កណ្តាល ៖ យុវតីម្នាក់ ត្រូវបានក្រុមគ្រួសារអះអាងថា បានជិះម៉ូតូ ១គ្រឿង ចេញពីផ្ទះជាមួយនឹងមិត្តភក្តិស្រី ម្នាក់ទៀត រួចមិនឃើញវិលត្រឡប់មកផ្ទះវិញសោះ ជាហេតុធ្វើឱ្យក្រុមគ្រួសារមានការព្រួយបារម្ភ ប្រកាស ស្វែងរកកូនស្រីត្រឡប់មកផ្ទះវិញ។
យុវតីដែលបាត់ចេញពីផ្ទះ ដោយគ្មានដំណឹងនោះ មានឈ្មោះសារឿន សុលីកា ហៅរក្សា អាយុ១៧ឆ្នាំ មានលំនៅ ក្នុងស្រុកកៀនស្វាយ ខេត្តកណ្តាល។
ក្រុមគ្រួសារយុវតីដែលបាត់ខ្លួនខាងលើ បានបញ្ជាក់ប្រាប់ថា កូនស្រីរបស់គាត់ ឈ្មោះសារឿន សុលីកា ហៅរក្សា អាយុ១៧ឆ្នាំ បាត់ចេញពីកៀនស្វាយ ទៅជាមិត្តភក្តិម្នាក់ ដែលមានគណនីហ្វេសប៊ុក ឈ្មោះ Naeg X You (ជាមនុស្សស្រី)។ អ្នកទាំង២ បាននាំគ្នាទៅបាត់ តាំងពីម៉ោង ៦កន្លះព្រឹក មកម៉្លេះ ហើយរហូតដល់ពេលនេះ មិនដឹងថា ពួកគេទាំង២នាក់ទៅទីកន្លែងណាទេ។
ប្រភពដដែល បន្តថា កូនស្រីរបស់គាត់ បានជិះម៉ូតូ ១គ្រឿងទៅជាមួយ ម៉ាកហុងដាឌ្រីម សេ១២៥ ស៊េរីឆ្នាំ២០២១ ពាក់ស្លាកលេខ ភ្នំពេញ 5586។
ជាមួយនេះ ក្រុមគ្រួសារយុវតីខាងលើ បានអំពាវនាវដល់បងប្អូនប្រជាពលរដ្ឋដែលបានឃើញ ក្មេងស្រីដែលមាន ភិនភាគ ឬឃើញស្លាកលេខម៉ូតូ ដូចខាងលើ សូមជួយទាក់ទងមកក្រុមគ្រួសារ តាមរយៈ «នគរធំ» ឬវិទ្យុអេប៊ីស៊ី ដោយក្តីអនុគ្រោះ៕