ភ្នំពេញ៖អ្នកស្រីយឹម សុជាតា អ្នកគ្រប់គ្រងផលិតកម្មGalaxy បាននិយាយយ៉ាងខ្លីនៅពេលអ្នកយកព័តមានយើងសួរថាតើមាស សុខសោភា នឹងទៅចូលរួមជាមួយGalaxy នាពេលខាងមុខឬយ៉ាងណានោះ ដោយអះអាងថាទាក់ទងរឿងនេះមិនអាចនិយាយបានទេ។ការមិនបដិសេធ ឬមិនទទួលស្គាល់ថាសុខសោភា ជាមុខសញ្ញានៃផលិតកម្មនេះគឺដូចគ្នាទៅនិងលោកខែម ប៊ុនថៃ នាមុននេះដែរដែលផលិតកម្មរងចាំដល់ការប្រកាសជាផ្លូវការតែម្ដងទើប ព្រោះចង់ឲ្យមានការចាប់អារម្មណ៍ខ្លាំង មុនទម្លាយប្រាប់មុន។យ៉ាងណាសម្រាប់សុខសោភា វិញតាំងពីចាកចេញពីរាម នៅដើមឆ្នាំ២០២៣ នេះនាងបានប្រកាសរយៈពេល១ឆ្នាំនេះពេញថានាងមិនទៅច្រៀងនៅផលិតកម្មណានោះទេ ពោលគឺធ្វើបទចម្រៀងចេញនៅផលិតកម្មផ្ទាល់ខ្លួនCamtrax តែម្ដង។ប៉ុន្ដែអ្នកជំនាញសិល្បៈបានលើកឡើងថាការអះអាងរបស់សុខសោភា បែបនេះគ្រាន់តែជាការបើកផ្លូវឲ្យផលិតកម្មដ៍ទៃចូលចែចូវនាងប៉ុណ្ណោះ ហើយបើត្រូវតាមល័ក្ខខណ្ឌនាងចង់បាននោះនាងនឹងទៅចូលរួមតែម្ដង ព្រោះការធ្វើផលិតកម្មខ្លួនឯងមិនមែនចេះតែជោគជ័យឬងាយស្រួលនោះទេ ដោយសារតែទាមទារឲ្យមានធនធានមនុស្ស និងរចនាចម្ព័ន្ធច្បាស់លាស់ទើបអាចទៅរួច។
គូរកត់សម្គាល់ថាចំពោះដណឹងរឿងមាស សុខសោភា អាចនឹងទៅចូលរួមជាមួយGalaxy កាន់តែមានភាគរយខ្ពស់ជាងទៅហង្សមាសនោះគឺដោយសាតែបច្ចុប្បន្នផលិតកម្មមួយនេះមានតារាចម្រៀងប្រុសលំដាប់ជូរមុខដល់ទៅ៣នាក់គឺព្រាប សុវត្ថិ ,ខែម ប៊ុនថៃ និងខេម ខណៈដែលតារាស្រីនាំមុខគេមានតែម្នាក់ប៉ុណ្ណោះគឺនាងតន់ ច័ន្ទសីម៉ា ហេតុនេះផលិតកម្មជើងថ្មីតែចាយលុយធំនេះប្រាកដជាត្រូវការទិញតារាល្បីស្រីចូលដើម្បីបានចាប់ដៃជាមួយតារាប្រុសទាំង៣ខាងលើជៀសវាងការបន្ដធ្វើជាដៃគូជាមួយនាងច័ន្ទសីម៉ា តែម្នាក់អាចធ្វើឲ្យទស្សនិកជនសាំ។តែលោកស្រីសុជាតា បែជាថាមិនអាចនិយាយមុនភាពជាក់ស្ដែងបានឡើយ។
