ភ្នំពេញ៖អ្នកមេម៉ាយពេជ្រ សូលីកា អាចនឹងប្រឈម”ត្រីរ៉ស់ក៍រួច ទន្សាយក៍រួច”ព្រោះក្រោយភ្លាមៗនៃការចែកផ្លូវជាមួយអតីតគូដណ្ដឹងមកពីអូស្រា្ដលីលោកគឹម ហាន កាលពីខែកក្កដា ឆ្នាំ២០២២ នាងត្រូវបានគេសង្ស័យថាបានបង្កាត់ភ្លើងស្នេហាជាមួយតារាចម្រៀងលេងម៉ូដសាក់ និងជាកូនមន្រ្ដីធំផ្កាយ២នោះគឺលោកថុល សុភិទិ ព្រោះពួកគេស្និតគ្នាទាំងក្នុងនិងក្រៅឆាក។ប៉ុន្ដែរឿងស្នេហ៍ថ្មីសូលីកា ១នេះបានក្រឡាប់ចាក់ទៅវិញខុសពីការសន្និដ្ឋានរបស់Fan ទាំងសងខាងព្រោះនៅទីបំផុតភិទិ បានបង្ហាញម្ចាស់ចិត្តជាអ្នកមេម៉ាយកូន១ដែរ តែមិនមែននាងសូលីកា នោះទេ តែគឺជានាងម៉ានីន ដែលពេលនេះកំពុងមានផ្ទៃពោះទៀតផង។ចំពោះនាងសូលីកា វិញពេលនោះនាងហាក់ស្រាលខ្លួនព្រោះតែលែងត្រូវបានគេសង្ស័យថាស្រីស្នេហ៍របស់ភិទិ ទៀតដូចនេះអត់សូវឈឺក្បាលរឿងគេសួរនាំដូចមុនឡើយ។ប៉ុន្ដែអ្នកខ្លះបែជាបង្អាប់នាងថាល្បីនិងស្អាតប៉ុណ្ណឹងដែរមិនគូរណាកូនផ្កាយ២មើលរំលងនាងសោះទើប ពេលនោះស្រីពេជ្រ ហៅសូលីកា បង្ហាញគូស្នេហ៍ថ្មីជាបុរសម្នាក់នៅក្រៅរង្វង់សិល្បៈនិងមានរូបរាងសង្ហារមិនចាញ់ភិទិ នោះទេ។តែចំណងស្នេហាថ្មីរបស់ស្រីពេជ្រ ហាក់មិនទាន់ច្បាស់លាស់ ទើបពួកគេមិនសូវហ៊ានបង្ហាញជាសាធារណៈ គឺមួយប្រាវហើយចេញមុខតែតាមIG ប៉ុណ្ណោះ ក៍ស្ងាត់បាត់ដំណឹងទៅវិញតែម្ដង នាំឲ្យFan របស់សូលីកា លើកឡើងថាចំណងស្នេហាមួយនេះពួកគេមិនទាន់យល់ចិត្តគ្នា១០០% ទេ។អ្វីដែលគូរឲ្យចម្លែកនៅលើIG របស់សូលីកា ក៍មិនមានបញ្ចេញរូបភាពសូលីកា និងបុរសនោះថែមទៀតដែរ បើទោះជាមើលទៅពួកគេហាក់កំពុងតែមានទំនាក់ទំនងគ្នាដោយរលូន ហើយគេជឿរថានាងសូលីកា ចង់បង្ហាញឲ្យគេដឹងថានាងមានស្នេហាថ្មីជាផ្លូវការតាមរយៈការភ្ជាប់ពាក្យ ឬរៀបការជាមួយបុរសនោះដូចដែលនាងធ្លាប់រៀបផែនការណ៍ជាមួយអតីតគូស្នេហ៍លោកគឹម ហាន ក៍ដោយ តែរហូតមកដល់ពេលនេះគ្មានដំណឹងអ្នកមេម៉ាយធ្វើកម្មវិធីពិសេសរបស់ខ្លួនទៀតទេ។
