ភ្នំពេញ៖នៅដើមឆ្នាំ២០២៣ នេះមានតារាចម្រៀងដល់ទៅ៤ដួងដែលរងការខកចិត្តដោយសារតែការច្រៀងសម្ដែងបទចម្រៀងរបស់ពួកគេរងនូវការរិះគន់ ខណៈដែលបទខ្លះចេញបានតែមិនអាចយកទៅបង្ហាញក្នុងព្រឹត្តិការណ៍ធំដូចការរំពឹងទុក និងបទខ្លះទៀតចេញហើយ ត្រូវបានលុបចេញវិញ។
១៖ងួន ចាន់ដេវីត៖បទ”មហានគរ”របស់តារាចម្រៀងរ៉េប លោកងួន ចាន់ដេវីត មិនត្រូវបានជ្រើសចូលឲ្យយកទៅច្រៀងសម្ដែងក្នុងព្រឹត្តិការណ៍បើកស៊ីហ្គេម ឆ្នាំ២០២៣ កាលពីថ្ងៃទី៥ ខែឧសភា ឆ្នាំ២០២៣ ដែលកម្ពុជាធ្វើជាម្ចាស់ផ្ទះនោះទេដោយសារតែមានការវែកញែកថាចំណងជើងបទនេះមានអក្សរខ្លះបញ្ច្រាស បើទោះជាចុងក្រោយមកមានការកែតម្រូវឲ្យទៅជាធម្មតាវិញក្ដី។ដោយសារតែទាំងបើកនិងបិទស៊ីហ្គេម មិនត្រូវបានអ្នករៀបចំកម្មវិធីតម្រូវទើបដេវីត បានដឹកដៃបូព្រឹក្ស ទៅដើរលេងកម្សាន្ដនៅបារាំង និងក្រិករយៈពេលខ្លីបំបាត់តុកស៊ិកទើបវិលវិញ។
២៖ព្រាប សុវត្តិ និងតន់ ច័ន្ទសីម៉ា ៖ការយកបទ”មីឆុង មីកំប៉ុង មីឆា”ទៅច្រៀងសម្ដែងរួមគ្នារបស់លោកព្រាប សុវត្តិ និងតន់ ច័ន្ទសីម៉ា នៅថ្ងៃបើកព្រឹត្តិការណ៍ស៊ីហ្គេមលើកទី៣២ នោះ ធ្វើឲ្យមានការរិះគន់ច្រើន ព្រោះអត្ថន័យបទចម្រៀងទាំងមូលមិនត្រូវទៅនិងកម្មវិធី ឬគ្មានចំណុចណា១លើកស្ទួយពីវប្បធ័មជាតិ នោះទេ។ការច្រៀងសម្ដែងបទនេះលោកព្រាប សុវត្ថិ ត្រូវបានគេឌឺដងច្រើនជាងតន់ ច័ន្ទសីម៉ា ព្រោះថាលោកមានអាយុ៤៨ឆ្នាំ ទៅហើយ និងល្បីល្បាញក្នុងអាជីពចម្រៀងជាង២០ឆ្នាំ រឿងអីដែលលោកមើលមិនដឹងថាបទណាដែលអាចឬមិនអាចយកទៅច្រៀងកម្មវិធីលក្ខណៈថ្នាក់អន្ដរជាតិបែបនេះ?ប៉ុន្ដែភ្លាមៗនោះលោកព្រាប សុវត្ថិ ថាលោកច្បាស់និងប្រាកដខ្លួនឯងនូវអ្វីដែលលោកធ្វើ ដែលនោះបញ្ជាក់ថាលោកគ្មានការរារែកចិត្ត ឬស្ដាយក្រោយចំពោះការលើកយកចម្រៀង១បទនោះទៅបកស្រាយឡើយ។យ៉ាងណាសន្ទុះដូចបាក់ទឹកទំនប់រិះគន់ទៅលើព្រាប សុវត្ថិ នោះហាក់ថមថយ និងស្ងាត់ទៅវិញក្រោយពីលោកនាយករដ្ឋមន្រ្ដីបានមានប្រសាសន៍ថាបទ”មីឆុង មីកំប៉ុង មីឆា”ដែលព្រាប សុវត្ថិ និងតន់ ច័ន្ទសីម៉ា យកទៅច្រៀងនោះគឺគ្រាន់តែជាការអមឆាក មុនពេលព្រឹត្តិការណ៍ស៊ីហ្គេមបើកជាផ្លូវការប៉ុណ្ណោះ ព្រោះជាទូទៅតារាមកដល់តាំងពីម៉ោង២Pm តែកម្មវិធីតំណើរការនៅម៉ោង៦ ឬ ៧ ល្ងាចឯណ្ណោះ។លោកនាយករដ្ឋមន្រ្ដីក៍បានសន្យាថាលោកនឹងឡង់សេបទចម្រៀងមួយនេះឲ្យកាន់តែល្បីថែមទៀតផងដែរ។
