បាត់ដំបង ៖ យុវជនម្នាក់ បានបែកគំនិតនាំបក្ខពួករបស់ខ្លួនម្នាក់ទៀត ទៅធ្វើសកម្មភាពលួចគាស់ផ្ទះ ម្តាយ មីងបង្កើតរបស់ខ្លួន ខណៈម្តាយមីងចាក់សោផ្ទះចោល ចេញទៅធ្វើការ ដោយលួចបានគ្រឿងអលង្ការ និង លុយកាក់ជាច្រើន ។ លុះក្រោយពីម្តាយមីងដាក់ពាក្យបណ្តឹង ក៏ត្រូវសមត្ថកិច្ចស្រាវជ្រាវអស់ជាង១០ថ្ងៃទើប ឈានដល់ការចាប់វាយខ្នោះក្មួយប្រុសជើងល្អនិងបក្ខពួក ២នាក់ នាំយកទៅចាត់ការតាមច្បាប់។
ករណីគាស់ផ្ទះលួចទ្រព្យសម្បត្តិនេះ បានកើតឡើង កាលពីថ្ងៃទី២៨ ខែមេសា ឆ្នាំ២០២៣ នៅចំណុចភូមិស្រ ឡៅជ្រុំ ឃុំសិរីមានជ័យ ស្រុកសំពៅលូន។ រហូតមកដល់រសៀលថ្ងៃទី១១ ខែឧសភា ឆ្នាំ២០២៣ សមត្ថកិច្ច ជំនាញស្រាវជ្រាវឈានដល់ការឃាត់ខ្លួន ជនសង្ស័យ ចំនួន២នាក់ យកទៅសាកសួរ។
លោកទឹម វិឆ័យ អធិការស្រុកសំពៅលូន បានឱ្យដឹងថា ជនសង្ស័យទាំង២នាក់ដែលត្រូវ បានសមត្ថកិច្ចចាប់ ឃាត់ខ្លួន ទី១-ឈ្មោះវ៉ាន់ សំណាង អាយុ២២ឆ្នាំ (ត្រូវជាក្មួយម្ចាស់ផ្ទះ) និងទី២-ឈ្មោះសែន សុផុន អាយុ៣៣ឆ្នាំ ពួកគេរស់នៅក្បែរផ្ទះជនរងគ្រោះ។ ចំណែកជនរងគ្រោះជាម្ចាស់ផ្ទះ មានឈ្មោះញឹក សុជាតា ភេទស្រី អាយុ ២៨ឆ្នាំ ជាមន្ត្រីនគរបាល នៃអធិការដ្ឋានស្រុកសំពៅលូន។
លោកអធិការ បានឱ្យដឹងថា ករណីគាស់ទម្លុះទម្លាយលំនៅឋានខាងលើនេះ បានកើតឡើង កាលពីព្រឹកថ្ងៃទី២៨ ខែមេសា ឆ្នាំ២០២៣ នៅចំណុចភូមិស្រឡៅជ្រុំ ឃុំសិរីមានជ័យ ស្រុកសំពៅលូន ដោយម្ចាស់ផ្ទះមានឈ្មោះញឹក សុជាតា ជាមន្ត្រីនគរបាល។
លោកអធិការ បានបន្តថា ក្នុងចំណោមជនសង្ស័យទាំង២នាក់ មានម្នាក់ឈ្មោះវ៉ាន់ សំណាង ត្រូវជាក្មួយម្ចាស់ផ្ទះ ហើយពួកគេបាននាំគ្នាទៅគាស់ជញ្ជាំងផ្ទះជនរងគ្រោះ រួចចូលលួចគ្រឿងអលង្ការ និងប្រាក់មួយចំនួន នៅពេល ម្ចាស់ផ្ទះជាប់រវល់ទៅបាត់ដំបង។ ចំណែកម្ចាស់ផ្ទះ បានដឹងរឿងនេះ នៅពេលត្រឡប់មកពីបាត់ដំបងវិញ ហើយ ក៏ប្តឹងទៅសមត្ថកិច្ច រហូតឈានដល់ការឃាត់ជនសង្ស័យ ចំនួន២នាក់ ខាងលើ។
យោងតាមរបាយការណ៍សមត្ថកិច្ច ទ្រព្យសម្បត្តិដែលជនរងគ្រោះបាត់បង់ រួមមាន ខ្សែកប្លាទីន ១ខ្សែ ចិញ្ចៀនប្លា ទីន ១វង់ កងដៃប្លាទីន ៧វង់ និងប្រាក់ថៃ ចំនួន២ម៉ឺនបាត។ គ្រឿងអលង្ការ និងប្រាក់ទាំងនេះ ត្រូវជនរងគ្រោះទុក នៅក្នុងកាបូប។ ប៉ុន្តែក្រោយត្រូវចាប់ខ្លួន វត្ថុតាងដែល ដកហូតបានពីជនសង្ស័យ មានតែខ្សែកប្លាទីនពណ៌ស មានដាំត្បូង ១ខ្សែ និងចិញ្ចៀនប្លាទីនមានដាំត្បូង ១វង់តែប៉ុណ្ណោះ ក្រៅពីនោះត្រូវជនសង្ស័យ លក់ចាយអស់ ទៅហើយ។
តាមចម្លើយសារភាពរបស់ជនសង្ស័យ ពួកគេបានធ្វើកសម្មភាពគាស់ជញ្ជាំងផ្ទះខាងក្រោយ ចូលលួចទ្រព្យ សម្បត្តិ ពេលម្ចាស់ផ្ទះចាកចេញផុត។
ជនសង្ស័យទាំង២នាក់ខាងលើ ត្រូវបានសមត្ថកិច្ចជំនាញ រៀបចំកសាងសំណុំរឿងបញ្ជូនទៅកាន់សាលាដំបូង ខេត្ត ដើម្បីចាត់ការបន្តតាមនីតិវិធី៕