ភ្នំពេញ៖ស្រីស្រស់តន់ ច័ន្ទសីម៉ា ដែលធ្លាប់ត្រូវបានគេសង្ស័យថានាងមានលោកឧកញ៉ាពោះម៉ាយម្នាក់តាមស្នេហាយ៉ាងប្រកិតបំផុតតែនាងបែជាថ្ងូរថារកតែសង្សារ១គ្រាប់ធ្វើថ្នាំមិនបាន ហើយអត់អ្នកជឿរនោះ អតីតអ្នកស្មូតលេខ១មកពីខេត្តតាកែវរូបនេះអាចនឹងស្រាលខ្លួនរឿងគេតាមដានស្នេហារបស់នាងជាមួយបុរសនោះជាមិនខាន ព្រោះថាឧកញ៉ាដែលតារាជាច្រើនបានស្គាល់នោះថ្មីៗនេះលោកបានបង្ហាញមុខគូស្នេហ៍ជាជាចំហ ដែលមិនមែនជានាងសីម៉ា ហើយពួកគេគ្រោងដឹកដៃគ្នាចូលរោងការទៀតផង។នេះជាដំណឹងល្អមួយរបស់នាងតន់ ច័ន្ទសីម៉ា ព្រោះនាងលែងត្រូវបានគេម៉ៃថាអាចនឹងក្លាយទៅជាជំទាវរបស់លោកឧកញ៉ាពោះម៉ាយនោះទៀតហើយ និងគេជឿរថាបុរសដែលចង់សារភាពស្នេហានាងប្រាកដជាលែងរារែកចិត្តព្រោះខ្លាចនារីតូចតន់រូបនេះមានម្ចាស់ចិត្ត ពោលគឺអាចសុំស្នេហ៍នាងបានគ្រប់ពេល។
ប៉ុន្ដែបញ្ហា នៅត្រង់ថាប្រុសភាគច្រើនមិនជឿរថានាងសីម៉ា អត់មានម្ចាស់ចិត្តនោះទេ គ្រាន់តែនាងលាក់ប៉ុណ្ណោះ។ការសម្អាងបែបនេះដោយសារតែនាងសីម៉ា បច្ចុប្បន្នជាតារាល្បីម្នាក់ ហើយរូបសម្រស់គូរឲ្យក្នក់ក្នាញ់ក្រោយកែច្រមុះ ចាក់ចង្ការ និងពត់ធ្មេញ ហេតុនេះរឿងអីដែលអត់សង្សារ?ប៉ុន្ដែនៅពេលជួបអ្នកសារព័តមាន និងFan ដែលសួររឿងបេះដូងនាងនោះអ្នកចម្រៀងវ័យ២៥ឆ្នាំ រូបនេះតែងតែនិយាយដដែលថានាងគ្មានប្រុសស្នេហ៍ឡើយ។
តន់ ច័ន្ទសីម៉ា បានល្បីឈ្មោះលឿនដូចផ្លេកបន្ទោរនារយៈពេលចុងក្រោយនេះដែលធ្វើឲ្យតារាគីឡូប្រហាក់ប្រហែលនាងពិបាករត់តាមព្រោះនាងមានដៃគូឆ្លងឆ្លើយតារាប្រុសដល់ទៅ៣ដួងនោះគឺលោកព្រាប សុវត្ថិ ,ខេមរៈ សិរីមន្ដ និងខេម ដែលធ្វើឲ្យគេចាត់ទុកថានៅឆ្នាំ២០២៣ តារាស្រីមានតែនាងសីម៉ា ប៉ុណ្ណោះដែលមានគូឆ្លងឆ្លើយខ្លាំងជាងគេ។អ្វីដែលគូរឲ្យកត់សម្គាល់នោះនាងសីម៉ា ថ្មីៗនេះបានចាប់ដៃជាមួយលោកខែម ប៊ុនថៃ បទ”Edit ប៉ុន្មានApp” ដែលធ្វើឲ្យនាងកាន់តែមានទីផ្សារចម្រៀងទូលាយថែមទៀត។
