ភ្នំពេញ៖តារាចម្រៀងGalaxy លោកប៉ុន សុណារិន ហៅខេម បាននាំភរិយាសំណព្វចិត្តរបស់លោកអ្នកនាងស្រីកា ហោះទៅបារាំងកាលពីរាត្រីថ្ងៃទី១ សីហា ហើយលោកអះអាងថាតំណើរកម្សាន្ដលើកនេះមានរយៈពេលដល់ទៅ១ខែឯណ្ណោះ ទើបវិលចូលស្រុកវិញ។ការជ្រើសរើសការដើរលេងនៅបរទេសនារដូវធ្លាក់ភ្លៀងនេះ ស្របពេលដែលអាជីពសិល្បៈរបស់លោកសុណារិន មិនសូវមមាញឹកដូចនៅរដូវប្រាំងនោះទេពោលគឺស្បើយទៅហើយនៅខែវស្សានេះដូចគ្នាទៅនិងតារាផ្សេងៗទៀតដែរ។ប៉ុន្ដែសម្រាប់ការទៅលេងនាទីក្រុងប៉ារីស របស់លោកខេម គឺស្ទើតែជារៀងរាល់ឆ្នាំទៅហើយ ព្រោះថាភរិយាលោកមានក្រុមគ្រួសាររស់នៅទីនោះ ហេតុនេះធ្វើឲ្យខេម ចេញចូលបារាំងដូចទៅផ្សារធំថ្មីនៅខ្មែរអីចឹងហើយលោកក៍តែងតែបង្ហួសទៅដើរលេងជាមួយប្រពន្ធនៅប្រទេសជិតខាងនោះផងដែរ។ក្រៅពីចង់សម្រាកក្រោយហត់នឿយការច្រៀងសម្ដែងពេញមួយរដូវក្ដៅនាពេលកន្លងមកនោះដំណើរលើកនេះខេម ក៍នឹងធ្វើឲ្យចំណងស្នេហាលោកជាមួយស្រីកា កាន់តែរឹងមាំថែមទៀតជាមិនខាន ស្របពេលដែលក្រោយចាប់គ្នាជាង៧ឆ្នាំមកនេះពួកគេសង្ស័យថាមានកូន២នាក់ទៅហើយ(ស្រី១)តែខេម ធ្លាប់ប្រកែកដោយអះអាងថាក្មេងប្រុសដែលគេម៉ៃថាជាកូនលោកនោះតាមពិតជាកូនរបស់មេលោក(ឡេង ណាវ៉ាត្រា)ទេ និងក្មេងស្រីដែលលោកតែងបីលេងនោះគឺជាក្មួយរបស់ភរិយាលោកនៅបារាំង។ប៉ុន្ដែខេម សារភាពថាលោកពិតជាស្រលាញ់ក្មេងៗមែននិងចង់បានទៀតផង បើទោះជាលោកមិនកំណត់ពេលវេលានៃការរៀបការ និងយកកូនក្ដី។
ខេម បានសាងស្នេហ៍ដោយមិនបើកចំហអស់រយៈពេលជាង៥ឆ្នាំ ពោលគឺទើបតែនៅដើមឆ្នាំ២០២០ ទេដែលលោកចាប់ផ្ដើមហ៊ានបណ្ដើរអ្នកនាងស្រីកា ជាសាធារណៈនិងលែងខ្លាចផ្ដល់បទសម្ភាសន៍ជាមួយអ្នកសារព័តមានពាក់ព័ន្ធរឿងស្នេហាឆ្លងទ្វីពរបស់លោកនោះ។អតីតតារាថោនរូបនេះថាលោកមិនខ្លាចពេលរៀបការរួចទៅលែងមានអ្នកគាំទ្រនោះទេ ប៉ុន្ដែការពន្យាពេលចូលរោងការរបស់លោកនាពេលកន្លងមកនោះគឺដោយសារតែលោកចង់មានមុខរបរផ្ទាល់ខ្លួននៅក្រៅសិល្បៈទុកសម្រាប់ពេលលោកចាស់ទៅ ខណៈកាលពីដើមឆ្នាំ២០២០ លោកក៍បានបើកភោជនីយដ្ឋានបានដូចបំណងផងដែរ។ខេម និយាយជាប្រយោលថាមង្គលការរបស់លោកមិនពន្យាពេលយូឆ្នាំទៀតទេ ពោលគឺនឹងលេចចេញជារូបរាងឡើងនាពេលខាងមុខនេះហើយ ប៉ុន្ដែលោកមិនប្រាប់ពីថ្ងៃខែឆ្នាំណាឲ្យពិតប្រាកដនោះទេ។
