ភ្នំពេញ ៖បុរស២នាក់ រស់នៅផ្ទះជាមួយគ្នា បានកើតមានជម្លោះពាក្យសម្តីយ៉ាងក្តៅគគុក ពីរឿងមិនជួយ ចេញលុយថ្លៃទឹកគ្នា ដោយភាគីអ្នកចេញលុយ បិទទឹកមិនឱ្យភាគីម្ខាងទៀតប្រើ រហូតឈានដល់អំពើហិង្សា ដោយភាគីម្ខាងទាញពូថៅកាប់គូទំនាស់ ចំដៃ បណ្តាលឱ្យបែកឆ្អឹងម្រាមដៃ រងរបួសធ្ងន់ និងត្រូវបានដឹក បញ្ជូនទៅសង្គ្រោះភ្លាមៗ ចំណែកជនដៃដល់ ត្រូវសមត្ថកិច្ចចាប់ឃាត់ខ្លួន នាំយកទៅចាត់ការតាមច្បាប់។
ករណីអំពើហិង្សានេះ បានកើតឡើង កាលពីវេលាម៉ោង ៩យប់ ថ្ងៃទី១០ ខែឧសភា ឆ្នាំ២០២៣ នៅចំណុចផ្ទះ គ្មានលេខ ផ្លូវលំ ភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ។
ជនសង្ស័យដែលប្រើពូថៅកាប់គូទំនាស់បណ្តាលឱ្យរងរបួសធ្ងន់ និងត្រូវសមត្ថកិច្ចចាប់ឃាត់ខ្លួន មានឈ្មោះសុខ សារ៉ន ភេទប្រុស អាយុ៦២ឆ្នាំ មុខរបរលក់ដូរ។ ចំណែកជនរងគ្រោះ មានឈ្មោះចេង រ័ក្សស្មី ភេទប្រុស អាយុ ៣១ឆ្នាំ មុខរបរបុគ្គលិកក្រុមហ៊ុន។ ជនសង្ស័យ និង ជនរងគ្រោះ សព្វថ្ងៃស្នាក់នៅផ្ទះជាមួយគ្នា ស្ថិតក្នុងភូមិ របោះអង្កាញ់ សង្កាត់ព្រែកឯង ខណ្ឌច្បារអំពៅ។
តាមប្រភពពីសមត្ថកិច្ច បានឱ្យដឹងថា មុនពេលកើតហេតុ ជនរងគ្រោះបានចូលបន្ទប់ទឹកក្នុងផ្ទះកើតហេតុ តែបើកទឹកមិនចេញ ក៏ស្រែកសួរថា “អាណាបិទទឹក?” ជនសង្ស័យឆ្លើយថា “អញជាអ្នកបិទ មកពីអ្ហែងមិន ដែលជួយចេញលុយ” ហើយក៏ទាស់ពាក្យសម្តីគ្នា តែត្រូវបានក្រុមគ្រួសារឃាត់ចេញ រួចជនរងគ្រោះ ក៏ដើរ ចូលផ្ទះបាត់ទៅ។
ប្រភពដដែល បន្តថា លុះក្រោយមក ជនសង្ស័យបានយកពូថៅកាប់ទ្វារផ្ទះជនរងគ្រោះ ពេលនោះ ជនរងគ្រោះ ចេញមកឃាត់ ក៏ត្រូវជនសង្ស័យកាប់ត្រូវម្រាមដៃឆ្វេង បែកឆ្អឹង ភ្លាមនោះ សមត្ថកិច្ចបានចុះទៅអន្តរាគមន៍ ឃាត់ខ្លួនជនសង្ស័យ រួមនិងវត្ថុតាង ពូថៅ១ បញ្ជូនមកទីស្នាក់ការប៉ុស្តិ៍ព្រែកឯង ដើម្បីសាកសួរ។ ចំណែកជន រងគ្រោះ ត្រូវបានក្រុមគ្រួសារនាំទៅព្យាបាលនៅមន្ទីរពេទ្យជោរៃ។
ជនសង្ស័យខាងលើ ត្រូវបានឃាត់ខ្លួនបណ្តោះអាសន្ន នៅអធិការដ្ឋាននគរបាលខណ្ឌច្បារអំពៅ ដើម្បីចាត់ការ តាមនីតិវិធី៕