ភ្នំពេញ៖ផូ មុនីពៅ បានចេញទៅរស់នៅតាមស្វាមីនៅបារាំង និងផ្លាស់ទៅបណ្ដារប្រទេសជាច្រើនទៀតតាមប្ដីនាងត្រូវទៅបំពេញការងារប្រចាំនៅស្ថានទូតបារាំងក្នុងអាណត្តិនីមួយៗដែលមានរយៈពេល៤ឆ្នាំ ប្ដូរម្ដងនោះជាច្រើនប្រទេសមកហើយដែលចុងក្រោយនេះលោក Eric Boissoneau បម្រើរការជាមន្រ្ដីស្ថានទូតបារាំងប្រចាំនៅប្រទេសអូស្រា្ដលី ហើយត្រៀមមកបំពេញតួនាទីនេះ នៅអាណត្តិថ្មីនៅស្ថានទូតបារាំងប្រចាំប្រទេសវៀតណាមក្នុងពេលដ៍ខ្លីខាងមុខនេះ។នេះជាបំណងមួយរបស់អ្នកនាងមុនីពៅ ដែលចង់ឃើញស្វាមីបម្រើរការនៅស្ថានទូតបារាំងប្រចាំនៅប្រទេសជិតៗកម្ពុជាដើម្បីឲ្យនាងមានឱកាសកាន់តែច្រើនចេញចូលមកខ្មែរជួបឪពុកម្ដាយនាងញឹកញាប់ជាងមុនព្រោះថាពេលនេះលោកទាំងពីរក៍មានវ័យកាន់តែច្រើនទៅហើយ។
ផូ មុនីពៅ បានឆ្លើយតបសំណួររបស់អ្នកយកព័តមានយើងតាមឆាតហ្វេសបុកកាលពីល្ងាចថ្ងៃទី២ កក្កដា ថានាងនឹងស្វាមីនិងកូនបុ្រសនឹងមកដល់ខ្មែរជាថ្មីអំឡុងពាក់កណ្ដាលខែសីហា ឆ្នាំ២០២៣ នេះហើយ ខណៈដែលស្វាមីនាង១០០ % គឺនឹងជាប់ទៅធ្វើការនៅទូតបារាំងប្រចាំវៀតណាមនៅចុងខែសីហា ឬដើមខែកញ្ញា ឆ្នាំ២០២៣ ខាងមុខនេះក្រោយលោកបញ្ចប់អាណត្តិនៅស្ថានទូតបារាំងប្រចាំអូស្រា្ដលី។មុនីពៅ វាចាថាបើនិយាយពីការការសប្បាយចិត្តនោះគឺគ្មានអ្វីប្រៀបផ្ទឹមបានទេ ព្រោះចិត្តនាងចង់តែឲ្យប្ដីបានមកធ្វើការនៅប្រទេសជិតខាងកម្ពុជា ងាយស្រួលនាងបានមកជួបជុំក្រុមគ្រួសារឪពុកម្ដាយបានច្រើនជាងមុន ឥឡូវបំណងនោះបានសម្រេចមែន។
អតីតពិធីការិនីCTN ផូ មុនីពៅ បានឲ្យដឹងដែរថាមុនមកខ្មែរជាថ្មីនេះនាងនិងស្វាមីក៍បានទៅដើរលេងកម្សាន្ដនៅប្រទេសមួយចំនួននាប៉ែកអ៊ឺរ៉ុបដែរមានដូចជាប្រទេសបារាំង ,អូទ្រីស និងអេស្បាញ ដែលតំណើរលំលែកាយ៉ាលើកនេះមានរយៈពេលដល់ទៅ១ខែកន្លះឯណ្ណោះ។អ្នកនាងមុនីពៅ ក៍បង្ហើបឲ្យដឹងថាដោយសារតែស្វាមីនាងជាមន្រីរបស់ស្ថានទូតបារាំង ហេតុនេះទាក់ទងការចំណាយលើការស្នាក់នៅសណ្ឋាគារ និងសំបុត្រយន្ដហោះគឺខាងស្ថានទូតជាអ្នករ៉ាប់រងទាំងអស់ តែចំពោះការដើរផ្សារទិញឥវ៉ាន់(Shopping) និងញាំអាហារផ្សេងៗគឺជាការចំណាយផ្ទាល់ខ្លួន ។
