ភ្នំពេញ៖ព្រាប សុវត្ថិ ធ្វើឲ្យFan លោកមិនសូវពេញចិត្តសម្រាប់ការច្រៀង២ឆ្នាំដំបូងនៅGalaxy ព្រោះបទចម្រៀងមិនអាចប្រៀបធៀបបាននូវបទលោកចាស់ៗនៅហង្សមាសទើបមានការលើកឡើងថាបើនៅតែដូច្នេះទៀត ច្បាស់ជាលោកឧកញ៉ាវ័យ៤៨ឆ្នាំរូបនេះនឹងរត់ចេញពីផលិតកម្មមុនចប់កុងត្រានៅឆ្នាំ២០២៥ ជាមិនខាន។ការសម្អាងបែបនេះព្រោះតែនៅតាមបណ្ដារកម្មវិធីប្រលងចម្រៀង ,បៀហ្គាឌិន និងPubs មួយចំនួនគេនៅតែនិយមច្រៀងបទព្រាប សុវត្ថិ ល្បីៗនៅហង្សមាសបើទោះជាបទទាំងនោះត្រូវបានគេដឹងថាភាគច្រើនបកប្រែពីចិន និងថៃ ក្ដី ប៉ុន្ដែទីបំផុតលោកឧកញ៉ាស្នាយ នៅតែបន្ដច្រៀងឲ្យGalaxy តទៅទៀត ហើយការបង្ហាញខ្លួនលើឆាកតន្រ្ដីរបស់លោកគឺអតីតតារាហង្សមាសរូបនេះតែងតែយកបទចម្រៀងនៅផលិតកម្មចាស់និងថ្មីទៅជាមួយសឹងគ្រប់ឆាក។ដោយឡែកសម្រាប់ឆ្នាំទី៣របស់ព្រាប សុវត្ថិ នៅGalaxy នេះគេកត់សម្គាល់ថាបទចម្រៀងរបស់លោកនៅផលិតកម្មថ្មីហាក់មានការចាប់អារម្មណ៍ច្រើនជាងឆ្នាំទី១និងទី២ ថ្វីត្បិតតែបទភាគច្រើនលោកច្រៀងតែជាមួយដៃគូចាស់នាងតន់ ច័ន្ទសីម៉ា តែម្នាក់ដូចឆ្នាំមុនៗក្ដី តែគេអាចសន្និដ្ឋានបានថាខាងផលិតកម្មហាក់ដូចជាមានការសម្រិតសម្រាំងឲ្យលោកខ្ពស់ជាងមុន ពិសេសគឺការទៅដល់របស់លោកខែម ប៊ុនថៃ តែម្ដង។សម្រាប់អ្នកគាំទ្រលោកឧកញ៉ាព្រាប សុវត្ថិ កំពុងតាមដានថាតើក្រៅពីបទប្រពៃណីទាំងនោះលោកសុវត្ថិ នឹងមានបទស្លូវ១បទណាដែលអាចផ្ទុះដូចច្រៀងនៅហង្សមាសអាចធ្វើឲ្យFan របស់លោកជឿរជាក់ឡើងវិញនៅឆ្នាំ២០២៣ នេះដែរឬទេ?
