ភ្នំពេញ៖ស្រីស្រស់តន់ ច័ន្ទសីម៉ា ត្រូវបានគេចាត់ទុកថាជាអ្នកចម្រៀងដែលរកបានដៃគូល្អជាងគេនៅឆ្នាំ២០២៣ ពោលគឺតារាចម្រៀងប្រុសល្បីឈ្មោះដល់ទៅ៣នាក់គឺព្រាប សុវត្ថិ ,ខែម ប៊ុនថៃ និងខេម បានក្លាយទៅជាដៃគូរបស់នាងតែម្នាក់គត់ ហេតុនេះហើយបើមិនល្បីទើបចម្លែក។ប៉ុន្ដែទន្ទឹមនិងនេះក៍មានការិះគន់ថាការយកតារាប្រុសនាក់មកចាប់ដៃគូតារាស្រីតែម្នាក់ធ្វើឲ្យអ្នកសា្ដប់មានការធុញទ្រាន់ និងខ្លះឆ្ងល់ថាហេតុអីបានដូចជាខ្វះតារាស្រីម្លេះ ម៉េចបានផលិតកម្មនេះលើកតែសីម៉ា ម្នាក់បែបនេះទៅវិញ?តែគេកត់សម្គាល់ថាការដែលលោកសុវត្ថិ ,ប៊ុនថៃ និងខេម មានដៃគូស្រីតែម្នាក់បែបនេះបន្ទាប់ពីដំណឹងថាGalaxy ចង់ទិញមាស សុខសោភា និងពេជ្រ សោភា ទៅរួមទ្រនុំបានស្ងប់ស្ងាត់ទៅវិញទើបធ្វើឲ្យតារាខាងលើគ្មានជម្រើសណាផ្សេងក្រៅពីត្រូវច្រៀងសម្ដែងតែជាមួយនាងសីម៉ា តែម្នាក់គត់បែបនេះទេ។
អ្នកស្រីយឹម សុជាតា ធ្លាប់បានប្រាប់អ្នកយកព័តមានយើងថារឿងផែនការណ៍យកតារាស្រីណាចូលថែម ឬតារាណាចាប់ដៃគូជាមួយម្នាក់ណានោះមិនអាចប្រាប់ជាមុនបានឡើយ ព្រោះជាគោលការណ៍របស់ក្រុមហ៊ុន ហើយក្នុងនោះលោកស្រីក៍បានឆ្លើយតបសំណួរអ្នកយកព័តមានយើងសួរថាGalaxy មានចាប់អារម្មណ៍ទិញមាស សុខសោភា ឬអត់នោះដោយប្អូនស្រីឧកញ៉ាយឹម តាស្រង់ រូបនេះក៍ថាមិនអាចនិយាយបានដែរ។ដោយឡែកអ្នកធ្វើភ្លេង(Composer)ល្បីឈ្មោះម្នាក់នៅហង្សមាសដែលតារាជាច្រើនគោរពនិងហៅថាលោកគ្រូៗនោះបានប្រាប់អ្នកយកព័តមានយើងក្នុងល័ក្ខខណ្ឌមិនបញ្ចេញឈ្មោះថាលំដាប់ដូចព្រាប សុវត្ថិ និងខេមរៈ សិរីមន្ដ ជាដើមនោះលោកយល់ថាបើសីម៉ា អន់ ច្រៀងមិនកើតផលិតកម្មមិនអាចបង្ខំឲ្យពួកគាត់ច្រៀងជាមួយបានទេ។Composer រូបនោះទទួលស្គាល់ថាសម្លេងសីម៉ា ស្រដៀងអ្នកនាងខាត់ សុឃីម មែន ពិសេសច្រៀងបទកន្ទ្រឹមសឹងតែច្រឡំគ្នាទៀតផង តែលោកថាផលិតកម្មGalaxy មានលុយ ហេតុនេះលោកជឿរថាមិនមែនរកតារាស្រីល្បីផ្សេងទៀតមកមិនបាននោះទេ គឺគ្រាន់តែពេលនេះគេបុកឲ្យសីម៉ា ល្បីសិន តិចទៀតនឹងមានតារាស្រីម្នាក់ទៀតចេញមុខជាមិនខាន។លោកថាចំណុចពិសេសរបស់សីម៉ា គឺគាត់ចេញពីអ្នកស្មូត ហេតុនេះ អ្នកចេះស្មូតច្រៀងបច្ចេកទេសអឿនបានល្អគឺដូចគ្នាទៅនិងលោកស្រីហ៊ឹម ស៊ីវន និងចំរើន សុភ័ក្រ ដែរ។
