ភ្នំពេញ៖តារាកូន១នាងសួស វីសា បានលេចមុខសម្ដែងភាពយន្ដជាថ្មីក្នុងរឿង”តាមចាប់ស្នេហ៍” ដែលនាងលេងជាតួរងថៅកែហាងពេជ្រម្នាក់ ខណៈដែលកាលពីឆ្នាំមុនវីសា ក៍ធ្លាប់សម្ដែងជារងម្ដងដែរក្នុងរឿង”រាជបុត្រកង្កែប”ដែលមាននាងវី ឌីណែត ជាតួឯក។ការមិនប្រកាន់ចឬកតួឯកពីសំណាក់វីសា ដោយព្រមលេងជាតួរងជាបន្ដបន្ទាប់បែបនេះបញ្ជាក់ថានាងស្រលាញ់ការសម្ដែងភាពយន្ដដូចអាជីពចម្រៀងដែរ ខណៈដែលខ្លះលើកឡើងថាវីសា មានភាពល្បីល្បាញ មានសម្ថភាពនិងរូបសម្រស់អាចធ្វើជាតួឯកបាន តែហេតុអ្វីទៅបានជាក្រុមផលិតករទាំងនៅហង្សមាសនិងពីខាងក្រៅ អត់ព្រមឲ្យនាងបានភ្លក្សរសជាតិតួឯកនិងគេម្ដងទៅ?ថ្វីត្បិតតែមានការលើកឡើងបែបនេះក្ដី ប៉ុន្ដែគេកត់សម្គាល់ថាទោះជាអាជីពចម្រៀងដែលវីសា ស្រលាញ់បំផុតនិងបានតស៊ូជាង១០ឆ្នាំមកហើយនោះក៍នាងនៅតែមិនទាន់អាចក្លាយទៅជាតួឯករបស់ហង្សមាសដែរ ព្រោះតែឱក សុគន្ធកញ្ញា និងពេជ្រ សោភា នៅតែមានប្រៀបជាង។ប៉ុន្ដែវីសា ធ្លាប់ប្រាប់អ្នកយកព័តមានយើងថានាងមិនដែលមានចិត្តចង់ទៅប្រជែងជាមួយតារាស្រីរៀមច្បងនៅហង្សមាសយកលេខ១ នោះទេ តែចិត្តនាងគឺចង់បានលេខ២ ពោលគឺបន្ទាប់ពីសុគន្ធកញ្ញា ខណៈដែលគេមើលឃើញថាបច្ចុប្បន្នតំណែងតួរងសម្រាប់តារាចម្រៀងស្រីនៅហង្សមាសក៍វីសា ពិបាកនិងឆក់បានដែរ ព្រោះថាតាំងពីផ្ទុះកូវីដរហូតស្ងាត់ទៅវិញនេះគេសង្កេតឃើញថាតារាស្រីនៅហង្សមាសដែលនៅមានយ៊ីអ៊ុនល្អគឺមានតែនាងរ៉េត ស៊ូហ្សាណា ម្នាក់ប៉ុណ្ណោះ ក្រៅពីនេះសឹងតែនៅទ្រឹងគ្រប់គ្នាក្នុងនោះមានទាំងម្ចាស់ពានទាំងឡាយផងដែរ។
សួស វីសា បានវិលរកឆាកតន្រ្ដីវិញជាបន្ទាន់កាលពីចុងឆ្នាំ២០២២ ក្រោយនាងបាត់មុខពីច្រៀងរាំអស់ជាង១ឆ្នាំដោយសារតែញាំញីទៅដោយជំងឺរលាកបំពង់កកម្រិតធ្ងន់ដែលតម្រូវឲ្យទៅព្យាបាលនៅថៃ យ៉ាងយកចិត្តទុកដាក់បំផុត ហើយគ្រូពេទ្យបានចេញវេជ្ជបញ្ជាឲ្យនាងហាមប្រើប្រាស់សម្លេងនៅពេលជំងឺនេះមិនទាន់ជាដាច់ តែវីសា ហាក់ល្មើសបម្រាមគ្រូពេទ្យព្រោះធ្វើជាតារាចម្រៀងបើមិនឲ្យប្រើសម្លេង តើឲ្យនាងទៅប្រើអ្វីទៅ ទើបពេលនេះគេឃើញនាងចេញច្រៀងជាធម្មតា ហើយមិនដែលទៅពេទ្យថៃពិគ្រោះរឿងជំងឺចាស់នេះទៀតនោះទេ ដែលមានន័យថាស្ថានភាពជំងឺរបស់នាងបានប្រសើរច្រើនហើយ ស្របពេលដែលតារា២ដួងទៀតរួមទ្រនុំជាមួយនាងដែរហើយប្រឹងច្រៀងសម្ដែងទាំងឈឺដូចគ្នានោះគឺនាងពេជ្រ សោភា ញាំញីទៅដោយជំងឺឈាមស ស៊ីឈាមក្រហមនិងវី ឌីណែត មានជំងឺពកកតម្រូវឲ្យលេបថ្នាំអស់១ជីវិតទៀតផង។
