កំពត ៖ រថយន្តដឹកអ្នកដំណើរ១គ្រឿង ដឹកភ្ញៀវចំនួន១០នាក់មកពីខេត្តកំពង់ចាម ធ្វើដំណើរកម្សាន្តនៅខេត្តកំពត ស្រាប់តែកំពុង បើកបរលើដងផ្លូវសុខៗ ក៏ស្រាប់តែឆ្លងចរន្តឆាបឆេះយ៉ាងសន្ធោសន្ធៅ បណ្តាលឱ្យរងការខូចខាតរថយន្តទាំងស្រុង ។
ហេតុការណ៍ខាងលើនេះ បានកើតមានការភ្ញាក់ផ្អើលឡើង កាលពីវេលាម៉ោង៨ និង៣០នាទីព្រឹក ថ្ងៃទី១៤ ខែឧសភា ឆ្នាំ២០២៣ នៅលើកំណាត់ផ្លូវជាតិលេខ៣ (កំពត-ខេត្តព្រះស៊ីហនុ) ចំណុចខាងជើងប៉ុស្តិ៍រដ្ឋបាលសង្កាត់អណ្តូងខ្មែរ ចម្ងាយ២០ម៉ែត្រ ស្ថិតក្នុងភូមិទ្វីខាងត្បូង សង្កាត់អណ្តូងខ្មែរ ក្រុងកំពត។
តាមប្រភពពីសមត្ថកិច្ច បានឱ្យដឹងថា នៅមុនពេលកើតហេតុ មានរថយន្តម៉ាកសាំងយ៉ុង ប្រភេទ១៥កៅអី ពណ៌ស ដឹកអ្នកដំណើរ ១គ្រឿង បានជួបគ្រោះអគ្គិភ័យ បណ្តាលឱ្យផ្ទុះឆាបឆេះយ៉ាងសន្ធោសន្ធៅ ខណៈពេលកំពុងតែបើកបរសុខៗនៅលើផ្លូវជាតិលេខ៣ កំពត ខេត្តព្រះស៊ីហនុ ចំណុចខាងជើងប៉ុស្តិ៍រដ្ឋបាលសង្កាត់អណ្តូងខ្មែរ ចម្ងាយ២០ម៉ែត្រ ស្ថិតក្នុងភូមិទ្វីខាងត្បូង សង្កាត់អណ្តូងខ្មែរ ក្រុងកំពត ដោយ មិនដឹងមូលហេតុ។
លោកទ្រី ឌីម៉ង់ អាយុ៤០ឆ្នាំ រស់នៅភូមិព្រែកកក់ ឃុំបឹងដែង ស្រុកស្ទឹងត្រង់ ខេត្តកំពង់ចាម ដែលជាម្ចាស់រថយន្ត បានរៀបរាប់ប្រាប់ថា រថយន្តរបស់លោកដឹកអ្នកដំណើរចំនួន១០នាក់ ក្នុងនោះស្រី៦នាក់ និងប្រុស៤នាក់ មកពីខេត្តកំពង់ចាម ដើម្បីមកលេងកម្សាន្តនៅក្នុងខេត្តកំពត។ ហើយកាលពីយប់ថ្ងៃទី១៣ ខែឧសភា ឆ្នាំ២០២៣ ភ្ញៀវទាំងអស់បានសម្រាកនៅក្រុងកំពតមួយយប់រួចហើយ ដោយព្រឹកនេះចេញដំណើរ ទៅ លេងកម្សាន្តនៅរមណីដ្ឋានភ្នំបូកគោ ខណៈទើបចេញដំណើរមកដល់ចំណុចខាងលើ ក៏ជួបហេតុការដ៏អាក្រក់នេះតែម្តង។ម្ចាស់រថយន្តខាងលើបានឱ្យដឹងបន្តថា រថយន្តរបស់លោកមិនដែលមានបញ្ហាអ្វីសោះនាពេលកន្លងមក ប៉ុន្តែមិនដឹងជាចៃដន្យអី ពេលនេះ មកជួបបញ្ហាបែបនេះទៅវិញ។ ប៉ុន្តែក្នុងហេតុការណ៍អគ្គិភយ័ឆាបឆេះនេះ មិនបណ្តាលឱ្យមានគ្រោះថ្នាក់ដល់អាយុជីវិតអ្នកដំណើរណាម្នាក់ទេ គ្រាន់តែខូចខាតសម្ភារៈប្រើប្រាស់ ដូចជា ខោអាវ គ្រឿងឧបភោគបរិភោគមួយចំនួន ដូចជា ចង្ក្រានហ្គាស្បកំប៉ុងហ្គាសឆេះអស់គ្មានសល់ និងអ្នក ជិះម្នាក់ៗយកបានតែកាបូបលុយស្ពាយជាប់តាមខ្លួនតែប៉ុណ្ណោះ។
កម្លាំងសមត្ថកិច្ចជំនាញពន្លត់អគ្គិភ័យរបស់ស្នងការដ្ឋាននគរបាលខេត្ត បានឱ្យដឹងថា ពេលហេតុការណ៍កើតឡើង កម្លាំងនគរបាល ប៉ុស្តិ៍រដ្ឋបាល បានរាយការណ៍មកកម្លាំងរថយន្តពន្លត់អគ្គិភ័យស្នងការខេត្តចំនួន២គ្រឿង ចេញមកអន្តរាគមន៍ពន្លត់ភ្លាមៗ ប៉ុន្តែជាអកុសល រថយន្ត រងគ្រោះខាងលើ ត្រូវអណ្តាតភ្លើងឆាបឆេះតែមួយប៉ប្រិចភ្នែកឆេះនៅសល់តែគ្រោងឆ្អឹងតែប៉ុណ្ណោះ។ ហើយបើតាមការពិនិត្យឃើញជាក់ស្តែង អីវ៉ាន់របស់អ្នកដំណើរដែលដាក់ក្នុងរថយន្ត សុទ្ធតែជាសម្ភារៈងាយឆាបឆេះមានដូចជា កំប៉ុងហ្គាសជាដើម។
សមត្ថកិច្ចបន្តថា រថយន្តរងគ្រោះខាងលើ ត្រូវបានកម្លាំងសមត្ថកិច្ចចរាចរណ៍ខេត្ត ស្ទូចមករក្សាទុកនៅប៉ុស្តិ៍រដ្ឋបាល ទុកឱ្យម្ចាស់ យកទៅជួសជុលដោយខ្លួនឯង៕