ភ្នំពេញ៖ពេជ្រ សោភា និងប៉ាច គីមមួយ ធ្លាប់ជាអ្នកមេម៉ាយជ្រកនៅហង្សមាសដូចគ្នា តែពេលនេះពួកគេរកបានអនាគតស្វាមីជាប្រុសក្មេងនិងតារាព្រមគ្នាដែរ ខណៈដែលទាំងសោភា និងគីមមួយ ធ្លាប់មានផែនការណ៍ចង់រៀបការជាលើកទី២នៅឆ្នាំ២០២៣ ដូចគ្នាទៀត។ប៉ុន្ដែនៅពេលដែលកៀកដល់ថ្ងៃការទៅហើយបែជាសោភា -គីមមួយ មិនច្បាស់លាស់ពីគម្រោងគ្រងឈុតកូនក្រមុំជាថ្មីនេះទៅវិញ។
ពេជ្រ សោភា៖បានប្រើជីវិតជាស្រ្ដីមេម៉ាយដល់ទៅជាង៦ឆ្នាំឯណ្ណោះទើបព្រមប្រគល់បេះដូងទៅឲ្យប្រុសក្មេងឆឹម សក្កដា តាមរយៈការភ្ជាប់ពាក្យជាមួយគ្នាកាលពីថ្ងៃទី១១ ខែ១១ ឆ្នាំ២០២២ ហើយសោភា ប្រាប់ថានាងនឹងរៀបការជាមួយបណ្ដូលចិត្តនៅឆ្នាំ២០២៣ ។តែនៅពេលសាកសួរពីរឿងរៀបការឲ្យច្បាស់លាស់សោភា កាលពីពេលថ្មីៗនេះបែជាថាសុខភាពនាងមិនអំណោយផល មិនអាចនិយាយរឿងរៀបអាពាហ៍ ពិពាហ៍នេះបានទេ ខណៈដែលលោកសក្កដា វិញបែជានិយាយច្បាស់ៗថានៅឆ្នាំ២០២៣ នេះលោកនិងអូនសោភា អត់មានគម្រោងរៀបការនោះទេ។ការអះអាងរបស់អនាគតស្វាមីសោភា បែបនេះហាក់ធ្វើឲ្យមានភាពច្របូកច្របល់ ហើយគេអាចវាយតម្លៃបានថាពួកគេមិនទាន់ឯកភាពគ្នារឿងរៀបការនេះឡើយ ពោលគឺក្វែងគំនិតគ្នាតែម្ដង។អ្វីដែលគូរឲ្យភ្ញាក់ផ្អើលគូដណ្ដឹងសោភា ថែមទាំងថាបើមានមង្គលការមែនគឺធ្វើតូចតាចទេហើយហៅភ្ញៀវយ៉ាងច្រើនត្រឹមតែ១០តុប៉ុណ្ណោះ ហើយដោយសារតែសោភា កាន់គ្រីស្ទាន ចំណែកកលោកកាន់សាសនាព្រះពុទ្ធទើបពិធីនោះមានរៀបចំបញ្ចូលគ្នាតាមបែបគ្រីស្ទផង ព្រះពុទ្ធផង។ប្រភពបានឲ្យដឹងថាសោភា នៅតែចង់រៀបការនៅឆ្នាំ២០២៣ នេះហើយនាងបានត្រៀមឈ្មោះភ្ញៀវសម្រាប់ហៅរួចហើយ និងចង់ធ្វើធំដុំ តែលោកសក្កដា បែជាថាឆ្នាំនេះមិនអាចធ្វើទៅបាន និងចង់ធ្វើតូចតាចទៅវិញ ទើបនាំឲ្យមង្គលការរបស់ពួកគេត្រូវជាប់គាំងស្ញេញ។
