ភ្នំពេញ ៖ ស្ត្រីម្នាក់ស្រវឹងស្រាជោគជាំ ជិះម៉ូតូមួយគ្រឿង ម៉ាក today រេចង្កូតទៅបុកបង្គោលភ្លើងដែលនៅលើចិញ្ចើមផ្លូវ បណ្តាលឲ្យរងរបួសបែកក្បាល ហេតុការណ៍កើតឡើងកាលពីវេលាម៉ោង១និង៣០នាទីរំលងអធ្រាត្រ ឈានចូលថ្ងៃទី១២ ខែមករា ឆ្នាំ២០១៧ ត្រង់ចំណុចតាមបណ្តោយផ្លូវ១០៥ ខាងមុខផ្ទះលេខ១០៥ ស្ថិតក្នុងសង្កាត់បឹងកេងកងទី៣ ខណ្ឌចំការមន។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូមួយគ្រឿង ម៉ាក today ពណ៌ស្វាយ ពាក់ស្លាក់លេខភ្នំពេញ ១BU-៤៤២៧ បើកបរដោយស្ត្រីម្នាក់ក្នុងស្ថានភាពស្រវឹងជោគជាំ បើករេពេញផ្លូវ ទិសដៅពីជើងត្បូង តាមបណ្តោយផ្លូវ១០៥ ខណៈពេលមកដល់ចំណុចកើតហេតុ ម៉ូតូខាងលើបានរេចង្កូតទៅស្តាំបុកនិងបង្គោលភ្លើងនៅចំណុចកើតហេតុខាងលើ បណ្តាលឲ្យម៉ូតូរងការខូចខាតវៀចក និងវៀចបូមមុខ ចំណែកអ្នកបើកបរម៉ូតូផ្លោងបោកបែកក្បាល ។
ក្រោយពេលកើតហេតុស្ត្រីរងគ្រោះត្រូវបានរថយន្តសង្គ្រោះរបស់គ្លីនិក ហុងហាក់ ដឹកយកទៅសង្គ្រោះ រីឯម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ធបាលបឹងកេងកងទី៣ រង់ចាំសាច់ញាតិមកទទួលយកត្រឡប់ទៅវិញ៕