ភ្នំពេញ៖នៅទីបំផុតតារាចម្រៀងឃីន ស្រីនាថ ហៅអ៊ីវ៉ា មិនបានធ្វើជាកូនក្រមុំតាមការសន្យានៅឆ្នាំ២០២៣ នេះដែលនាងថាគម្រប់អាយុ៣០ឆ្នាំគត់បាយបាយភាពនៅលីវនោះទេ ដែលការសម្រេចចិត្តបែបនេះធ្វើឲ្យលោកអ៊ូ វ៉ាវ ដែលជាឪពុកនាងត្រូវខកចិត្តសារជាថ្មីម្ដង។មិនត្រឹមតែប្ដូរចិត្ត៣៦០ដឺក្រេ នោះទេ តែស្រីនាថ ថែមទាំងលែងហ៊ានបណ្ដើរបុរសម្នាក់ដែលគេសង្ស័យថាជាគូស្នេហ៍របស់នាងនោះទៀតផង ក្រោយមានការសួរនាំពីមិត្តរួមអាជីពច្រើនពេក។ចំណែកការព្យាយាមគេចរោងការរបស់អ៊ីវ៉ា នាពេលនេះគេជឿរថាគឺគ្មានហេតុណាផ្សេងដែលក្រៅពីនាងបារម្ភខ្លាចទីផ្សារចម្រៀងរបស់នាងធ្លាក់ចុះក្រោយការប្ដីឡើយ បើទោះជាលោកវ៉ាវ ថារឿងនេះអត់បញ្ហា ព្រោះទស្សនិកជនគាំទ្រតារានៅលើសម្ថភាពក្ដី តែស្រីស្អាតអ៊ីវ៉ា មិនបានយល់ស្របដូចលោកគិតនោះទេ។ដោយឡែកបុរសចម្លែកដែលដើរតាមអ៊ីវ៉ា មួយប្រាវហើយត្រូវគេម៉ៃថាជាអនាគតស្វាមីអ្នកចម្រៀងសាច់សខ្ចីរូបនេះ លោកក៍បាត់ខ្លួនឈឹងទៅវិញដែរ ខណៈដែលស្រីនាថ ព្យាយាមប្រាប់មិត្តភក្ដិថាបុរសនោះជាបងប្អូននាងទេ មិនមែនសង្សារឡើយ។
គូរបញ្ជាក់ថាតារាចម្រៀងឃីន ស្រីនាថ ហៅអ៊ីវ៉ា ត្រូវបានឪពុកនាងលោកអ៊ូ វ៉ាវ ហៅអ៊ូ ចន្ថា ជម្រុញឲ្យនាងរៀបការប្ដីរយៈពេល៣ឆ្នាំចុងក្រោយនេះ ព្រោះលោកវ៉ាវ ហាត់នឿយបើករថយន្ដជូនកូនស្រីទៅច្រៀងសម្ដែងនៅគ្រប់ឆាកតន្រ្ដីរយៈពេលជាង១០ឆ្នាំមកហើយ ហេតុនេះបើបានកូនប្រសារទៅអាចធ្វើកិច្ចការងារនោះជំនួសដៃជើងលោកបាន។លោកចន្ថា ថែមទាំងបង្ហើបថាបុរសណាក៍អាចធ្វើជាស្វាមីកូនលោកបានដែរឲ្យតែចូលចូវតាមផ្លូវច្បាប់ តែលោកថាមានតែមនុស្សប្រុស១ប្រភេទប៉ុណ្ណោះ ដែលមិនអាចក្លាយទៅជាកូនប្រសារលោកបានជាដាច់ខាតនោះគឺ”ប្ដីគេ”។លោកថាពាក្យត្រឹមពីរម៉ាត់នេះ ទោះជា”សេដ្ឋី”ក៍ផ្ទះលោកមិនស្វាគមន៍ជាដាច់ខាត។ដោយឡែកអ៊ីវ៉ា ធ្លាប់ប្រាប់អ្នកយកព័តមានយើងថាសម្រាប់រូបនាងមនុស្សស្រីវ័យ៣០ឆ្នាំគឺល្មមរៀបការប្ដី ព្រោះមិនក្មេងពេក ឬចាស់ពេកទេ ហើយចង់នាងគិតគូរឿងរៀបការនៅវ័យនេះហើយដែលនៅឆ្នាំ២០២៣ នាងនឹងឈានដល់អាយុ៣០ឆ្នាំគត់ ។ប៉ុន្ដែចូលមកដល់ពេលវេលាត្រូវកំណត់ដឹកដៃគូស្នេហ៍រៀបអាពាហ៍ ពិពាហ៍ ស្រីនាថ បែជាធ្វើឲ្យលោកវ៉ាវ និយាយមិនចេញព្រោះនាងអូសក្រឡាយកប្ដីជាថ្មីម្ដងទៀតទៅហើយ។
