បាត់ដំបង ៖ សាលាដំបូងខេត្តបាត់ដំបង កាលពីថ្ងៃទី១២ ខែឧសភា ឆ្នាំ២០២៣ បានសម្រេចចោទប្រកាន់ និងឃុំខ្លួនអគ្គនាយកក្រុមហ៊ុនចិញ្ចឹមសត្វ អានស៊ីន អាវី សែនជ័យ ក្រោមបទចោទប្រកាន់បោក ប្រាស់ ប្រាក់ប្រជាពលរដ្ឋ អស់ជាង២លានដុល្លារ។
ជនត្រូវចោទដែលត្រូវតុលាការសម្រេចឃុំខ្លួន មានឈ្មោះធី រ៉ាវុធ អគ្គនាយកក្រុមហ៊ុនអានស៊ីន អាវី សែនជ័យ និងម្នាក់ទៀតឈ្មោះវុន រស្មី មានតួនាទីជាអ្នកគ្រប់គ្រងការលក់-ទិញគោ ពពែ មាន់ ដែលបានឆបោកប្រាស់ប្រ ជាពលរដ្ឋ ដោយជនត្រូវចោទត្រូវបានតុលាកាចេញដីកា ឱ្យចាប់ខ្លួន ដោយជនសង្ស័យ ធី រ៉ាវុធ និង វុន រស្មី នោះបានព្យាយាមរត់គេចខ្លួន អស់មួយរយៈ។
សូមបញ្ជាក់ថា កន្លងមកប្រជាពលរដ្ឋ ចំនួនជាង២២៥គ្រួសារ បានលើកគ្នាមកតវ៉ានៅមុខបរិវេណសាលា ខេត្ត បាត់ដំបង ទាមទារឱ្យលោកសុខ លូ អភិបាលខេត្តបាត់ដំបង ជួយរកដំណោះស្រាយជាមួយក្រុមហ៊ុន អានស៊ីន អាវីសែនជ័យ ឯ.ក កាលពីរសៀលថ្ងៃទី១២ ខែមេសា ឆ្នាំ២០២២ រឿងឆបោកលុយ ជាង២លានដុល្លារ ដែលធ្វើ ឡើងជាលក្ខណៈវិនិយោគទុន ទៅលើការចិញ្ចឹម ការបង្កាត់ពូជ និងផលិតកម្ម គោ ក្របី។
លោកស៊ឹម វុទ្ធា តំណាងជនរងគ្រោះ បាននិយាយថា ជនជាប់ចោទដែលពលរដ្ឋប្តឹងទាំងអស់៦នាក់ មានឈ្មោះ ធី រ៉ាវុធ ភេទប្រុស ប្រធានក្រុមប្រឹក្សាភិបាល ជាអ្នកទទួលលុយពីពលរដ្ឋផ្ទាល់ ឈ្មោះវ៉ុន រស្មី ជាប្រធានគណ នេយ្យ និងជាភរិយារបស់លោកធី រ៉ាវុធ ឈ្មោះធី រ៉ាវ៉ាន់ អ្នកគ្រប់គ្រងការទិញលក់គោ ពពែ មាន់ និងចំណីត្រូវ ជាប្អូនបង្កើតលោក ធី រ៉ាវុធ និងឈ្មោះសុខ ចិន្ថា អ្នកគ្រប់គ្រងទូទៅត្រូវជាប្អូនថ្លៃលោកធី រ៉ាវុធ និងឈ្មោះផាន់ ស៊ីណាត អ្នកគ្រប់គ្រងបច្ចេកទេស និងឈ្មោះឃុន ផាណូ ជាអគ្គនាយកក្រុមហ៊ុន។
តំណាងប្រជាពលរដ្ឋដដែល បានលើកឡើងថា ជនរងគ្រោះសរុប ចំនួន២២៥នាក់ ដែលត្រូវបានរងគ្រោះដោយ សារតែបុគ្គលដែលមានឈ្មោះ ធី រ៉ាវុធ ឈ្មោះវុន រស្មី ឈ្មោះឃុន ផាន់ណូ និងឈ្មោះធី រ៉ាវ៉ាន់ នេះផ្តួចផ្តើម និង ប្រើល្បិចកល សមគំនិតគ្នាឆបោកអស់ប្រាក់ រាប់សិបលានដុល្លាអាមេរិក ដែលជាល្បិចកលដ៏ថោកទាបរបស់ បុគ្គលទាំងអស់ខាងលើ រួមគ្នាជាក្រុម និងជាប្រព័ន្ធ ដែលមានមេខ្លោងចាត់តាំងត្រឹមត្រូវ ធ្វើឲ្យពួកគាត់រងគ្រោះ អស់ប្រាក់ដែលខំសន្សំ រលីងពីខ្លួន និងធ្លាក់ក្នុងបំណុលជាមួយនឹងមីក្រូហិរញ្ញវត្ថុ និងធនាគារ៘ ដូច្នេះពួក គាត់ជាជនរងគ្រោះ សង្ឃឹមនិងជឿជាក់លើប្រព័ន្ធផ្លូវច្បាប់ ដែលបានបង្កើតឡើង ដើម្បីផ្តន្ទាទោស និងដាក់ ទណ្ឌកម្មចំពោះជនឆបោកទាំងអស់ ឱ្យសមទៅនឹងអំពើទុច្ចរិតរបស់ក្រុមជនល្មើស ៕