ទិញកាំភ្លើងថ្មី បាញ់លេង៦០គ្រាប់ ជាប់ខ្នោះ៣

បាត់ដំបង ៖ ជនសង្ស័យ ១ក្រុម បានលួចទិញកាំភ្លើង ចំនួន៤ដើម ដោយខុសច្បាប់ រួចយកមកបាញ់សាក (ស្តារកាណុង) អស់ប្រមាណ ៦០គ្រាប់ បង្កឱ្យមានការភ្ញាក់ផ្អើលដល់សមត្ថកិច្ច ចុះអន្តរាគមន៍ បង្ក្រាបបាន ចំនួន៣នាក់ ព្រមទាំងដកហូតបានកាំភ្លើងខ្លី ចំនួន២ដើម ។

ករណីបាញ់បោះសេរីនេះ បានកើតឡើង កាលពីវេលាម៉ោង១២ថ្ងៃត្រង់ ថ្ងៃទី១០ ខែឧសភា ឆ្នាំ២០២៣ នៅចំ ណុចវាលស្រែ ចំណុចក្រុមទី០១ ភូមិប៉ោយស្វាយ ឃុំតាគ្រាម ស្រុកបាណន់។ លុះមកដល់ថ្ងៃទី១១ ខែឧសភា ឆ្នាំ២០២៣ សមត្ថកិច្ចក៏ឈានដល់ការបង្ក្រាប ឃាត់ខ្លួនក្រុមជនសង្ស័យ បានចំនួន៣នាក់។

ជនសង្ស័យទាំង៣នាក់ ដែលត្រូវសមត្ថកិច្ចចាប់ឃាត់ខ្លួន រួមមាន ទី១-ឈ្មោះធុល សីហា ភេទប្រុស អាយុ២៥ឆ្នាំ មានលំនៅក្នុងភូមិបែកចានថ្មី សង្កាត់ព្រែកព្រះស្តេច ក្រុងបាត់ដំបង។ ទី២-ឈ្មោះទៀង ច័ន្ទឌីណា ភេទប្រុស អាយុ៣៥ឆ្នាំ មានលំនៅក្នុងភូមិចុងទំនប់ សង្កាត់ក្តុលដួនទាវ ក្រុងបាត់ដំបង និងទី៣-ឈ្មោះស៊ីង កុកឃាង ភេទ ប្រុស អាយុ២៥ឆ្នាំ មានលំនៅក្នុងភូមិបវេល ឃុំបវេល ស្រុកបវេល។

យោងតាមប្រភពពីសមត្ថកិច្ច បានឱ្យដឹងថា កម្លាំងសមត្ថកិច្ចនគរបាលចម្រុះខេត្តបាត់ដំបង សហការស្រាវជ្រាវ និងបង្ក្រាបករណីប្រើប្រាស់អាវុធខុសច្បាប់ បាញ់បោះសេរី ក្នុងមូលដ្ឋានមួយករណី ដោយឃាត់ខ្លួនមនុស្សចំនួន ៣នាក់ កាលពីថ្ងៃទី១១ ខែឧសភា ឆ្នាំ២០២៣។

ប្រភពដដែលបន្តថា ក្នុងប្រតិបត្តិការនោះ លោកវរសេនីយ៍ទោ សំ វីរៈ អធិការនគរបាលស្រុកបាណន់ បានដឹកនាំ កម្លាំងចុះសហការជាមួយកម្លាំងនគរបាលនៃអធិការដ្ឋាននគរបាលក្រុងបាត់ដំបង ដែលមានលោកវរសេនីយ៍ឯក ពេជ្រ សារ៉ែន ជាអធិការ និងកម្លាំងនគរបាល ការិយាល័យនគរបាលព្រហ្មទណ្ឌកម្រិតស្រាល ដែលមានលោក វរសេនីយ៍ឯក ចៀក ផានិន ជានាយការិយាល័យ និងមានលោកវរសេនីយ៍ឯក ឈឿង គឹមសុង ស្នងការរងទទួល បន្ទុក បានធ្វើការការបង្ក្រាបនិងឃាត់ខ្លួនមុខសញ្ញាប្រើប្រាស់អាវុធខុសច្បាប់ ចំនួន១ករណី ឃាត់ខ្លួនមនុស្ស ចំនួន៣នាក់ និងដកហូតបានអាវុធខ្លី ចំនួន២ដើម និងគ្រាប់មួយចំនួន ព្រមទាំងរថយន្ត ១គ្រឿង ជាមធ្យោបាយ ផងដែរ។

