ភ្នំពេញ៖ឱក សុគន្ធកញ្ញា បានបង្ហាញអារម្មណ៍មានមោទនភាពដែលនាងបានក្លាយទៅជាភរិយាលោកអ៊ឹង សុខលី ជាអគ្គនាយទូរទស្សន៍ហង្សមាស និងជាប្អូនថៅកែផលិតកម្មហង្សមាសលោកឧកញ៉ាអ៊ឹង ឆៃងួន ។សុគន្ធកញ្ញា បានចេញសារនៅថ្ងៃខួបអាពាហ៍ ពិពាហ៍ របស់នាងគម្រប់៤ឆ្នាំ នៅថ្ងៃទី១៦ ឧសភា ថាជាពេលវេលាដ៍លឿនសម្រាប់រូបនាងហើយនាងបានអរគុណស្វាមីដែលស័្មគ្រចិត្តចូលមកក្នុងជីវិតនាង ព្រមលំបាករួមគ្នា ដោយនាងចាត់ទុកលោកសុខលី ជាឪពុក បងប្រុស ជាមិត្ត ជាដៃគូប្រឹក្សាជីវិត ហើយនាងថាប្ដីបានធ្វើអ្វីៗគ្រប់បែបយ៉ាងទាំងអស់ ដើម្បីរូបនាងនិងកូនប្រុស ឲ្យមានស្នាមញញឹមគ្រប់ពេលវេលាជាមួយគ្នា។ចំណែកលោកសុខលី វិញបានតបសារទៅប្រពន្ធយ៉ាងខ្លីថាធ្មេញបើកៗគឺ៤ឆ្នាំបាត់ រីករយថ្ងៃខួបអាពាហ៍ ពិពាហ៍គម្រប់៤ឆ្នាំ …។
គេកត់សម្គាល់ថាសម្រាប់ខួបអាពាហ៍ ពិពាហ៍ របស់ឱក សុគន្ធកញ្ញា នៅឆ្នាំនេះខុសពីឆ្នាំមុនៗដែលនាងបានញាំអាហារជួបជុំគ្រួសារ និងមានតារាជិតដិតទៅជូនពរនាងដល់ផ្ទះតែម្ដង តែឆ្នាំនេះមិនមានតំណើរកម្សាន្ដនៅក្រៅស្រុក ឬជប់លៀងខ្នាតតូចដូចឆ្នាំមុនៗនោះទេ។យ៉ាងណាមូលហេតុដែលសុគន្ធកញ្ញា មិនទាន់ធ្វើពិធីសប្បាយៗសម្រាប់ថ្ងៃខួបមង្គលការរបស់ខ្លួននាពេលនេះអាចមកពីនាងមានការរវល់លើការត្រៀមច្រៀងសម្ដែងបិទព្រឹត្តិការណ៍ស៊ីហ្គេមកាលពីពេលថ្មីៗនេះ ខណៈដែលស្វាមីនាងមមាញឹកគ្រប់គ្រងទូរទស្សន៍។ប៉ុន្ដែតាមព័តមានថាសុគន្ធកញ្ញា នឹងនាំប្ដីនិងកូនប្រុសទៅដើរលេងនៅបរទេសនៅថ្ងៃបន្ទាប់ ព្រោះថាពេលនេះការច្រៀងសម្ដែងConcerts ធំៗរបស់នាងនៅតាមខេត្តក៍ចាប់ផ្ដើមស្បើយដែរហើយ ហេតុនេះជាទម្លាប់ក្រោយហត់នឿយពីការងារនាងនិងស្វាមីតែងតែឆ្លៀតទៅសម្រាកលំហែកាយ៉ានៅបរទេសរយៈពេលខ្លីនៅថ្ងៃពិសេសរបស់ពួកគេដើម្បីរឹតចំណងស្នេហាឲ្យកាន់តែរឹងមាំថែមទៀត។
គេចាំបានថានៅថ្ងៃខួបអាពាហ៍ ពិពាហ៍ របស់ឱក សុគន្ធកញ្ញា គម្រប់៣ឆ្នាំកាលពីឆ្នាំ២០២២ សារដែលនាងទទួលបានពីតារារួមអាជីព និងFan ច្រើនបំផុតនោះគឺពួកគេចង់ឲ្យនាងយកកូនថែមមួយទៀត ព្រោះតែគេដឹងថាកញ្ញា ចង់បានកូនស្រី ប៉ុន្ដែបំណងរបស់មិត្តភក្ដិមិនទាន់ទទួលបានលទ្ធផលនោះទេ ព្រោះ១ឆ្នាំកន្លងផុតទៅនេះនាងនៅតែអត់ទាន់ពពោះនៅឡើយ។អ្វីដែលគូរឲ្យកត់សម្គាល់នោះនៅមុនថ្ងៃខួបអាពាហ៍ ពិពាហ៍ ឆ្នាំទី៤ មកដល់នេះសុគន្ធកញ្ញា ត្រូវបានតារារួមអាជីពជាច្រើនបានហៅនាងថាជា”ជំទាវ”ៗ និងហៅស្វាមីនាងលោកសុខលី ថាជា”ឧកញ៉ា”ៗ ទៀតផង បើទោះជាគេមិនទាន់បានឃើញព្រះរាជកិ្រត្យតែងតាំងស្វាមីសុគន្ធកញ្ញា ជាផ្លូវការការត្រូវបានបញ្ចេញជាសាធារណៈ ហើយខ្លះថានោះគ្រាន់តែជាការហៅតៗគ្នារបស់តារារួមអាជីព ដើម្បីលើកតំកើងដល់កញ្ញា ដែលត្រូវបានគេចាត់ទុកថាជាតារាដ៍មានឥទ្ធិពលបំផុតនៅហង្សមាសក្ដី ។ប៉ុន្ដែសុគន្ធកញ្ញា បានអះអាងហើយថាស្វាមីបានប្រគល់អ្វីៗគ្រប់បែបយ៉ាងឲ្យនាងអស់ទៅហើយក្រោយចាប់ដៃគ្នា៤ឆ្នាំមកនេះ ដែលការលើកឡើងបែបនេះគឺហាក់ស្របគ្នាទៅនិងអ្នកគាំទ្រតារាចម្រៀងរូបនេះថានាងជោគជ័យទាំងអាជីពសិល្បៈ និងចម្រៀងព្រមគ្នានោះដែរ។
ថ្វីត្បិតតែឱក សុគន្ធកញ្ញា ត្រូវបានគេចាត់ទុកថានាងជាតារាដ៍មានអំណាច ក្រោយក្លាយជាប្អូនថ្លៃលោកថៅកែហង្សមាសក្ដី តែគេគត់សម្គាល់ថាបន្ទាប់ពីនាងមានប្ដី៤ឆ្នាំនេះអាជីពចម្រៀងកញ្ញា មិនសូវមានសន្ទុះខ្លាំងក្លាដូចមុនឡើយ ពោលគឺនៅទ្រឹង តែនាងមានភាពលេចធ្លោរក្នុងការងារស្ពតពាណិជ្ជកម្មច្រើនជាង។រឿងដែលសុគន្ធកញ្ញា ពិបាកវិលទៅរកភាពខ្លាំងក្លាដូចមុននោះគឺពេលនេះដៃគូសំខាន់របស់នាងលោកព្រាប សុវត្ថិ និងខែម ប៊ុនថៃ ធ្លាក់ទៅកណ្ដាប់ដៃGalaxy អស់ទៅហើយ ហេតុនេះកញ្ញា ពិបាករកដៃគូដ៍សាកសមក្រៅពីវិលទៅរកដៃគូចាស់លោកឆន សុវណ្ណារាជ ជាថ្មីម្ដងទៀត។
គូរបញ្ជាក់ថាក្រោយលោកខែម ប៊ុនថៃ ដើរចេញពីហង្សមាសនោះឱក សុគន្ធកញ្ញា ក៍គ្មានដំណឹងគ្រោងថតភាពយន្ដដែរ ក្រោយអាកខានថតរឿង”ខ្ញុំមានញាណលើស”ដែលជំនួសដោយសុខ ស្រីនាង ។អ្នកជំនាញសិល្បៈធ្លាប់លើកឡើងថាថៅកែហង្សមាសនឹងមិនបណ្ដោយឲ្យសុគន្ធកញ្ញា ធ្លាក់ចុះជាដាច់ខាត ពិសេសក្រោយនាងក្លាយទៅជាសមាជិករបស់ក្រុមគ្រួសារផលិតកម្មធំនេះ ប៉ុន្ដែទស្សនិកជនទេដែលជាអ្នកកំណត់វាសនាអាជីពរបស់នាងហើយបើកញ្ញា គ្មានអ្វីថ្មី ប្លែកទេ នោះ”រលកក្រោយ នឹងច្រានរលកមុន”ជាមិនខាន ។ជាក់ស្ដែងដូចជាពេលនេះនាងតន់ ច័ន្ទសីម៉ា កំពុងតែអុកទឡុកទីផ្សារចម្រៀងរហូតធ្វើឲ្យតារារៀមច្បងពិបាកទប់ទល់ទៀតផង ៕
