ភ្នំពេញ៖ឆាយ វីរៈយុទ្ធ ជាតារាស្នូលរបស់សាន់ដេ ដែលលោកអាចច្រៀងបានទាំងបទប្រើប្រាស់សម្លេងទាប និងខ្ពស់ បានដូចគ្នា ហើយតាមព័តមានថាលោកជាគោលដៅរបស់ហង្សមាសជាច្រើនឆ្នាំមកហើយ ពិសេសគឺក្រោយ ពេលដែលលោកព្រាប សុវត្ថិ និងខេមរៈ សិរីមន្ដ ដឹកដៃគ្នាចូលGalaxy នោះគេមើលឃើញថាលោកចាន់ឆោម មានភាគរយខ្ពស់ជាងតារាចម្រៀងប្រុសផ្សេងៗទៀតដែលអាចទៅជំនួសតារាទាំងពីរបាន។
តើឆាយ វីរៈយុទ្ធ អាចទៅអង្គុយកៅអីព្រាប សុវត្ថិ និងខេមរៈ សិរីមន្ដ នៅហង្សមាសដែលនៅទំនេរ ឬទេ?
លោកឆាយ ចាន់ឆោម ហៅឆាយ វីរៈយុទ្ធ បានប្រាប់អ្នកយកព័តមានយើងតាមទូរស័ព្ទកាលពីរសៀលថ្ងៃទី៦ មិថុនា ថាបច្ចុប្បន្នលោកនៅតែជាតារាចម្រៀងរបស់សាន់ដេនៅឡើយ និងមានកុងត្រាទៀតផង តែលោកមិន អាចនិយាយថាកុងត្រានៅវែងឬខ្លីបានទេ។លោកឆោម ថាលោកមានក្ដីសុខជាមួយសាន់ដេ តែការងារសិល្បៈ គឺធ្វើទៅតាមពេលវេលា ហេតុនេះលោកមិនអាចនិយាយទុកជាមុនបានទេ ថានឹងមានរឿងអ្វីកើតឡើង។
ឆ្លើយតបសំណួរថាតើហង្សមាសធ្លាប់ទាក់ទងលោកដែរឬទេ ក្រោយព្រាប សុវត្ថិ និងខេមរៈ សិរីមន្ដ បានចាក ចេញនោះលោកវីរៈយុទ្ធ ប្រាប់យ៉ាងខ្លីថារឿងមួយនេះលោកមិនអាចប្រាប់បានទេ ។
Composer ម្នាក់នៅហង្សមាសបានប្រាប់អ្នកយកព័តមានយើងតាមទូរស័ព្ទក្នុងល័ក្ខខណ្ឌមិនបញ្ចេញឈ្មោះ ថាតាមពិតហង្សមាសចង់បានឆាយ វីរៈយុទ្ធ ជាយូឆ្នាំមកហើយ មិនមែនទើបតែព្រាប សុវត្ថិ និងខេមរៈ សិរីមន្ដ ចេញនោះទេ។លោកគ្រូភ្លេងរូបនោះថាភាគរយឆាយ វីរៈយុទ្ធ អាចទៅហង្សមាសមានច្រើនជាងមុន ពិសេសគឺ នៅពេលដែលព្រាប សុវត្ថិ មិននៅតែម្ដង ព្រោះតែពីមុនឭថាវីរៈយុទ្ធ មិនទៅទីនោះដោយសារតែមិនចង់ប្រជែងជាមួយបងប្អូនគាត់គឺព្រាប សុវត្ថិ អីចឹងពេលហ្នឹងលោកសុវត្ថិ មិននៅរឿងអីដែលថាលោកឆោម មិនអាចមកហ្នឹងបាន…។
