួយប្ដីតែអត់ទាន់មានកូនទៀតទេ។លោកស្រីនិន រ៉ាត់ ថាកាលសុខារ៉ាវី នៅខ្មែរនាងបាន រៀនគ្រប់គ្រងហាងម៉ាស្សា និងស្បា នេះយ៉ាងស្ទាត់ជំនាញដែលពេលនោះបានបើកហាងដល់ទៅ ៣ទីតាំងផ្សេងគ្នា តែពេលនាងទៅអាមេរិកសព្វថ្ងៃនៅតំណើរការហាងប្រភេទនេះតែ១ទេគឺ បើកនៅផ្ទះផ្ទាល់ខ្លួន ដែល កែប្រែពីហាងMart មកជាហាងម៉ាស្សា និងស្បា វិញព្រោះថាកាលបើកហាងផ្សារទំនើបខ្នាតតូចនោះលោកស្រីហត់នឿយខ្លាំងពេកក្នុងការគ្រប់គ្រង តែឥឡូវបើកហាងម៉ាស្សា និងស្បា នោះអត់សូវនឿយហត់ច្រើនដូចមុនទេ ហើយរ៉ាវី ពេញចិត្តឲ្យបើកហាងនេះងាយស្រួលមើលខុសត្រូវ។
លោកស្រីនិន រ៉ាត់ បន្ថែមថាការបើកហាងនេះមិនចំណាយអស់ថវិការច្រើនពេកនោះទេ ព្រោះផ្ទះខ្លួនឯង កែច្នៃ រៀបចំ និងទិញសម្ភារៈចូល ខណៈនៅផ្នែក២ជាន់ខាងលើលោកស្រីដាក់ជួលឲ្យជនជាតិបរទេស ។ម្ដាយរ៉ាវី ថាក្រោយកូវីដថមថយ នេះហាងលោកស្រីតំណើរការល្អ ហើយលោកស្រីហាក់ដូចជាទម្លាប់ទៅហើយដែលកូន ស្រី៤នាក់ទៅរស់នៅអាមេរិក និងម្នាក់ទៀតនៅបារាំង អីចឹងពេលមានបុណ្យទាននៅខ្មែរអត់សូវបានជួបជុំកូន ៗដូចគេ តែនៅខ្មែរលោកស្រីនៅជាមួយកូនប្រុសពៅ ហើយចំពោះមូលហេតុដែលលោកស្រីមិនបានចេញទៅ រស់នៅជាមួយកូនៗនៅអាមេរិកព្រោះតែមិនចេះរស់នៅស្រុកគេនោះទេគឺចង់នៅតែស្រុកកំណើតខ្លួនឯងជារៀងរហូត។
ម្ដាយខៀវ សុខារ៉ាវី ក៍បានឲ្យដឹងដែរថាពេលនេះរ៉ាវី កំពុងតែប្រឹងរៀនភាសារអង់គ្លេស និងជំនាញការបើកអា ជីវកម្មផ្ទាល់ខ្លួនមួយ ហើយនៅពេលដែលនាងរៀនចប់ចេះស្ទាត់ហើយ នឹងវិលត្រឡប់មករកស៊ីនៅខ្មែរនាពេល អានាគតវិញ។ប៉ុន្ដែលោកស្រីនិន រ៉ាត់ ថារយៈពេលជាង៥ឆ្នាំលើទឹកដីអាមេរិកនេះសុខរ៉ាវី មិនដែលចេញទៅ ច្រៀងសម្ដែងនៅតាមកម្មវិធីសិល្បៈណាមួយនៅទីនោះឡើយគឺនាងនៅតែផ្ទះ ប្រឹងតែរៀនជំនាញ និងភាសារ បរទេសប៉ុណ្ណោះ។
គូររំលឹកថាខៀវ សុខារ៉ាវី បានខកខានមង្គលការជាមួយលោកស៊ុក សុភា កាលពីថ្ងៃទី១ ខែធ្នូ ឆ្នាំ២០១៨ ប៉ុន្ដែនាង មានកូនប្រុស១ មុនចេញទៅអាមេរិក។ស្វាមីថ្មីរបស់រ៉ាវី ស្រលាញ់នាងដោយស្មោះ និងមិនប្រកាន់រឿងអតីត កាល របស់នាងឡើយ ហើយពួកគេនៅតែរក្សារគម្រោងមករៀបការតាមប្រពៃណីខ្មែរនៅពេលវេលាសមស្រប ខាងមុខនេះ។ក្រៅពីខៀវ សុខារ៉ាវី តារាដែលយកស្វាមីជាបុរសអាណិកជននៅអាមេរិកមានដូចជាអ្នកនាងអម្ពរ ទេវី,គឹម លក្ខិណា ,វ៉េត រតនា និងសារ៉ាយ សក្ខណា ជាដើម៕