គូររំលឹកថាអ៊ីវ៉ា តាំងពីចូលប្រឡូកក្នុងអាជីពចម្រៀងជាង១០ឆ្នាំមកនេះនាងមិនធ្លាប់ប៉ៈរឿងអាស្រូវស្នេហានោះទេ ព្រោះឪពុកម្ដាយតាមនាងជាប់ជានិច្ច។ប៉ុន្ដែនៅឆ្នាំ២០២៣ នៅពេលដែលម្ដាយអ៊ីវ៉ា អ្នកស្រីភួង សុខា បានទទួលមរណៈភាពនោះ ក៍ជាពេលវេលាដែលនាងបានចែកផ្លូវជាមួយលោក”ប”ដែលជាថៅកែក្លឹប និងហាងបញ្ចាំនៅក្រុងសៀមរាបផងដែរ ហើយរយៈពេលជាង១០ឆ្នាំនេះទោះជាមានព័តមានថាប្អូនមន្រ្ដីធំផ្កាយ៣ រូបនោះ នៅតែស្រលាញ់ស្រីនាថ ដោយគ្មានការប្រែប្រួលចិត្តបន្ដិចក្ដី តែនាងគ្មានសញ្ញាផ្សះផ្សារស្នេហ៍ចាស់នោះទេ ហើយអ្វីដែលនាងបានប្រហារបេះដូងប្អូនលោកធំនោះដោយបិតច្រកស្នេហ៍នោះគឺនៅដើមឆ្នាំ២០២០ ស្រីនាថ ហ៊ានបង្ហើបថាបុរសជាគូស្នេហ៍របស់នាងគឺជាអ្នកធ្វើការនៅក្នុងវិស័យកីឡារម្នាក់ តែនាងមិនបញ្ចេញឈ្មោះឬមុខមាត់ឲ្យគេស្គាល់នោះទេ។ការវាចាយ៉ាងខ្លីបែបនេះគឺគ្រប់គ្រាន់សម្រាប់លោកថៅកែ ព្រោះអ៊ីវ៉ា មានម្ចាស់បេះដូងថ្មីទៅហើយ មិនមែនបេះដូងនៅទំនេរឡើយ។ប៉ុន្ដែនៅឆ្នាំ២០២៣ ទើបអ៊ីវ៉ា ចាប់ផ្ដើមហ៊ានបណ្ដើរប្រុសចម្លែកម្នាក់ដើម្បីឲ្យថៅកែឃើញកាន់តែច្បាស់ តែគូរឲ្យស្ដាយដោយសារតែពេលនេះនាងមួម៉ៅគេសួរនាំច្រើនពេកទើប ពួកគេជ្រើសផ្លូវលែងបង្ហាញមុខរួមគ្នាជាចំហតែម្ដង។
គេកត់សម្គាល់ថានៅឆ្នាំ២០២៣ នេះអ៊ីវ៉ា ក៍គ្មានផែនការណ៍ប្ដូរផលិតកម្មច្រៀងដែរ បើទោះជាមានព័តមានថាមានផលិតកម្មដល់ទៅ៣គឺGalaxy ,ថោន និងហង្សមាស ពេញចិត្តនិងចង់ឲ្យនាងធ្វើជាសមាជិករបស់ពួកគេក្ដី។លោកវ៉ាវ ធ្លាប់ប្រាប់ថាកូនស្រីគាត់នឹងធ្វើការសិល្បៈទៅតាមពេលវេលា ពោលគឺមិនហ៊ានសន្យាថានឹងច្រៀងឲ្យសាន់ដេរហូតចប់អាជីពឡើយ។តែលោកថាស្រីនាថ ចាត់ទុកសាន់ដេជាឪពុកម្ដាយទី២ ព្រោះនាងមានកេរ្ដិ៍ឈ្មោះរហូតមកដល់សពថ្ងៃនេះក៍ព្រោះតែផលិតកម្មនេះហើយជាអ្នកបណ្ដុះបណ្ដាល។ប្រភពបានឲ្យដឹងថាអ៊ីវ៉ា ត្រូវបានGalaxy ចាប់អារម្មណ៍ខ្លាំងព្រោះថាផលិតកម្មថ្មី ចាយលុយធំនេះមានសុទ្ធតែតារាល្បីប្រុសៗ តែតារាស្រីខ្សត់ ។តែស្រីនាថ ថាទាក់ទងការទៅផលិតកម្មថ្មីនាងមិនធ្វើអត្ថាធិប្បាយទេ ព្រោះពេលនេះនាងនៅតែជាអ្នកចម្រៀងរបស់សាន់ដេដដដែល ហើយថែមទាំងទទួលបានសិទ្ធិពិសេសទៀតផងពោលគឺច្រៀងដោយគ្មានកុងត្រា នឹងច្រៀងតែបទដែលខ្លួនឯងស្រលាញ់ ចំពោះបទមិនពេញចិត្តអាចបដិសេធបាន។
គេចាំមើលថាអ៊ីវ៉ា នឹងដោះសារយ៉ាងណាទៀតចំពោះលោកវ៉ាវ រឿងគេចរៀបការប្ដីនៅឆ្នាំ២០២៣ ព្រោះខ្លាចធ្លាក់កូដនេះ?
