ភ្នំពេញ៖ឱក សុគន្ធកញ្ញា ត្រូវបានតារាជើងចាស់និងជើងថ្មីមួយចំនួនបានហៅនាងថាជា”ជំទាវ”និងហៅស្វាមីនាងលោកអ៊ឹង សុខលី ថាជា”ឧកញ៉ា” នៅក្នុងកម្មវិធីជប់លៀងប្រចាំឆ្នាំ ឬពិធីសំពះគ្រូធំរបស់ហង្សមាសកាលពីថ្ងៃទី១០ ខែឧសភា ឆ្នាំ២០២៣ ។ប៉ុន្ដែគោរម្យងារទាំងស្វាមីរបស់លោក អ៊ឹង សុខលី និងសុគន្ធកញ្ញា នោះកន្លងមកគេមិនដែលឃើញមានការផ្សព្វផ្សាយជាសាធារណៈថាលោកសុខលី ឡើងជាឧកញ៉ានោះទេ ហេតុនេះអ្នកខ្លះសង្ស័យថាការហៅសុគន្ធកញ្ញា និងប្ដីនាងបែបនេះអាចជាមើលទៅតាមសភាពជាក់ស្ដែងដែលអំណាចនិងឥទ្ធិពលរបស់ពួកគេនៅហង្សមាសសាកសមនិងរហ័ស្សនាមនោះតែម្ដងទើបតារាៗហៅឈ្មោះអ្នកទាំងពីរបែបនេះ។គេឃើញតារាសម្ដែងជើងចាស់លោកលី សុខជន់ ឪពុករបស់លី ច័ន្ទសីហា ក៍បានសរសេរសារនៅលើហ្វេសបុករបស់លោកដោយហៅលោកអ៊ឹង សុខលី ថាជាឧកញ៉ា និងឱក សុគន្ធកញ្ញា ថាជាជំទាវផងដែរនៅពេលដែលលោកបានថតរូបជុំគ្នាជាមួយអ្នកទាំងពីរនៅថ្ងៃជប់លៀងនោះ។ចំណែកក្រុមតារាចម្រៀងរួមអាជីពខ្លះបានសម្ដែងការសាទរចំពោះសុគន្ធកញ្ញា នៅពេលដែលគេហៅនាងថាជាជំទាវៗ នោះដោយពួកគេចាត់ទុកអ្នកចម្រៀងរូបនេះថាពិតជាជោគជ័យទាំងទាំងអាជីពសិល្បៈនិងជីវិតស្នេហាព្រមគ្នាមែន ។
ថ្វីត្បិតតែឱក សុគន្ធកញ្ញា ត្រូវបានគេហៅថាជំទាវៗបែបនេះមែន ប៉ុន្ដែនៅលើហ្វេសបុកនាងនិងលោកអ៊ឹង សុខលី មិនមានការបង្ហាញថាប្អូនថៅកែហង្សមាសនិងជាអគ្គនាយកទូរទស្សន៍ហង្សមាសរូបនេះបង្ហោះការទទួលបានគោរម្យងារជាឧកញ៉ាឡើយ។ប៉ុន្ដែបើផ្អែកលើទ្រព្យធនរបស់លោកសុខលី វិញគេជឿរថាលោកមិនមានបញ្ហានោះទេក្នុងការលះបង់ធនធានផ្ទាល់ខ្លួនចំនួនកន្លះលានដុល្លារជួយជាតិដើម្បីទទួលបានគោរម្យងារជាឧកញ៉ានោះព្រោះថាបងប្រុសលោកដែលជាម្ចាស់ក្រុមហ៊ុនហង្សមាសលោកឧកញ៉ាអឹង ឆៃងួន បានឡើងជាឧកញ៉ាជាច្រើនឆ្នាំមកហើយ ខណៈដែលអតីតតារាហង្សមាសដែលធ្លាប់ធ្វើការនៅក្រោមការគ្រប់គ្រងរបស់លោកសុខលី គឺលោកព្រាប សុវត្ថិ និងខេមរៈ សិរីមន្ដ ក៍ក្លាយទៅជាឧកញ៉ាព្រមគ្នារួចដែរកាលពីឆ្នាំ២០២២ ។