សូមបញ្ជាក់ថាមាស សុខសោភា បានចេញពីថោន ដែលនាងធ្លាប់ជ្រកអស់រយៈពេលជាង៩ឆ្នាំនោះទៅចូលទៅរាម បានតែ២ឆ្នាំប៉ុណ្ណោះក៍មិនបន្ដច្រៀងនៅឆ្នាំទី៣ នោះទេ បើទោះជាទំនាក់ទំនងរវាងនាងនិងថៅកែស្រី ស្និតស្នាលគ្នាយ៉ាងណាក៍ដោយ។ក្រោយសុខសោភា ក្លាយទៅជាតារាចម្រៀងគ្មានកុងត្រាជាមួយផលិតកម្មណានោះអ្នកជំនាញសិល្បៈបានលើកឡើងថាមានតែផលិតកម្ម៣ ប៉ុណ្ណោះដែលសុខសោភា នឹងទៅចូលរួមនោះគឺGalaxy ,ហង្សមាស និងថោន តែសោភា ធ្លាប់ប្រាប់ថានាងគ្មានចេតនាទៅថោន ម្ដងទៀតនោះទេ ព្រោះច្រៀងនៅទីនោះជិត១០ឆ្នាំ គ្រប់គ្រាន់សម្រាប់រូបនាង ហើយនាងចង់បានបទពិសោធន៍ថ្មីៗថែមទៀត។
តារាវ័យជាង៤០ឆ្នាំរូបនេះទទួលស្គាល់ថាហង្សមាសធ្លាប់ទាក់ទងនាងមែន ប៉ុន្ដែGalaxy វិញមិនCall មកនាងចង់ឲ្យទៅទីនោះម្ដងណាឡើយ។សុខសោភា ថែមទាំងអះអាងថាសម័យនេះទៅហើយទោះជាច្រៀងដោយគ្មានផលិតកម្មក៍ល្បីដែរ ដែលការវាចាបែបនេះមានន័យថានាងក៍អាចជ្រើសផ្លូវមិនចូលផលិតកម្មណាទាំងអស់ដែរគឺច្រៀងតែផលិតកម្មខ្លួនឯង។ប៉ុន្ដែគេជឿរថាក្នុងករណីដែលសុខសោភា នៅតែចង់ឈចំណុចខ្ពស់ហើយ មានបទចម្រៀងប្រជែងលើទីផ្សារតទៅទៀតនោះគឺនាងត្រូវតែទៅចូលផលិតកម្មធំណាដែលគេមានគោលការណ៍ច្បាស់លាស់ទើបអាចទៅរួច។ដោយឡែកភាគតិចបំផុតដែលសុខសោភា នឹងអាចទៅហង្សមាសនោះ ព្រោះតែពេលនេះតារាចម្រៀងដែលគេចង់ឃើញនាងច្រៀងជាដៃគូគឺព្រាប សុវត្ថិ និងខេម ប៊ុនថៃ នោះពេលនេះពួកគេលែងជាអ្នកចម្រៀងហង្សមាសទៀតហើយ ហេតុនេះបើសុខសោភា ចង់រកដៃគូសាកសម គឺនាងពិបាកគេចGalaxy ។
មាស សុខសោភា ចាប់អាជីពចម្រៀងជាង១០ឆ្នាំ នាងត្រូវបានគេចាត់ទុកថាជាតារាជើងខ្លាំងម្នាក់ ព្រោះទៅដល់ផលិតកម្មណាល្បីនៅទីនោះ។តែអំឡុងសុខសោភា ច្រៀងនៅរាម ២ឆ្នាំ បទចម្រៀងនាងមិនសូវផ្ទុះខ្លាំងដូចមុននោះទេ ហេតុនេះហើយការចុះកុងត្រាត្រឹមរយៈពេលខ្លីរបស់សុខសោភា ជាមួយផលិតកម្មនេះគឺនាងគ្រាន់តែចង់ដឹងឬស្ទាបស្ទង់ពីកេរ្ដិ៍ឈ្មោះរបស់ខ្លួនថានៅតែខ្លាំងតទៅមុខទៀតឬយ៉ាងណា ហើយករណីដែលនាងនៅទ្រឹង ឬប្រឈមធ្លាក់ចុះគឺសោភា នឹងចាកចេញដូចជាពេលនេះ។តែសោភា បានប្រាប់អ្នកសារព័តមានថានាងចេញពីរាម ព្រោះចង់ធ្វើអ្វីខ្លួនឯង ម្យាងផលិតកម្មនេះផ្ដោតលើការផលិតភាពយន្ដ ច្រើនជាងចម្រៀង៕