ឆ្លើយតបសំណួរថាតើអ្នកនាងផូ មុនីពៅ បានសម្រេចផែនការណ៍រឿងចង់បានកូនទី២ឬនៅនោះអតីតពិធីការិនីច្នើម រៀបការ១២ឆ្នាំ មានតែកូនប្រុស១រូបនេះនិយាយលាយឡំសំណើចថាអត់ទាន់មានទេ មិនទាន់បានសម្រេចបំណងមួយនេះនៅឡើយ។យ៉ាងណាអ្នកនាងមុនីពៅ នៅតែបន្ដចង់បាននិងមិនបោះបង់ក្ដីសង្ឃឹមរឿងយកកូនថែមនេះឡើយ។
ផូ មុនីពៅ បានចាកចេញពីអាជីពMC ជាង១០ឆ្នាំមកហើយ តែមិត្តភក្ដិជិតដិតក្នុងអាជីពសិល្បៈដែលធ្លាប់តែរាប់អាននាងនាពេលកន្លងមកនោះនៅតែមានទំនាក់ទំនងគ្នាធម្មតា បើទោះជារាល់ពេលដែលមុនីពៅ មកលេងស្រុកម្ដងៗនាងតែងតែរក្សារភាពស្ងៀមស្ងាត់មិនដែលបង្ហាញខ្លួនតាមកម្មវិធីអ្នកសិល្បៈ និងសម្ភាសន៍តាមបណ្ដារស្ថានីយ៍ទូរទស្សន៍ដូចអតីតតារាមួយចំនួនទៀតដែលចេញទៅរស់នៅស្រុកគេជាច្រើនឆ្នាំហើយពេលមកលេងស្រុកម្ដងៗនៅតែឆ្លៀតថតសម្ដែងសិល្បៈជាដើមនោះ។សម្រាប់មុនីពៅ ត្រូវបានគេចាត់ទុកថានាងមានសំណាងព្រោះមានស្វាមីជាអ្នកមានចំណេះដឹងខ្ពង់ខ្ពស់ ធ្វើការងារល្អនៅស្ថានទូតបារាំង ហើយក្រុមគ្រួសារខាងស្វាមីនាងនៅបារាំងក៍ស្រលាញ់ពេញចិត្តនាងខ្លាំងណាស់ដែរ។
សូមរំលឹកថាផូ មុនីពៅ បានរៀបការរៀបការជាមួយលោក Eric Boissoneau កាលពីថ្ងៃទី១៩ ខែកុម្ភៈ ឆ្នាំ២០១១ ពោលគឺចំណងស្នេហាជាង១២ឆ្នាំនេះទទួលបានចំណងដៃកូនប្រុស Alexis Boissoneau អាយុជិត៦ឆ្នាំ។ នាងគឺជាតារាខ្មែរដែលជ្រើសស្វាមីជាជនជាតិបរទេសក្នុងចំណោមតារាខ្មែរផ្សេងទៀតមានដូចជាអ្នកនាងហ៊ាប រ៉ាឌី,កែវ ស្រីនាង ,អឿន ដាលីស ,ខៀវ សានសាណា ,សូ អេណា និងទឹម រដ្ឋាជាដើម។ប្រភពបានឲ្យដឹងថាទោះមុនីពៅ ទៅរស់នៅស្រុកគេតាមស្វាមីជាច្រើនឆ្នាំមែន ប៉ុន្ដែនាងក៍មានអាជីវកម្មមួយចំនួននៅខ្មែរដែរដែលមានបងប្អូននាងរស់នៅក្នុងស្រុកជាអ្នកមើលខុសត្រូវ។អតីតពិធីការិនីល្បីឈ្មោះ រូបនេះធ្លាប់ប្រាប់ថាពេលនាងមានអាយុច្រើនជាងនេះចង់មករស់នៅខ្មែរវិញតែចេញចូលទៅបារាំងជាធម្មតា ហើយការសម្រេចចិត្តបែបនោះបានទាល់តែមានការឯកភាពពីស្វាមីនាងដែរទើបទៅរួច ស្របពេលដែលផែនការណ៍យកូនទី២ នោះនាងថាឲ្យតែបានកូនប្រុសក៍បាន ស្រីក៍បានដែរពេញចិត្តទាំងអស់៕