នៅឆ្នាំ២០២៣ នេះតន់ ច័ន្ទសីម៉ា មានឧកញ៉ាដល់ទៅ៤នាក់ចាំជួយនោះគឺព្រាប សុវត្ថិ ,ឡេង ណាវ៉ាត្រា ,យឹម តាស្រង់ និងខែម ប៊ុនថៃ ដែលធ្វើឲ្យតារាចម្រៀងរួមជំនាន់ឬអ្នកមានគីឡូប្រហាក់ប្រហែលនាងពិបាកទប់ទល់។ប៉ុន្ដែគេជឿរថាសីម៉ា អាចនឹងចុះខ្សោយជាងនេះទៅវិញជាមិនខាននៅពេលដែលGalaxy រកបានតារាស្រីខ្លាំងម្នាក់ផ្សេងទៀតមកច្រៀងឆ្លាស់នាងធ្វើដៃគូតារាប្រុសទាំង៣ខាងលើ ខណៈដែលផលិតកម្មនេះក៍មាននាងហ៊ិន លីដា ម្នាក់ទៀតដែរ តែមិនដែលឃើញមានឱកាសច្រៀងសម្ដែងជាមួយតារាល្បីៗរបស់ផលិតកម្មនេះទេ បើទោះជានាងមានសម្ថភាពមិនចាញ់នាងច័ន្ទសីម៉ា ក្ដី។
គូរបញ្ជាក់ថានាងតន់ ច័ន្ទសីម៉ា រកបានប្រាក់ចំណូលពីសិល្បៈរាប់ម៉ឺនដុល្លារក្នុងរយៈពេល៣ឆ្នាំចុងក្រោយនេះទាំងការច្រៀងសម្ដែងនិងស្ពតពាណិជ្ជកម្ម។ប៉ុន្ដែអ្នកដឹកនាំសិល្បៈមួយចំនួនក៍ឈឺក្បាលព្រោះនាងដែរដោយសារតែសីម៉ា ត្រូវបានអ្នកគ្រប់គ្រងកំណត់តម្លៃខ្លួនខ្ពស់ខ្លាំងពេកពោលគឺច្រៀងConcerts ធំម្ដងស៊ីថ្លៃ៥ពាន់ដុល្លារ។តែបើផ្អែកលើតារាស្រីវ័យក្មេងនារយៈពេលចុងក្រោយនេះគេមើលឃើញថានាងពិតជាលេចធ្លោនិងមានបទចម្រៀងលោតឡើងជាងគេមែនស្របពេលដែលតារារៀមច្បងមាស សុខសោភា ,ឱក សុគន្ធកញ្ញា ,ពេជ្រ សោភា និងសុគន្ធ និសា ជាដើមនៅទ្រឹងដូចគ្នា ហើយតារាដែលវាយលុកទីផ្សារចម្រៀងយុវវ័យដូចសីម៉ា ដែរមានដូចជារ៉េត ស៊ូហ្សាណា,អ៊ីវ៉ា ,យូរី ,វី ឌីណែត ជាដើមនោះហាក់មិនសូវមានសកម្មភាពលេចត្រដែតដូចនាងឡើយ ដោយសារតែនៅក្នុងសិល្បៈការបង្ហាញអ្វីដែលថ្មីៗបំផុតជាបន្ដបន្ទាប់ទើបរក្សារទីផ្សារបានល្អ ព្រោះភាពដដែលៗជាសត្រូវនៃអ្នកទស្សនា។សម្រាប់នាងសីម៉ា វិញក្រៅពីគ្រងតំណែងជាតួឯកស្រីផ្នែកចម្រៀងនៅGalaxy នោះក៍មានព័តមានថាផលិតកម្មមួយនេះគ្រោងនឹងលើកនាងជាតួឯកភាពយន្ដនាពេលខាងមុខនេះផងដែរ៕