ប៉ាច គីមមួយ៖ តារាសាច់សខ្ចីដូចបណ្ដូលចេកនាងប៉ាច គីមមួយ បានប្រើជីវិតមេម៉ាយជាច្រើឆ្នាំ ក្រោយនាងចែកផ្លូវជាមួយអតីតគូស្នេហ៍ជាតារាចម្រៀងម្នាក់។នាងគីមមួយ មានជម្រើសស្នេហ៍ច្រើន ព្រោះនាងត្រូវបានគេចាត់ទុកថាជាស្រីស្អាតម្នាក់តែទីបំផុតនាងបានជ្រើសគូស្នេហ៍”ជួញជិត ប្រសើជាងជួញឆ្ងាយ” តាមរយៈការភ្ជាប់ស្នេហ៍ថ្មីជាតារាដូចគ្នាម្ដងទៀតនោះគឺប្រុសក្មេងលោកសយ រតនៈ ដែលមានអាយុប្អូននាង។នាងគីមមួយ បានភ្ជាប់ពាក្យជាមួយលោករតនៈ កាលពីថ្ងៃទី១ ខែ៧ ឆ្នាំ២០២២ ហើយនាងធ្លាប់វាចាថាអាចរៀបការនៅឆ្នាំ២០២៣ តែមិនប្រាប់ពីថ្ងៃខែ ឲ្យដឹងមុនទេ ព្រោះនាងចង់ឲ្យFan របស់នាងSurprise ។យ៉ាងណាក្នុងជំនួបជាមួយលោករតនៈ កាលពីពេលថ្មីតារារូបនេះបានអះអាងហាក់ស្រដៀងគ្នាទៅនិងលោកសក្កដា ដែរថាមង្គលការលោកជាមួយអូនគីមមួយ មិនអាចរៀបចំនៅឆ្នាំនេះបានទេ ។ប៉ុន្ដែអនាគតស្វាមីនាងគីមមួយ រូបនេះថាមង្គលការរវាងលោកនិងគូដណ្ដឹងគឺមិនឲ្យលើសពីឆ្នាំ២០២៤ ឡើយ។
ថ្វីត្បិតតែពេជ្រ សោភា និងប៉ាច គីមមួយ ពន្យាពេលរៀបការនៅឆ្នាំ២០២៣ នេះព្រមគ្នាក៍ដោយ ប៉ុន្ដែចំណុចខុសគ្នាគឺសោភា ក្រោយក្លាយទៅជាគូណ្ដឹងលោកសកក្កដា ជាង៤ខែនេះនាងថារូបនាងគេងនៅផ្ទះនាង ចំណែកសក្កដា គេងនៅផ្ទះគេ មិនមែនរស់ក្រោមដំបូលផ្ទះតែ១នោះទេ ព្រោះនាងថាអត់អាចឆ្វេចឆ្វាចបានឡើយ ខ្លាចម៉ាក់ដឹងម៉ាក់វ៉ៃ។ចំណែកនាងគីមមួយ វិញគេដឹងថានាងនិងលោករតនៈ រស់នៅផ្ទះល្វែងទ្រនុំស្នេហ៍ដែលពួកគបានទិញរំលស់រួមគ្នានៅម្ដុំស្ពានដែកចំការដូងនោះ ខណ្ឌមានជ័យនោះយ៉ាងមានក្ដីសុខ ហើយគូស្នេហ៍នេះសាកសមគ្នាខ្លាំងទើបFan ជម្រុញឲ្យពួកគេឆាប់ចូលរោងការព្រោះខ្លាចមានអ្នកតាមជ្រែកស្នេហ៍។
គូរបញ្ជាក់ថាក្រោយពេជ្រ សោភា និងប៉ាចគីមួយ រកបានគូស្នេហ៍ថ្មីព្រមគ្នានោះ ពេលនេះនៅហង្សមាសមានតារា២ដួងទៀតធ្លាក់ខ្លួនមេម៉ាយ នឹងមិនទាន់មានដំណឹងចូលរោងការនោះគឺសុខ ស្រីនាង និងពេជ្រ សូលីកា ៕