៣៖មាស សុខសោភា ៖បទ”មរណភាពព្រះស្វាមី ជ័យរ្ម័នទី៧ “របស់មាស សុខសោភា ចេញបានតែប៉ុន្មានម៉ោងប៉ុណ្ណោះក៍ត្រូវបានអ្នកស្រាវជ្រាវប្រវត្តិសាស្រ្ដ និងមហាជនផ្ទុះប្រតិកម្មខ្លាំង ដោយចាត់ទុកថាចម្រៀងមួយបទនេះប្រាសចាកពីប្រវត្តិសាស្រ្ដពិត ឬគ្មានភស្ដុតាងយោង ទើបលោកនាយរដ្ឋមន្រ្ដី និងក្រសួងវប្បធ័ម និងវិចិត្រសិល្បៈស្នើរឲ្យម្ចាស់បទលុបបទនេះចេញពីហ្វេសបុក និងការបង្ហោះនានាជាបន្ទាន់។មាស សុខសោភា បានចេញសារសុំទោសប្រមុខថ្នាក់ដឹកនាំ និងអ្នកពាកព័ន្ធទាំងអស់ រួមទាំងមហាជនជុំវិញបទចម្រៀង១បទនេះរបស់នាងដោយអតីតតារារាម រូបនេះថាខ្លួននិងប្រឹងស្រាវជ្រាវរឿងរ៉ាវទាំងឡាយទាក់ទងប្រវត្តិសាស្រ្ដបន្ថែមទៀត។សម្រាប់Fan របស់សុខសោភា នៅតែគាំទ្រអ្នកចម្រៀងសំនៀងផ្អែមរូបនេះហើយថានេះមិនមែនជាកំហុសទាំងស្រុងរបស់នាងឡើយព្រោះជាអ្នកចម្រៀង ច្រៀងតែតាមអ្នកនិពន្ធនោះគឺលោកតាសក់ស ភ្នំត្បែង ដែលកន្លងមកលោកក៍ធ្លាប់បានសរសេរបទចម្រៀងមួយចំនួនឲ្យសោភា ច្រៀងដែរ បន្ទាប់ពីនាងបង្ហាញការគោរពនិងមានជំនឿរស៊ប់ទៅលើតាបសរូបនេះជាច្រើនឆ្នាំមកហើយ។ប៉ុន្ដែពួកគេលើកឡើងថាជាតារាល្បីល្បាញម្នាក់ដូចសុខសោភា គូតែមានការប្រុងប្រយ័ត្នឲ្យបានខ្ពស់ ព្រោះសិល្បៈជាអាវុធមុខពីរ បើបង្ហាញអ្វីដែលល្អត្រូវអ្នកគាំទ្រយកទៅធ្វើតាម និងរីកចម្រើនដល់សង្គមជាតិ ប៉ុន្ដែបើយកប្រវត្តិសាស្រ្ដមកបំភ្លៃនោះកូនខ្មែរនិងវង្វេងប្រវត្តិសាស្រ្ដរបស់ខ្លួនជាមិនខាន។យ៉ាងណាគេជឿរថាតារាដែលរងការខកចិត្តខាងលើនេះគ្រាន់តែចង់បង្ហាញអ្វីដែលថ្មី ប្លែក ឲ្យFan បានឃើញនិងជាឯកសារចម្រៀងរបស់ពួកគេប៉ុណ្ណោះ គ្មានគំនិតណាមួយធ្វើឲ្យប៉ៈពាល់ដល់អារម្មណ៍ ឬកែប្រែប្រវត្តិសាស្រ្ដនោះទេ។ចំណែកភាពក្លាហានហ៊ានទទួលស្គាល់កំហុសអចេតនារបស់សុខសោភា នាពេលនេះគឺជាគំរូល្អមួយសម្រាប់តារាផ្សេងៗទៀត ព្រោះមនុស្សអ្នកណាមិនចេះខុស ប៉ុន្ដែ”សូមកុំខុសដដែលៗ”៕