ប្រភពខាងលើ បញ្ជាក់ថា មូលហេតុដែលឃាត់ខ្លួនជនសង្ស័យទាំង៣នាក់ខាងលើ គឺកាលពីវេលាម៉ោង ១២ថ្ងៃ ត្រង់ ថ្ងៃទី១០ ខែឧសភា ឆ្នាំ២០២៣ នៅវាលស្រែ ចំណុចក្រុមទី០១ ភូមិប៉ោយស្វាយ ឃុំតាគ្រាម ស្រុកបាណន់ មានមនុស្ស ១ក្រុម ជិះរថយន្ត ១គ្រឿង បានប្រើប្រាស់អាវុធខ្លី បាញ់ជាច្រើនគ្រាប់ នៅចំណុចភូមិសាស្ត្រខាងលើ ដោយមិនដឹងពីមូលហេតុ និងបង្កឱ្យមានការភ្ញាក់ផ្អើល។

ក្រោយធ្វើសកម្មភាពបាញ់បោះរួច ពួកគេបានជិះរថយន្តចាកចេញពីទីកន្លែងនោះទៅបាត់ ដោយបន្សល់ទុក នូវការងឿងឆ្ងល់ចំពោះមហាជននៅទីនោះ។ ប៉ុន្តែបញ្ហានេះត្រូវបានដឹងដល់សមត្ថកិច្ចនគរបាលស្រុកបាណន់ ដែលមានលោកវរសេនីយ៍ទោ សំ វីរៈ ជាអធិការ បានដឹកនាំ ធ្វើការស្រាវជ្រាវភ្លាមៗ។

តាមបទបញ្ជាដាច់ខាតរបស់លោកឧត្តមសេនីយ៍ទោស្នងការ សមត្ថកិច្ចបានស្រាវជ្រាវ និងកំណត់អត្តសញ្ញាណ បាន រហូតឈានដល់ការសហការដេញបង្ក្រាបទាំងយប់ និងឃាត់ខ្លួនបានជនសង្ស័យទាំង៣នាក់ខាងលើ ព្រមទាំងដកហូតបានវត្ថុតាង រួមមាន អាវុធខ្លី ម៉ាក RETAY ពណ៌ខ្មៅ ចំនួន២ដើម បង់និងគ្រាប់ មួយចំនួនផង។ រថយន្ត ១គ្រឿង ម៉ាកតូយ៉ូតា ព្រូស ពណ៌ខ្មៅ ស៊េរីឆ្នាំ២០១០ ពាក់ស្លាកលេខ ភ្នំពេញ 2BU-7671។

លោកវរសេនីយ៍ទោ សំ វីរៈ អធិការនគរបាលស្រុកបាណន់ បានឱ្យដឹងថា នៅថ្ងៃទី១០ ខែឧសភា ឆ្នាំ២០២៣ ពួក គេទាំង៣នាក់ ប្រើប្រាស់អាវុធ ចំនួន៤ដើម បាញ់អស់ចំនួន ៦០គ្រាប់ នៅទីតាំងខាងលើ បង្កឱ្យមានការភ្ញាក់ផ្អើល ដែលការបាញ់នេះគឺជាការសាកអាវុធថ្មីរបស់ពួកគេ ដែលទើបទិញបាន ហើយមូលហេតុដែលគេទិញអាវុធមក ប្រើប្រាស់ដោយខុសច្បាប់បែបនេះគឺគេមានបំណងយកមកការពារខ្លួន។

ជនសង្ស័យទាំង៣នាក់ខាងលើ ត្រូវបានឃាត់ខ្លួនជាបណ្តោះអាសន្ន នៅអធិការដ្ឋាននគរបាលក្រុងបាត់ដំបង ដើម្បីចាត់ការតាមច្បាប់។ ចំណែកបក្ខពួកផ្សេងទៀត រួមទាំងអាវុធខ្លី សមត្ថកិច្ចកំណត់មុខសញ្ញាបានហើយ និង កំពុងតាមចាប់ខ្លួនយកមកផ្តន្ទាទោសតាមច្បាប់៕