ភ្នំពេញ៖ព្រាប សុវត្ថិ បានបើយុទ្ធសាស្រ្ដថ្មីខុសពីមុនពោលគឺកាលនៅហង្សមាសលោកបាននាំយកកូនទាំង៣ចេញច្រៀងសម្ដែងរូបគ្នាដោយមានបទខ្លះពួកគេទាំង៣ ត្រូវច្រៀងសម្ដែងជាមួយគ្នា និងជូនកាលចាប់ដៃជាមួយលោកតែម្ដង។ប៉ុន្ដែពេលនេះព្រាប សុវត្ថិ បញ្ចេញតែកូនប្រុសច្បងម្នាក់ប៉ុណ្ណោះក្នុងការច្រៀងផលិតកម្មរួមអាមួយលោកនោះគឺសុវត្ថិ មុនីវណ្ណ ខណៈដែលកូនកំលោះទី២ សុវត្ថិ មុនីនាគ និងកូនទី៣ សុវត្ថិ សិរីវុឌ្ឍ លោកឧកញ៉ាសុវត្ថិ នៅផ្អឹបនៅឡើយ បន្ទាប់ពីពួកគបានផុតកុងត្រានៅហង្សមាស។
សំណួរដែលមហាជនចង់ដឹងថាតើហេតុអ្វីបានជាព្រាប សុវត្ថិ មិនយកកូនទាំង៣ចូលGalaxy ដូចដែលលោកធ្លាប់ធ្វើនៅហង្សមាស?
អ្នកជំនាញសិល្បៈបានលើកឡើងថារឿងព្រាប សុវត្ថិ មិនទាន់បញ្ចេញកូនទី២ និងទី៣ នាពេលនេះព្រោះតែចង់រក្សារតម្លៃកូនៗរបស់លោកដើម្បីកុំឲ្យគេថាយកទៅម្ដងទាំង៣ ហាក់ដូចជាមិនមានអ្វីដែលទាក់ទាញផ្សេងទៀត។អតីតតារាចម្រៀងហង្សមាសលោកនូ ស៊ឹប បានប្រាប់អ្នកយកព័តមានយើងតាមទូរស័ព្ទកាលពីរសៀលថ្ងៃទី១២ មិថុនា ថាព្រាប សុវត្ថិ ជាអ្នកមានចំណេះដឹងខ្ពស់ម្នាក់ក្នុងចំណោមឧកញ៉ាៗហេតុនេះការដែលលោកមិនយកកូនទាំង៣ចូលGalaxy ព្រមគ្នាដូចនៅហង្សមាសនោះអាចជាយុទ្ធសាស្រ្ដមួយ និងអាថ័កំបាំងមិនឲ្យគេដឹងមុន។លោកថារឿងនេះគ្មានអ្នកណាអាចឆ្លើយច្បាស់ជាងព្រាប សុវត្ថិ នោះទេ ព្រោះនេះជាការរៀបចំកូនៗរបស់លោក ខណៈដែលរូបលោកផ្ទាល់ក៍មិនអាចសន្និដ្ឋានបានទេថាតើលោកសុវត្ថិ នឹងយកកូន២នាក់ទៀតចូលGalaxy នាពេលបន្ទាប់ឬយ៉ាងណាទេ?តារាចម្រៀងជើងចាស់រូបនេះបន្ថែមថាអំឡុងពេលដែលព្រាប សុវត្ថិ នាំកូនចូលហង្សមាសទាំង៣នាក់នោះតាមលោកមើលកូនៗរបស់ឧកញ៉ានេះកាលនោះក៍មិនសូវលេចធ្លោខ្លាំងដែរ ពោលគឺមិនទាន់អាចធ្វើព្យុះភ្លៀងបានទេ ហេតុនេះលោកគិតថាការឲ្យកូនតែមួយចូលច្រៀងនៅGalaxy ទុក២នាក់សិននាពេលនេះរបស់ព្រាប សុវត្ថិ គឺជាការរៀបចំឲ្យកូនៗគាត់កាន់តែមានគោលដៅច្បាស់លាស់ជាងមុន។