លោកមករា ជាអ្នកធ្វើភ្លេង(Composer)ម្នាក់ដោយឯករាជ្យមិនជាប់កុងត្រានៅផលិតកម្មណានោះបានប្រាប់ថាបទចម្រៀងបើធ្វើ១០បទរឿងអីដែលចេញទៅមិនត្រូវចិត្តអ្នកស្ដាប់បាន១បទនោះ ហេតុនេះលោកជឿរថាផលិតកម្មមានលុយដូចGalaxy នេះអាចទិញអ្នកនិពន្ធនិងដឹកនាំល្អៗឲ្យព្រាប សុវត្ថិ ច្រៀងសម្ដែងហើយទាំងបទចម្រៀងនិងMV គង់តែមានគុណភាពទេ។គ្រូភ្លេងរូបនេះថាឲ្យតែខាងផលិតកម្មហ៊ានចាយលុយគេអាចទិញអ្នកធ្វើភ្លេង និងអ្នកនិពន្ធខ្លាំងពីហង្សមាសពេលណាក៍បានដែរ ហេតុនេះលោកជឿរថាលោកព្រាប សុវត្ថិ នឹងមិនទាន់ធ្លាក់ចុះត្រឹមអាយុជិត៥០ឆ្នាំនេះឡើយ។
ការចាប់ផ្ដើមមានបទចម្រៀងខ្លះៗត្រូវចិត្តអ្នកស្ដាប់ឡើងវិញរបស់លោកព្រាប សុវត្ថិ នេះគឺចំពេលដែលGalaxy ទទួលបានតារាជើងខ្លាំងម្នាក់ទៀតនាដើមឆ្នាំ២០២៣ នោះគឺលោកខែម ប៊ុនថៃ ដែលធ្លាប់តែជាគូប្រជែងដ៍ស្វិតស្វាញបំផុតរបស់លោកឧកញ៉ាព្រាប សុវត្ថិ ជិត១០ឆ្នាំមកហើយ។មតិមហាជនលើកឡើងថាទោះជាព្រាប សុវត្ថិ និងខែម ប៊ុនថៃ ដែលឡើងជាឧកញ៉ាដូចគ្នានៅឆ្នាំ២០២២ នោះហាក់លែងសូវមានកម្ដៅប្រជែងទីផ្សារចម្រៀងខ្លាំងក្លាដូចមុនព្រោះសុទ្ធតែមានមុខជំនួញផ្ទាល់ខ្លួនខាងក្រៅសិល្បៈក្ដី តែគេជឿរថាម្នាក់ៗគ្មានអ្នកណាចង់ធ្វើជាតួរងឡើយ។ចំពោះលោកព្រាប សុវតិ្ថ វិញបើលោកមិនពង្រឹងទីផ្សារចម្រៀងនៅឆ្នាំ២០២៣ នេះទេ នោះគឺមានន័យថាលោកប្រាកដជាត្រៀមចិត្តធ្វើជាតារាចម្រៀងលំដាប់ទី២ នៅGalaxy ជាមិនខាន ព្រោះលោកខែម ប៊ុនថៃ មានបងប្រុសជាអ្នកនិពន្ធបទចម្រៀងឲ្យច្រៀង ហេតុនេះគេជឿរថាអតីតតារាសាន់ដេរូបនេះមិនងាយនឹងធ្លាក់ចុះឡើយឲ្យតែមានលោកខេមរៈ ភារុណ នៅក្រោយខ្នង ពោលគឺមិនដូចលោកសុវត្ថិ ដែលពឹងលើផលិតកម្មទម្លាក់បទឲ្យច្រៀងទាំងស្រុងនោះឡើយ។ប៉ុន្ដែគ្រប់គ្នាបានមើលឃើញច្បាស់ថានៅឆ្នាំថ្មីនេះលោកសុវត្ថិ មិនរយាលៗពីអាជីពចម្រៀងដូចឆ្នាំ២០២២ ដែលទើបឡើងងារជាឧកញ៉ា ក្ដៅៗគ្មានបទចម្រៀងចេញរហូតអ្នកខ្លះសង្ស័យថាលោកអាចនឹងដកខ្លួនចេញនោះឡើយ។
គូរបញ្ជាក់ថាលោកព្រាប សុវត្ថិ ជាតារាដែលមានទ្រព្យស្ដុកស្ដមរហូតអ្នកខ្លះហៅលោកថាជា”សេដ្ឋីៗ”តាំងពីមុនលោកទទួលបានគោរម្យងារជាឧកញ៉ា ម្លេះ ព្រោះកាលពីខែកញ្ញាឆ្នាំ២០២០ មនុស្សជំនិតលោកបានទម្លាយប្រាប់អ្នកកាសែតថាអ្នកចម្រៀងវ័យជ្រេបន្ដិចរូបនេះសល់ទ្រព្យដល់ទៅ៣០លានដុល្លារ ពីការចាប់អាជីពរយៈពេលជាង២០ឆ្នាំ។តែលោកសុវត្ថិ បានប្រកាសថាទោះជារូបលោកក្លាយទៅជាអ្វីក៍ដោយ គឺមិនចោលអាជីពចម្រៀងនោះទេពោលគឺរកស៊ីផង ច្រៀងផងដើរទន្ទឹមគ្នាតែម្ដងហើយលោកថាពលរដ្ឋទូទៅក៍ដូចជាអ្នកគាំទ្រលោកអាចហៅលោកថាជា”ឧកញ៉ា”ក៍បានឬហៅថា”លោកៗ”ដូចមុនក៍បានគឺលោកពេញចិត្តដូចគ្នា៕
