អង្គុយផឹកស៊ីទុកកាបូបក្នុងរថយន្ត ត្រូវក្រុមចោរវាយកញ្ចក់យកបាត់

ភ្នំពេញ៖ ជនសង្ស័យមានគ្នា០៣នាក់ ជិះម៉ូតូ១គ្រឿង ធ្វើសកម្មភាពឆ្កឹះសោទ្វាររថយន្ត និងវាយកញ្ចក់យកកាបូបដាក់Ipad១គ្រឿង iPhone 6plus ១គ្រឿង និងឯកសារមួយចំនួន ជិះគេចខ្លួនបាត់ស្រមោលបន្សល់ទុកទូរស័ព្ទអិនចុចពិល១គ្រឿង នៅនឹងកន្លែងកើតហេតុ បង្កការភ្ញាក់ផ្អើលកាលពីវេលាម៉ោង៣និង១៥នាទីទៀបភ្លឺ ឈានចូលថ្ងៃទី៨ ខែមករាឆ្នាំ២០១៧ នៅចំណុចមុខផ្ទះយីហោដីហ្វូនខាផេត លក់កំរាលព្រំគ្រប់ប្រភេទ ផ្លូ២៧១សង្កាត់ ទឹកល្អក់ទី៣ ខណ្ឌទួលគោក។

រថយន្តដែលក្រុមជនសង្ស័យឆ្កឹះសោ និងវាយកញ្ចក់យកកាបូបនោះHighlander ពណ៌ស ពាក់ស្លាកលេខភ្នំពេញ 2V-3960 ជនរងគ្រោះម្ចាស់រថយន្តមានឈ្មោះពៅ សម្បត្តិ ភេទប្រុសអាយុ២៦ឆ្នាំ មុខរបរបើកបររថយន្ត មានទីលំនៅភូមិលូ សង្កាត់ស្វាយប៉ាក ខណ្ឌឬស្សីកែវ សម្ភារៈដែលបាត់បង់នៅក្នុងកាបូបនោះ មានIpad ១គ្រឿង ទូរស័ព្ទ iPhone 6plus ១គ្រឿង កាតបើកបរ១សន្លឹក អត្តសញ្ញាណប័ណ្ណ១សន្លឹក និងឯកសារមួយចំនួនទៀត។ រីឯមិត្តភក្កិប្រុសស្រី០៣នាក់ទៀត មិនត្រូវបានស្គាល់ឈ្មោះទេ ជិះរថយន្ត១គ្រឿង ម៉ាកកាមរីបាឡែន ពណ៌ស ពាក់ស្លាកលេខ 2AK-7811។ចំណែកឯក្រុមជនសង្ស័យមានគ្នា០៣នាក់ ជិះម៉ូតូម៉ាកSuzuki Smas មិនចាំពណ៌ និងស្លាកលេខ។

តាមប្រភពព័ត៌មានពីជនរងគ្រោះ បានឱ្យដឹងថា នៅមុនពេលកើតហេតុរូបគេនិងមិត្តភក្កិមានគ្នា០៤នាក់ ជិះរថយន្ត០២គ្រឿង មកឈប់ចតនៅមុខផ្ទះកើតហេតុ ហើយបាននាំគ្នាទៅអង្គុយផឹកស៊ីនៅតាមចិញ្ចើមផ្លូវចម្ងាយពីកន្លែងចតរថយន្តប្រមាណជា១០ម៉ែត្រ ហើយអង្គុយហូបចុកនិងបានទុកកាបូបនៅក្នុងរថយន្តម៉ាក Highlander ហើយបានចាក់សោត្រឹមត្រូវ។

បន្ទាប់ពីផឹកស៊ីចប់ ជនរងគ្រោះបានដើរទៅយកកាបូបលុយនៅក្នុងរថយន្ត ស្រាប់តែឃើញជនសង្ស័យមាន០៣នាក់ កំពុងតែឆ្កិះទ្វាររថយន្ត និងវាយកញ្ចក់យកកាបូបស្ពាយពីក្នុងរថយន្ត ជិះម៉ូតូ១គ្រឿងរត់គេចខ្លួនបាត់ បន្សល់ទុកទូរស័ព្ទអិនចុចពិល១គ្រឿង នៅនឹងកន្លែងកើតហេតុ។
ក្រោយកើតហេតុ ជនរងគ្រោះបានរត់ទៅសមត្ថកិច្ចប៉ុស្តិ៍នគរបាលរដ្ឋបាលទឹកល្អក់ទី៣ ឱ្យជួយអន្តរាគមន៍៕