តាមរយៈការលើកឡើងរបស់លោកនូ ស៊ឹប បែបនេះគេក៍អាចសន្និដ្ឋានបានថាលោកព្រាប សុវត្ថិ អាចនឹងរុញកូន២នាក់ទៀតរបស់លោកឲ្យដើរលើវិថីជំនួញបន្ថែមពីលើអាជីពចម្រៀងផងដែរ ព្រោះលោកសុវត្ថិ មានមុខរបរជាច្រើនក្រៅពីសិល្បៈនៅឆ្នាំ២០២៣ នេះពិសេសលោកចាប់ដៃជាមួយឧកញ៉ាៗកាន់តែច្រើនក្រោយលោកទទួលបានគោរម្យងារជាឧកញ៉ារយៈពេលជាង១ឆ្នាំនេះមក។ដោយឡែកក្នុងជំនួបជាមួយអ្នកកាសែតកន្លងមកលោកព្រាប សុវត្ថិ ថាកូនៗលោកសុទ្ធតែមានដុងសិល្បៈ ហេតុនេះលោកថាទេពកោសល្យមួយនេះគឺមិនអាចបោះបង់បានទេ គឺគ្រាន់តែរងចាំពេលវេលាដែលត្រូវបញ្ចេញប៉ុណ្ណោះ ហើយអ្វីៗបានរៀបចំជាស្រេចអស់ទៅហើយ។ប៉ុន្ដែសម្រាប់Fan កូនៗលោកសុវត្ថិ វិញបានលើកឡើងថាបើលោកឧកញ៉ាវ័យ៤៨ឆ្នាំ រូបនេះនៅតែផ្អឹបកូនកំលោះទាំងពីររបស់លោកតទៅទៀតដោយមិនកំណត់ពីពេលវេលាឡើងឆាកសារជាថ្មីឲ្យបានជាក់ទេ នោះច្បាស់ជាធ្វើឲ្យពួកគេពិបាកក្នុងការស្ដារមុខមាត់ម្ដងទៀតជាមិនខាន ព្រោះថាបច្ចុប្បន្នតារាផ្នែកយុវវ័យលេចមុខកាន់តែច្រើនឡើងៗ។
មជ្ឈដ្ឋានមហាជនមើលឃើញថាព្រាប សុវត្ថិ មិនត្រឹមតែប្ដូរវិធីក្នុងការលើកកូនៗរបស់នោះទេ ប៉ុន្ដែនៅឆ្នាំ២០២៣ នេះសុវត្ថិ មុនីនាគ ដែលជាកូនច្បងរបស់លោកក៍បានប្ដូរស្ទីលច្រៀងសម្ដែងផងដែរ នោះគឺពីមុនធ្លាប់តែច្រៀងបែបមនោសញ្ចេតនាតាមឪពុករបស់គេ តែពេលនេះឈានទៅច្រៀងចង្វាក់ហ៊ីបហបរ៉េបទៅវិញ ដោយមានការគាំទ្រយ៉ាងពេញទំហ៊ឹងពីលោកសុវត្ថិ ទៀតផង។តែក្រៅពីនៅលើឆាកតន្រ្ដីនោះព្រាប សុវត្ថិ និងកូនច្បងមិនទាន់ចេញបទរួមគ្នានៅGalaxy ឡើយ ខណៈដែលតាមព័តមានថាឥទ្ធិពលរបស់លោកសុវត្ថិ បើលោកចង់ឲ្យកូន២នាក់ទៀតចូលច្រៀងនៅផលិតកម្មថ្មីនេះដែរ ច្បាស់ជាថៅកែផលិតកម្មនឹងសម្របខ្លួនតាមជានិច្ចព្រោះថាកូនៗរបស់លោកមានសម្ថភាពម្យាងៗម្នាក់មិនមែនល្បីឈ្មោះទាំងស្រុងដោយសារតែឪពុកគេសណ្ដោងនោះទេ។
លោកនូ ស៊ឹប បន្ថែមថាលោកមិនដែលបានតាមដានសម្ថភាពរបស់ទាំង៣លោកព្រាប សុវត្ថិ នោះទេ ព្រោះបច្ចុប្បន្នលោករស់នៅជាយក្រុង អត់សូវមានអ៊ីនធើណេតប្រើ ហេតុនេះមិនអាចធ្វើការវាយតម្លៃថាតើកូនៗរបស់ព្រាប សុវត្ថិ នៅចំណុចណាបានឡើយ។ប៉ុន្ដែលោកជឿរថាព្រាប សុវត្ថិ អាចនឹងមានវិធីថ្មីផ្សេងទៀតដើម្បីឲ្យកូនៗទាំងពីររបស់លោកដែលមិនទាន់ចេញមុខជាថ្មីនោះពេលមកវិញមានការចាប់អារម្មណ៍ជាងមុនដែលនោះគឺជាយុទ្ធសាស្រ្ដឲ្យកូនចេញ១សិន ផ្អឹបទុក២សិន៕