ថ្វីត្បិតតែទាំងអាជីពសម្ដែងភាពយន្ដនិងចម្រៀងរបស់សួស វីសា មិនទាន់ក្លាយទៅជាតួឯកក្ដី ប៉ុន្ដែពេលនេះនាងរស់នៅក្នុងកម្រិតជីវភាពធូធារខ្លាំងតាមរយៈទិញបានផ្ទះវីឡារកូន កាត់ផ្ទាល់ខ្លួនយ៉ាងប្រណិត ហើយនាងជិះរថយន្ដទំនើបៗជាច្រើនគ្រឿងឆ្លាស់គ្នាក្នុងនោះ មានដូចជាLexus Lx570 ,Bmw ,Lexus Nx200t និងMazda ជាដើម។ប៉ុន្ដែវីសា នៅមិនទាន់សម្រេចបំណងធំមួយទៀតនោះគឺនាងចង់ជិះរថយន្ដម៉ាកRolls Royce ដូចព្រាប សុវត្ថិ និងខេមរៈ សិរីមន្ដ ដែរ។ដោយឡែកថៅកែហង្សមាសវិញក៍មិនទាន់ប្រគល់តំណែងលួងចិត្តណាមួយទៅវីសា ដែរក្រោយនាងត្រូវដកចេញពីតំណែងជាCoach កម្មវិធីThe Voice Kids Cambodia រដូវកាលទី៣ ជំនួសដោយសុគន្ធ និសា ។ប្រភពបានឲ្យដឹងថាវីសា ក៍ស្ថិតក្នុងចំណោមតារាស្រីដែលហង្សមាសចង់រក្សារទុកផងដែរ ក្រោយផលិតកម្មធំនេះភ្លាត់ស្នៀតបាត់បង់តារាសំខាន់របស់ខ្លួនដល់ទៅ២ក្នុងពេលមួយពព្រិចភ្នែកនោះគឺព្រាប សុវត្ថិ និងខែម ប៊ុនថៃ ធ្លាក់ទៅកណ្ដាប់ដៃGalaxy ហេតុនេះហើយមិនយូទេវីសា នឹងបានតំណែងធំណាមួយផ្សេងទៀតមកវិញជាមិនខាននាពេលខាងមុខនេះពីថៅកែរបស់នាង។
ក្រៅពីសួស វីសា តារាដែលមានកូន១មិនសូវមានសន្ទុះល្អដូចកាលនៅលីវមានដូចជានាងឱក សុគន្ធកញ្ញា ,ពេជ្រ សូលីកា ,កែវ ពេជ្រពិសី និងនៅ សុនិតា ជាដើម។សម្រាប់វីសា ពេលនេះនាងហាក់បានត្រៀមខ្លួនរួចជាស្រេចក្នុងការទទួលយកថាអាជីពសិល្បៈមិនទៀងទាត់ ព្រោះនាងបានបង្កើតមុខរបរខាងក្រៅសិល្បៈជាបន្ដបន្ទាប់ដោយមានស្វាមីនាងលោកថមមី ជាអ្នកគាំទ្រនៅខាងក្រោយខ្នងជានិច្ច។ សួស វីសា ធ្លាប់និយាយថានាងមានសំណាងព្រោះត្រូវស្វាមីថ្នាក់ថ្នមដូចជាព្រះនាង តែនាងមិនទាន់រៀបគម្រោងយកកូនទី២ឡើយ ខណៈដែលគីឡូនាងក៍មិនទាន់ស្រកដូចចិត្តពោលគឺនៅតែមានព្រលឹងជាងមុនក្រោយមានប្ដីនិងកូន១៕
