ភ្នំពេញ៖ពិធីការិនីឌួង ហ្សូរីដា និងប្អូនស្រីនាងទាំងពីរឌួង កូហ្សូណា និងឌួង ហ្សូរីម៉ា និងក្រុមគ្រួសារបានធ្វើបុណ្យជូនម្ដាយនាងឧបាសិការយ៉ាលីន សុខលីម កាលពីថ្ងៃទី៨ សីហា ដោយមានតារាសិល្បកររួមអាជីពតិចតួចប៉ុណ្ណោះដែលចូលរួម ព្រោះតែនាងមិនបានជូនដំណឹងពិធីបុណ្យនោះមុនកម្មវិធីមកដល់នោះទេ ព្រោះថាខ្លាចចិត្តភ្ញៀវដោយសារតែពិធីនោះរៀបចំនៅវត្តប្រាសាទ សង្កាត់ពញាពន់ ខណ្ឌព្រែកព្នៅ រាជធានីភ្នំពេញ ជាទីដែលធាតុរបស់ម្ដាយនាងតម្កល់នៅចេតីយទីនោះទើបមិនអាចរៀបចំនៅផ្ទះនាងនៅទីក្រុង្នំពេញ។ដូចគម្រោងគឺហ្សូរីដា បាននិមន្ដព្រះសង្ឃដល់ទៅ១០០អង្គរាប់បាត្រ ហើយនាងបានចែកទាន់ដល់គ្រួសារអ្នកក្រខ្សត់ចំនួន១៥០នាក់ កូនក្មេង៥០នាក់ ព្រមទាំងបានចែកសម្ភារៈមួយចំនួនដល់ជនក្រីក្រផងដែរ បន្ទាប់ពីបានព្រលែងចាប ព្រាប សអណ្ដើក និងត្រីនៅក្នុងវត្តទៅតាមជំនឿរ។
ឌួង ហ្សូរីដា បានប្រកាសថាក្រោយនាងបានកាន់ទុក្ខជូនម្ដាយគម្រប់១០០ថ្ងៃ និងបានរៀបចំធ្វើបុណ្យជូនអ្នកមានគុណរួចទៅតាមប្រពៃណីនោះ ពេលនេះនាងចាប់ផ្ដើមរៀបចំជីវិតសារជាថ្មី ហើយទោះជាម្ដាយចាកចេញពីនាងទៅដោយគ្មានថ្ងៃត្រឡប់មែនប៉ុន្ដែបេះដូង និងខួរក្បាលនៅជាមួយម្ដាយជានិច្ច។ពិធីការិនីរូបនេះថែមទាំងបួងសួងនិងផ្សងថាបើអាចសូមឲ្យម្ដាយនាងត្រឡប់មកកើតជាកូនរបស់កូនៗណាមួយក្នុងជាតិថ្មីដើម្បីបានរស់នៅជួបជុំគ្នាម្ដងទៀត។ការថ្លែងរបស់នាងបែបនេះប្រាកដណាស់ថាហ្សូរីដា នៅតែអាលោះអាល័យដល់ម្ដាយគ្រប់វិនាទី ហើយការធ្វើបុណ្យគម្រប់១០០ថ្ងៃជូនម្ដាយនាងមានជំនឿរថាអ្វីដែលនាងបានសាងអំពើរល្អនាពេលកន្លងមកមគ្គផលទាំងនោះនឹងបានទៅដល់ម្ដាយជាមិនខាន។
សូមរំលឹកថាម្ដាយឌួង ហ្សូរីដា លោកស្រីយ៉ាលីន សុខលីម បានទទួលមរណភាពក្នុងជន្មាយុ៦០ ឆ្នាំកាលពីថ្ងៃទី១ ឧសភា ២០២៣ ដោយសារតែជំងឺមហារីក បន្ទាប់ពីនាងបានព្យាបាលម្ដាយយ៉ាងយកចិត្តទុកដាក់ទាំងពេទ្យក្នុងនិងក្រៅស្រុកជាច្រើនឆ្នាំមកហើយតែនៅតែមិនអាចជួយម្ដាយបានដដែល។ហ្សូរីដា ស្ថិតក្នុងចំណោមតារាដែលបាត់បង់ម្ដាយដោយសារតែជំងឺមហារីកមានដូចជាតារាចម្រៀងអ៊ីវ៉ា និងពិធីការិនីសោម ស្រីនាថ ជាដើម។នាងគឺជាអ្នកដឹកនាំក្រុមគ្រួសារព្រោះកំព្រាឪពុកតាំងពីតូច