ភ្នំពេញ ៖ ក្មេងប្រុសស្រី ១ក្រុម មានគ្នាប្រមាណ ៣ទៅ៤នាក់ បាននាំគ្នាដើរទៅងូតទឹកលេងនៅក្នុងអាងទឹក សួនច្បារខាងមុខផ្សារទំនើបអូឡាំព្យ៉ា លុះក្រោយមក ក្មេងស្រីម្នាក់ក្នុងចំណោមនោះ បានចុះទៅលេងក្នុង អាងដែលមានទឹកបាញ់ និងអំពូលបំភ្លឺផង ស្រាប់តែត្រូវចរន្តអគ្គិសនីឆក់ បណ្តាលឱ្យដួលចូលអាងទឹក និង ត្រូវបានដឹកបញ្ជូនទៅសង្គ្រោះនៅមន្ទីរពេទ្យគន្ធបុប្ផាភ្លាមៗដែរ តែអសកុសល សង្គ្រោះមិនបាន។
ហេតុការណ៍គ្រោះថ្នាក់ខាងលើ បានកើតមានការភ្ញាក់ផ្អើលឡើង កាលពីវេលាម៉ោង ៧យប់ ថ្ងៃទី១០ ខែឧសភា ឆ្នាំ២០២៣ ត្រង់ចំណុចអាងទឹកសួនច្បារខាងមុខផ្សារទំនើបអូឡាំព្យ៉ា ក្នុងសង្កាត់វាលវង់ ខណ្ឌ៧មករា។ក្មេងស្រីរងគ្រោះ មិនទាន់ត្រូវបានស្គាល់អត្តសញ្ញាណនៅឡើយ គ្រាន់តែដឹងថា មានវ័យប្រមាណជិត ១០ឆ្នាំ និងមានលំនៅក្បែរកន្លែងកើតហេតុ។
តាមប្រភពព័ត៌មានពីកន្លែងកើតហេតុ បានឱ្យដឹងថា កន្លងមក គេតែងតែឃើញមានក្មេងតូចៗ បាននាំគ្នា មក ចុះងូតទឹកលេង នៅក្នុងអាងទឹក ត្រង់ចំណុចកើតហេតុ ហើយសន្តិសុខដែលយាមនៅផ្សារទំនើបនោះ តែងតែ ដេញពួកគេ ដោយសារតែខ្លាចមានបញ្ហាកើតឡើង ព្រោះនៅ ខាងក្នុងអាងទឹកនោះ មានបំពាក់នូវអំពូល ភ្លើង និងម៉ាស៊ីនបូមទឹក ដែលប្រើដោយចរន្តអគ្គិសនី តែក្មេងទាំងនោះនៅតែមកលេង ហើយសន្តិសុខក៏ធ្លាប់ បាន ចាប់ក្មេងទាំងនោះ និងហៅអាណាព្យាបាលមកធ្វើកិច្ចសន្យាផងដែរ។
ប្រភពដដែល បន្តថា មុនពេលកើតហេតុ គេឃើញក្មេងស្រីរងគ្រោះ រួមនិងមិត្តភក្តិ ប្រមាណ៣ ទៅ៤នាក់ បាននាំគ្នាដើរមកងូតទឹកលេងនៅក្នុងអាងទឹក សួនច្បារត្រង់ចំណុចកើតហេតុទៀត។ បន្ទាប់មកក្មេងៗដែល មកលេងជាមួយក្មេងស្រីរងគ្រោះ បានងូតទឹកលេងនៅខាងៗ នៃអាងទឹក ចំណែកក្មេងស្រីរងគ្រោះ បានចូល ទៅលេងដល់កណ្តាលអាងទឹក។ ខណៈពេលនោះដែលកុមារីរងគ្រោះបានចុះទៅក្នុងទឹក រួចស្រាប់តែរឹងខ្លួន ហើយដួលលិចចូលទៅខាងក្នុងទឹកតែម្តង។ ឃើញបែបនេះ ប្រជាពលរដ្ឋដែលឃើញហេតុការណ៍ បានស្រែក ឆោឡោ បង្កឱ្យមានការភ្ញាក់ផ្អើលដល់សន្តិសុខ នាំគ្នាមកធ្វើការជួយស្រង់កុមារីរងគ្រោះ មកលើគោក និងបាន បញ្ជូនកុមារីរងគ្រោះទៅកាន់មន្ទីរពេទ្យគន្ធបុប្ផា ដើម្បីសង្គ្រោះភ្លាមៗដែរ តែជាអកុសលពេលដឹកបញ្ជូនទៅដល់ គ្រូពេទ្យពិនិត្យរួច ប្រាប់ថា ក្មេងស្រីរងគ្រោះបានស្លាប់បាត់ទៅហើយ។
បន្ទាប់មក សមត្ថកិច្ចមូលដ្ឋាន និងសមត្ថកិច្ចជំនាញកោសល្យវិច័យ បានចុះធ្វើការត្រួតពិនិត្យសពកុមារីរងគ្រោះ និងទីតាំងកើតហេតុ រួចក៏បានរកឃើញថា នៅចំណុចដែលកុមារីរងគ្រោះលេងនោះ មានខ្សែភ្លើងដែលដាច់ រលាត់ ហើយសមត្ថកិច្ចក៏បានព័ទ្ធកន្លែងកើតហេតុជា បណ្តោះអាសន្ន។
តាមការសន្និដ្ឋានរបស់សមត្ថកិច្ចជំនាញ ក្មេងស្រីរងគ្រោះពិតជាស្លាប់ដោយសារចរន្តអគ្គិសនីឆក់ប្រាកដមែន។សពក្មេងស្រីរងគ្រោះខាងលើ ត្រូវបានសមត្ថកិច្ចធ្វើកំណត់ហេតុ ប្រគល់ឱ្យក្រុមគ្រួសារយកទៅធ្វើ បុណ្យតាម ប្រពៃណី៕