លោកប៉ុន សុណារិន ហៅខេម បានជ្រកក្រោមដំបូលGalaxy ជាង៣ឆ្នាំហើយក្រោយដើរចេញពីថោន ទាំងចម្រូងចម្រាសដែលការមកទើនៅទ្រនុំថ្មីនេះលោកសុណារិន ប្រៀបបាននិងកំពុងដើរលើផ្លូវជាន់បន្លារ ព្រោះមិនអាចធ្វើជាតួឯកដូចមុនបានទេដោយសារតែមានតារាជើងខ្លាំងដល់ទៅ២ដួងគឺលោកព្រាប សុវត្ថិ និងខេមរៈ សិរីមន្ដ មកដល់ជាបន្ដបន្ទាប់ដែរ ទើបធ្វើឲ្យអ្នកចម្រៀងសំនៀងស្អករូបនេះហាក់នៅទ្រឹងហើយដៃគូពិសេសរបស់លោកនាងតន់ ច័ន្ទសីម៉ា នោះបានងាកទៅចាប់ដៃលោកសុវត្ថិ និងប៊ុនថៃ ផងដែរពោលគឺមិនមែនចាប់ដៃតែជាមួយលោកម្នាក់ឯងដូចមុនឡើយ។ប៉ុន្ដែអ្នកជំនាញសិល្បៈធ្លាប់លើកឡើងថាខេម ជាតារាច្រៀងសម្លេងស្អក តែពិរោះ ហេតុនេះទោះជាGalaxy ទិញតារាប្រុសរូបណាចូលទៀតក៍មិនអាចដណ្ដើមតំណែងលោកបានឡើយ។
ក្រៅពីខេម តារាប្រុសដែលយកប្រពន្ធជានារីអាណិកជនខ្មែរនៅបរទេសមានដូចជាលោកខៃ ប្រសិទ្ធ ,យស បូវណ្ណៈ ,សុវណ្ណ មុនី,ខៀវ សំភេទ ,ហង្ស ឈា និងសោភ័ណ្ឌ ឡាវី ជាដើម។តែ ខេម ធ្លាប់ប្រាប់ថាលោកអាចចេញចូលទៅបរទេសបាន មិនមានបំណងទៅរស់នៅប្រទេសបារាំងជាអចិនត្រេយ៍នោះទេ ព្រោះគូស្នេហ៍លោកនាងក៍បានមករស់នៅស្រុកខ្មែរជាមួយលោកជាច្រើនឆ្នាំមកហើយដែរ។ទាក់ទងអាជីពចម្រៀងវិញខេម ទោះជាមិនអាចក្លាយទៅជាតួឯកផ្ដាច់មុខដូចនៅថោនក្ដី ប៉ុន្ដែគ្មានដំណឹងលោកសុណារិន ចង់ហើរចេញពីទ្រនុំទី២ឡើយ ស្របពេលដែលលោកធ្លាប់អះអាងថាទំនាក់ទំនងរវាងលោកនិងមេ(ណាវ៉ាត្រា)ដូចជាបងប្អូន ហើយតារារៀមច្បងដែលរួមទ្រនុំជាមួយលោកនិងធ្លាប់ត្រូវបានគេសង្ស័យថាជាឆ្អឹងទទឹងកលោកនោះតាមពិតតារានៅGalaxy ស្រលាញ់គ្នាណាស់ គ្មានការកាច់កុងគ្នាឡើយ។
ទស្សនិកជនរងចាំមើលថាក្រោយខេម នឹងបណ្ដើរអ្នកនាងស្រីកា មកស្រុកវិញនាខែកញ្ញា ខាងមុខនេះ ពួកគេនឹងហ៊ានដឹកដៃគ្នារៀបការនៅចុងឆ្នាំ២០២៤ ឬអត់ ព្រោះតាមដំណឹងថាទាំងខេម និងភរិយាចង់បានកូនង៉ាបីប្រលែងលេងដូចគ្នា…។ឬមួយខេម ចង់លេងស្ទីលអ៊ឺរ៉ុប យកកូនមុនរៀបការដូចងួន ចាន់ដេវីត ?