ហេតុនេះក្រោយបាត់បង់ម្ដាយទៅគ្រួសារនាងមានតែរូបនាងនិងប្អូនស្រីទាំងពីរនាក់ដែលមានរូបនាងជាមេគ្រួសារដឹកនាំប្អូនៗក្នុងការរកស៊ីនិងបង្កើតមុខរបររៀងៗខ្លួន។ប៉ុន្ដែប៉ុន្មានឆ្នាំចុងក្រោយនេះហ្សូរីដា ហាក់មិនសូវសកម្មក្នុងអាជីពជាពិធីការិនីនោះទេ ព្រោះនាងងាកមកពង្រឹងអាជីវកម្មតាមOnline និងហាងកាត់ដេរសម្លៀកបំពាក់ ហើយថ្មីៗនេះទើបបើកហាងសាឡនថ្មីមួយផងដែរ។ហ្សូរីដា ស្ថិតក្នុងចំណោមតារាដែលប្រើជីវិតនៅលីវបានយូឆ្នាំម្នាក់ដែលរហូតមកដល់ពេលនេះមិនទាន់មានដំណឹងជាក់លាក់ថានាងនឹងចូលរោងការនៅពេលណា ហើយអនាគតស្វាមីរបស់នាងបុរសរូបណាឡើយ។តែតាមរយៈការបន់ស្រន់នៅថ្ងៃបុណ្យខួបម្ដាយសូមឲ្យលោកស្រីយ៉ាលីម មកចាប់ភពថ្មីជាមួយនាងឬប្អូនស្រីនោះបញ្ជាក់ថាមិនយូនោះទេ រូបនាងក៍ដូចជាប្អូនស្រីនឹងដល់ពេលវេលាត្រូវរៀបអាពាហ៍ ពិពាហ៍ ក្នុងពេលឆាប់ៗខាងមុខនេះហើយ។
ឌួង ហ្សូរីដា មិនប្រាប់ពីទំហ៊ុំទឹកប្រាក់ដែលនាងចំណាយក្នុងកម្មវិធីបុណ្យគម្រប់ខួប១០០ថ្ងៃ ជូនម្ដាយនោះទេ ប៉ុន្ដែគេជឿរថានាងចាយអស់ក្បែម៉ឺនដុល្លារឯណ្ណោះ បើទោះជាមុនកម្មវិធីមកដល់នាងថាធ្វើត្រឹមតិចតួចក្ដី។នាងជាតារាម្នាក់ដែលយកចិត្តទុកដាក់ព្យាបាលជំងឺម្ដាយដោយអស់ពីចិត្តដូចគ្នាទៅនិងតារាចម្រៀងលោកករុណា ពេជ្រ ដែលព្យាបាលឪពុកជាច្រើនឆ្នាំនិងតារាមួយចំនួនទៀតដែរ។យ៉ាងណាក្រោយកាន់ទុក្ខជូនម្ដាយគម្រប់១០០ថ្ងៃនេះរួចហ្សូរីដា នឹងចាប់ផ្ដើមអាជីវកម្មលើOnline របស់នាងជាថ្មី ខណៈដែលមុននេះហាងកាត់ដេរ និងCosmetics ដែលមានទីតាំងតាមបណ្ដោយផ្លូវស្ដុបឧកញ៉ាទេព ផន នោះទើបរៀបចំដេគ័រថ្មី ប៉ុន្ដែគ្មានគម្រោងសម្ពោធនោះទេ។ហ្សូរីដា ទោះជារយាលៗពីសិល្បៈកាន់តែខ្លាំងមែន តែនាង ជាប្រធានក្រុមហ៊ុនបង្ហាញម៉ូដ Cambodia Super Model (CSM) ដោយមុននេះទើបតែបានបញ្ជួនបេក្ខភាពសោម ស្រីនាថ ទៅប្រកួត Bird’s Nest Division ឆ្នាំ២០២៣ នៅចិន ទទួលបានជ័យលាភីលេខ១ ក្នុងចំណោមបេក្ខភាពមកពី១១ប្រទេស ។នាងថានឹងបញ្ជូនសមាជិកCSM របស់ខ្លួនផ្សេងៗទៀតទៅប្រកួតលើឆាកអន្ដរជាតិនាពេលខាងមុខនេះដើម្បីយកសម្លៀកបំពាក់ ,ប្រពៃណីខ្មែរដ៍ផូផង់ឲ្យពិភពលោកបានស្គាល់កម្ពុជាកាន់តែច្បាស់ ៕