ពេជ្រ សូលីកា ត្រូវបានគេចាត់ទុកថានាងជាជាតារាសម្បូរមន្ដស្នេហ៍ម្នាក់ពោលគឺទោះជានាងធ្លាក់ខ្លួនមេម៉ាយកូន១ក្ដី តែនាងមានជម្រើស្នេហ៍ច្រើន ដោយសារតែមានបុរសមិនតិចឡើយដែលរងចាំស្អំរបួសបេះដូងនាងក្នុងនោះមានទាំងអ្នកក្នុង និងក្រៅស្រុក។ប៉ុន្ដែសញ្ញាស្នេហ៍ថ្មីរបស់ស្រីពេជ្រ គឺជាអ្នកនៅក្រៅរង្វង់សិល្បៈដូចមុនទៀត ហេតុនេះហើយមិនយូទេនាងអាចនឹងបង្ខំចិត្តលាតត្រដាងរឿងស្នេហាមួយនេះជាចំហជាមិនខាន ដើម្បីឆ្លើយតបទៅអតីតគូស្នេហ៍ដែលពេលនេះកំពុងមានថ្មី បើទោះជាក្រោយប្រេះឆាស្នេហ៍អ្នកទាំងពីរមិនដែលហែកហួគ្នា ឬប្រាប់ពីមូលហេតុនៃការដើរដល់ទីបញ្ចប់ពីរឿងស្នេហារបស់ពួកគេនិងគ្មានអ្នកណាម្នាក់ទម្លាក់កំហុសឲ្យគ្នាទៅម្ខាងៗក្ដី តែសូលីកា បានបរាជ័យទាំង២ច្រក បន្ទាប់ពីនាងលែងជាគូដណ្ដឹងលោកហាន នោះគឺទី១ មង្គលការយ៉ាងធំដែលជាក្ដីស្រម៉ៃរបស់នាងតាំងពីឆ្នាំ២០២១ ដើម្បីកប់ដានស្នេហ៍ដ៍ខ្មៅងងិតនាពេលអតីតកាល និងទី២ គម្រោងចេញទៅរស់នៅលើទឹកដីអូស្រា្ដលី។ប្រភពបានឲ្យដឹងថាពេលនេះសូលីកា សប្បាយរីករាយតែនៅលើឆាកតន្រ្ដីប៉ុណ្ណោះ តែនៅក្រៅឆាកភាគច្រើននាងស្រងូតស្រងាត់ខ្លាំង ព្រោះត្រូវទទួលបន្ទុកចិញ្ចឹមកូននិងប្អូនស្រី ពិសេសគឺម្ដាយជាទីស្រលាញ់របស់នាងអ្នកស្រីស៊ិន ស្រីនាង ជាប់គុក១២ឆ្នាំ រឿងសម្លាប់គូស្នេហាភេទដូចគ្នាកាលពីឆ្នាំ២០២១ នោះជាវិបត្តិដ៍ធំបំផុត១ក្នុងឆាកជីវិតនាង។តែអ្វីដែលគេសរសើរនោះគឺនាងសូលីកា នៅតែឈបានក្នុងអាជីពចម្រៀងដែលទីផ្សារកាន់តែពិបាកដណ្ដើមភាពលេចធ្លោ ព្រោះតារាយុវវ័យចេញមកកាន់តែច្រើននោះ បើទោះជានាងនៅមិនទាន់ត្រូវបានគេចាត់ទុកក្នុងលំដាប់តារាប្រជែងតំណែងជូរមុខរបស់ហង្សមាសក៍ដោយ។អ្នកជំនាញសិល្បៈបានលើកឡើងថានាងសូលីកា មានចំណុចខ្លាំងគឺការតុបតែងខ្លួនរបស់នាងសាកសមជាតារា ហើយទោះជាពេលនេះមានកូន១ក្ដី តែរូបសម្រស់នាងនៅតែទាក់ទាញមិនសូវបែកសាច់ និងឡើងគីឡូជ្រុលដូចតារាមួយចំនួនទៀតដែលមានប្ដីនិងកូនហើយនោះទេ។ដោយឡែកថៅកែឡែកហង្សមាសវិញគឺនៅតែទុកចិត្តដល់នាងតាមរយៈការទម្លាក់បទថ្មីៗឲ្យច្រៀង និងរុញឲ្យនាងថតភាពយន្ដជាតួធំជាបន្ដបន្ទាប់ទើបធ្វើឲ្យអ្នកមេម៉ាយកូន១ស្រួយដូចដូងដុតរូបនេះនៅតែមានហាងឆេង ។
ទស្សនិកជនរងចាំមើលថាក្នុងចំណោមតារាមេម៉ាយនៅហ្សមាសមាននាងពេជ្រ សោភា ,ប៉ាច គីមមួយ ,សុខ ស្រីនាង និងពេជ្រ សូលីកា នេះ តើ១ណាទៅនឹងរៀបការប្ដីមុនគេ ខណៈដែលមុននេះសោភា និងគីមមួយ រកបានម្ចាស់ចិត្តថ្មីជាប្រុសក្មេងដូចគ្នា ប៉ុន្ដែគូរឲ្យស្ដាយតារាទាំងពីរបានលុបចោលមង្គលការនៅឆ្នាំ២០២៣ នេះព្រមគ្នាទៅហើយ៕