អ្នកជំនាញសិល្បៈបានលើកឡើងថានាងតន់ ច័ន្ទសីម៉ា ច្រៀងកន្រ្ទឹម និងមានសម្លេងស្អក គឺពេលខ្លះស្ដាប់ទៅសឹងច្រឡំអ្នកនាងខាត់ សុឃីម តែម្ដង ហើយប្រាកដណាស់ថាពេលនេះGalaxy មានតារាប្រុសល្បីៗក្នុងកណ្ដាប់ដៃហើយបើផលិតកម្មមួយនេះមិនទិញតារាស្រីល្បីឈ្មោះណាចូលទេ គឺមានន័យថាសីម៉ា នៅតែជាតួឯកតទៅទៀត។
មិនមានព័តមានថានាងតន់ ច័ន្ទសីម៉ា ចង់កែសម្រស់ផ្នែកណាផ្សេងទៀត ដើម្បីឲ្យកាន់តែទាក់ទាញនោះទេ ប៉ុន្ដែពេលនេះគេឃើញរូបសម្រស់នាងប្រែប្រួលច្រើនបើប្រៀបធៀបអំឡុងពេលនាងប្រលងចម្រៀងThe Voice Cambodia រដូវកាលទី២ នោះរហូតមានអ្នកខ្លះលាន់មាត់ថារូបឆោមនាងប្រែប្រួលទៅតាមទឹកលុយទៀតផង។យ៉ាងណានាងសីម៉ា ដែលត្រូវផលិតកម្មគ្រប់គ្រងខ្លួនកំណត់តម្លៃខ្លួនខ្ពស់ផុតតារាល្បីស្រកៗគ្នា នោះពេលនេះនាងបាត់បង់ឱកាសចេញច្រៀងសម្ដែងតាមបណ្ដារឆាកទូរទស្សន៍ និងឆាកធំៗជាច្រើនទៀត ពោលគឺនាងចេញមុខច្រើនតែកម្មវិធីរៀបចំដោយGalaxy ប៉ុណ្ណោះ ព្រោះតែតម្លៃខ្លួននាងអ្នកដឹកនាំការប្រគុំតន្រ្ដីខ្លះគ្មានលទ្ធភាពជួលនាងទៅច្រៀង។
ប៉ុន្ដែគេជឿរថាកេរ្ដិ៍ឈ្មោះឬតម្លៃខ្លួនរបស់ច័ន្ទសីម៉ា អាចនឹងមានការប្រែប្រួលទៅវិញ ប្រសិនបើមាស សុខសោភា ដែលទើបចេញពីរាម កាលពីពេលថ្មីៗនេះ ត្រូវបានGalaxy ដាក់គោលដៅទិញចូលដើម្បីឲ្យចាប់ដៃជាមួយលោកសុវត្ថិ និងប៊ុនថៃ នោះ។ដោយឡែកនាងសីម៉ា វិញនាងបានត្រៀមចិត្តកាយរួចរាល់ហើយ ព្រោះជាញឹកញាប់នាងតែងតែចេញសារថាលើលោកនេះគ្មានអ្វីទៀងទាត់ទេ។តែគេជឿរថាអ្វីដែលនាងមានក្ដីសុខបំផុតនាពេលនេះគឺតារាប្រុសល្បីឈ្មោះទាំង៣ក្លាយទៅជាដៃគូរបស់នាងតែម្នាក់គត់ អត់គូប្រជែង ខណៈដែលរឿងស្នេហាវិញប្រាកដជាសីម៉ា អាចនឹងបង្ហាញភាពក្លាហានព្រមបញ្ចេញមុខគូស្នេហ៍ពិត ដើម្បីទប់ស្កាត់អ្នកបង្អាប់នាងថាល្បីប៉ុណ្ណឹងដែរ អត់សង្សារបណ្ដើរនោះជាមិនខាន៕