ឆាយ វីរៈយុទ្ធ ស្ថិតក្នុងចំណោមតារាចម្រៀងប្រុសលំដាប់ជូរមុខនាពេលបច្ចុប្បន្ន ព្រោះរាល់កម្មវិធី ប្រលង ចម្រៀងទាំងឡាយនៅហង្សមាសភាគច្រើនបេក្ខជនមិនដែលរំលងបទចម្រៀងរបស់លោកឡើយទើប ធ្វើ ឲ្យលោកវីរៈយុទ្ធ នៅតែបង្ហាញខ្លួនតាមឆាកតន្រ្ដីធំៗជាបន្ដបន្ទាប់ជារៀងរាល់ឆ្នាំ។ដោយឡែកសម្រាប់ការរក ប្រាក់ចំណូលនៅរដូវក្ដៅឆ្នាំ២០២២ -២០២៣ កន្លងមកនេះវិញលោកវីរៈយុទ្ធ បានឲ្យដឹងថាទទួលបាន ខ្ពស់ជាង ឆ្នាំមុន ព្រោះតែកូវីដស្ងប់ស្ងាត់មានការប្រគុំតន្រ្ដីច្រើន ហើយសូម្បីតែចូលដល់ខែ៦ ដែលជារដូវធ្លាក់ភ្លៀងនេះក៍លោកនៅតែចេញច្រៀងតាមខេត្តក្រុងទាំងឡាយសឹងជារៀងរាល់ថ្ងដែរ។តែលោកចាន់ឆោម មិនប្រាប់ថាលោករកប្រាក់ចំណូលពីសិល្បៈបានប៉ុន្មានក្នុង១ឆ្នាំឡើយ។
គូរបញ្ជាក់ថាលោកឆាយ វីរៈយុទ្ធ ត្រូវជាក្មួយសាច់ថ្លៃរបស់លោកព្រាប សុវត្ថិ ព្រោះលោកសុវត្ថិ ត្រូវជាឪពុក មាបង្កើតរបស់ភរិយា(ដើម)របស់លោក។ដោយសារតែលោកឆោម និងឧកញ៉ាសុវត្ថិ ជាប់សាច់ឈាម និងគ្នា បែបនេះហើយទើបជាច្រើនឆ្នាំមកនេះតែងលេចឭថាលោកវីរៈយុទ្ធ មិនចង់ទៅហង្សមាសព្រោះ តែមិនចង់ ប្រជែងជាមួយបងប្អូនខ្លួន។ប៉ុន្ដែពេលនេះបើលោកចង់ទៅគឺគ្មានឧបស័ក្កទៀតនោះទេ បើទោះជាលោក ថា កំពុងមានក្ដីសុខនៅសាន់ដេក្ដី ប៉ុន្ដែលោកឆោម ធ្លាប់ផ្លាស់ប្ដូរផលិតកម្មជាច្រើនមកហើយដូចជាលោកធ្លាប់ច្រៀងនៅBlue Diamond ,M ,Big Men និងចុងក្រោយទើនៅសាន់ដេ រហូតដល់បច្ចុប្បន្ននិងក្លាយទៅជាដៃ គូឆ្លងឆ្លើយរបស់ស្រីស្អាតសុខ ពិសី ទៀតផង។
ឆាយ វីរៈយុទ្ធ បានរៀបការកាលពីថ្ងៃទី២១ ខែឧសភា ឆ្នាំ២០១៧ ជាមួយអ្នកនាងសែ ចាន់ឌី ដែលជាកូនសេដ្ឋី នៅក្រុងកំពង់ចាមលោកហាក់ សែ ហើយពេលនេះទទួលបានចំណងដៃកូនស្រី១ អាយុជាង៤ឆ្នាំ ខណៈដែល លោកថាចង់បានកូនម្នាក់ទៀតនាពេលឆាប់ៗខាងមុខនេះដែរ។ប្រភពបានឲ្យដឹងថាសាន់ដេមិនចង់បាត់បង់ លោកវីរៈយុទ្ធ នោះទេ ក្រោយផលិតកម្មមួយនេះរបូតតារាដល់ទៅ៥ដួងទៅហង្សមាសនាពេលកន្លង មកនោះ គឺឱក សុគន្ធកញ្ញា ,សុខ ស្រីនាង,ខេមរៈ សិរីមន្ដ ,យូរី និងនីកូ ៕