គូរបញ្ជាក់ថាឱក សុគន្ធកញ្ញា នឹងប្រារពខួបកំណើតអាពាហ៍ ពិពាហ៍ របស់នាងគម្រប់៤ឆ្នាំនៅថ្ងៃទី១៦ ខែឧសភា ឆ្នាំ២០២៣ នេះដែលជារៀងរាប់ឆ្នាំនាងតែងតែដើរកម្សាន្ដជាមួយស្វាមីនិងកូនប្រុសនៅក្រៅស្រុក ឬញាំអាហារជុំគ្នាជាលក្ខណៈគ្រួសារ ហើយមានតារាល្បីៗរបស់ហង្សមាសទៅអបអរសាទរនាងដល់ផ្ទះតែម្ដង។គេចាំបានថាកាលសុគន្ធកញ្ញា ធ្វើពិធីខួបអាពាហ៍ ពិពាហ៍ គម្រប់អាយុ៣ឆ្នាំកាលពីឆ្នាំ២០២២ នោះតារាចម្រៀងដែលជិតដិតនិងFan នាងបានជួនពរឲ្យតារាវ័យ៣៦ឆ្នាំ រូបនេះឆាប់បានកូនម្នាក់ទៀតហើយគេដឹងថានាងចង់បានកូនស្រី តែរយៈពេល១ឆ្នាំមកនេះនាងនៅតែមិនទាន់ពពោះយកកូនថែមឡើយ។ចំពោះអ្នកចម្រៀងរួមអាជីពនិងFan របស់សុគន្ធកញ្ញា ជម្រុញឲ្យនាងយកកូន១ទៀតបែបនេះដោយសារតែពួកគេមើលឃើញថាស្វាមីនាងលោកសុខលី ក្រោយភរិយាបង្កើតកូនប្រុសឲ្យ១នោះលោករឹតតែស្រលាញ់សុគន្ធកញ្ញា លើសគ្រាផ្ដើមស្នេហ៍ដំបូងហេតុនេះគេជឿរថាបើសិនជាកញ្ញា ចង់ចងជើងស្វាមីហើយឲ្យលោកសុខលី ស្រលាញ់នាងស្ទើលេបនោះគឺការយកកូនថែម១ទៀតនោះច្បាស់ជានាងប្រៀបបានជាព្រះនាងជាមិនខាន ខណៈដែលពេលនេះនៅចំពោះមុខមិត្តភក្ដិឬនៅលើបណ្ដាញសង្គមប្ដីសុគន្ធកញ្ញា បានហៅនាងថាជា”ឧត្តមភរិយា” ឬ”មាតាដៃ១០០ “។តាមរយៈការដែលស្វាមីលើកលើកមុខភរិយាបែបនេះគេថាទោះជាពេលនេះសុគន្ធកញ្ញា មិនទាន់បានតំណែងជំទាវមែនទែនក៍ងារនេះមិននៅឆ្ងាយពីដៃនាងដែរ ហើយគេជឿរថាបច្ចុប្បន្ននាងមានក្ដីសុខពេញលេញទៅហើយព្រោះប្ដីបានផ្ដល់អ្វីៗគ្រប់យ៉ាងឲ្យនាងក្នុងនោះលោកស្រលាញ់នាងនិងក្រុមគ្រួសារដោយស្មោះត្រង់។
មុនត្រូវបានតារាប្រុសស្រីហៅឱក សុគន្ធកញ្ញា ថាជាជំទាវៗនោះមានតារានិងអតីតតារាមួយចំនួនទទួលបានតំណែងនេះទៅហើយក្នុងនោះមានដូចជាអ្នកនាងស្រីតូច ចំណាន ,ពេជ្រ ច័ន្ទបរមី ,ឱក បូរី ,ចន ច័ន្ទលក្ខិណា ,ផាន់ ម៉ូនីកា ,អ៊ឹម សុគន្ធា ,នៅ សុនិតា និងស៊ឹម សូលីកា ជាដើម។មជ្ឈដ្ឋានមហាជនរងចាំមើលថាតើនៅថ្ងៃខួបអាពាហ៍ ពិពាហ៍ ឆ្នាំទី៤ នេះសុគន្ធកញ្ញា នឹងអាចប្រកែករួចទៀតទេ ពេលមិត្តភក្ដិជម្រុញឲ្យយកកូនថែមជាថ្មី?
