ភ្នំពេញ៖តារាចម្រៀងជុំ រចនាពេជ្រ ហៅបេប៊ី បានបាត់ខ្លួនពីឆាកតន្រ្ដីជិត៣ឆ្នាំ ទៅហើយដែលរហូតមកដល់ពេលនេះនៅតែមិនទាន់កំណត់ពីពេលវេលា នៃការកាន់ក្បាលមីក្រូឡើងឆាកតន្ដ្រីសារជាថ្មីនោះទេ បើទោះជានៅក្នុងជំនួបចុងក្រោយកាលពីដើមខែឧសភា ស្រីស្រស់តាំងចិត្តថាមិនបោះបង់អាជីពចាស់ជាដាច់ខាតក៍ដោយ។យ៉ាងណាអំឡុងពេលដែលមិនទាន់មានបទចម្រៀងនិងក្បាច់រាំថ្មីៗមកអុកឡុកឆាកតន្រ្ដីសារឡើងវិញនេះនាងរចនាពេជ្រ បែជាងាកមកថតស្ពតសម្អាងការក្នុងឈុតកូនក្រមុំជាបន្ដបន្ទាប់ទៅវិញដែលធ្វើឲ្យសម្រស់របស់នាងនៅតែលេចត្រដែត បើទោះជានាងហាក់មានព្រលឹងបន្ដិចក្ដី។
បេប៊ី ធ្លាប់អះអាងថាចំនួនកុងត្រារបស់នាងនៅផលិតកម្មថោនគឺនៅមានសុពលភាពនៅឡើយ ពោលគឺមិនទាន់ផុតកុងត្រានោះទេ ។តែបទចម្រៀងថ្មីៗរបស់នាងនៅតែអត់មានចេញដដែល ហើយហេតុផលដែលនាងចេញបទថ្មីមិនរួចនោះគឺដោយសារតែថាជាប់ដៃរកស៊ីហាងកាហ្វេដែលពង្រីកសាខាថ្មីជាបន្ដបន្ទាប់ និងរហូតមកដល់ពេលនេះមានដល់ទៅ៥ សាខាឯណ្ណោះដែលហាងចុងក្រោយនៅផ្លូវជាតិលេខ២ (ម្ដុំកួរស្រូវ)។Fan របស់ស្រីស្អាតបេប៊ី មិនរំពឹងខ្ពស់ថានាងនឹងវិលមករកអាជីពចាស់ដូចការតាំងចិត្តរបស់សាមីខ្លួននោះទេ តែនាងនៅតែសច្ចាថានឹងមិនទៅណា ខណៈដែលម្ដាយនាងលោកស្រីប៊ុន ណារី ក៍គាំទ្រឲ្យកូនស្រីសំណព្វចិត្ត ច្រៀងសម្ដែងជាថ្មីផងដែរ។
បេប៊ី ថាមូលហេតុដែលរូបនាងចេះតែពន្យាពេលចេញមុខតាមការសន្យានោះព្រោះថាអាជីពចម្រៀងពេលនេះដោយសារតែនាងឈប់យូខែពេក អីចឹងបើត្រឡប់មកធម្មតាៗអត់អាចធ្វើឲ្យគេចាប់អារម្មណ៍បានឡើយគឺត្រូវតែមានអ្វីដែលថ្មីបំផុតទាំងការតុបតែងខ្លួន ក្បាច់រាំ និងបទចម្រៀងល្អទើបអាចទៅរួច។ប៉ុន្ដែអ្នកដឹកនាំការប្រគុំតន្រ្ដីខ្លះដែលធ្លាប់ហៅបេប៊ី ច្រៀងសម្ដែងនោះបានបង្ហើបថាពួកគេក៍ធ្លាប់ទាក់ទងនាងរចនាពេជ្រ ឡើងឆាកវិញដែរ តែនាងមិនចង់ ព្រោះថាគ្មានបទថ្មី ឬថាអត់ទាន់ដល់ពេលវេលាបង្ហាញមុខវិញនាពេលនេះទេ តែគេមិនជឿរថានាងវិលវិញឡើយ ព្រោះថាមុននេះសុខ ស្រីនាង ក៍មានហេតុផលដូចនាងដែរតែចុងក្រោយក៍បោះបង់អាជីពចម្រៀងដែលបានតស៊ូជាង១០ឆ្នាំទៅហើយនោះដោយគ្មានអាល័យ ដើម្បីផ្គាប់ចិត្តគូស្នេហ៍ ហេតុនេះគេខ្លាចតែបេប៊ី ដើរតាមផ្លូវស្រីនាងដែរនោះច្បាស់ជាធ្វើឲ្យស្រីស្អាតៗក្នុងពិភពសិល្បៈកាន់តែខើចទៅៗជាមិនខាន។
បេប៊ី បានបោះបង់ការងារជាពិធីការិនីCTN និងការសម្ដែងភាពយន្ដ ដោយផ្ដោតតែលើអាជីពចម្រៀងនៅថោន ហើយមុនដកថយនាងកំពុងតែធ្វើឲ្យFan តាមដានសកម្មភាពនាងច្រើន ស្រាប់តែនាងរចនាពេជ្រ លែងបុកទីផ្សារចម្រៀងទៅវិញ ។ប៉ុន្ដែតារាវ័យ២៥ឆ្នាំ រូបនេះថាការចាកចេរញនាពេលនេះនាងគ្មានសម្ពាធពីអ្នកណាទាំងអស់ ពោលគឺគ្មានគូស្នេហ៍ហួងហែងដូចគេសង្ស័យនោះទេ។នាងថាអាជីពចម្រៀងជាផ្នែកមួយដែលនាងស្រលាញ់ ហេតុនេះបើឲ្យបោះបង់ត្រឹមវ័យក្មេងដូចច្នេះគឺមិនមែនជាផែនការណ៍របស់នាងឡើយ។នាងរចនាពេជ្រ ក៍បានច្រានចោលចំពោះដំណឹងខ្លះដែលថានាងចង់វិលទៅធ្វើជាMC ចាប់ដៃជាមួយVj ដាដា នៅCTN ដែរដោយនាងថានោះគឺជារឿងមិនពិត។
ក្រៅពីបេប៊ី តារាដែលផ្អឹបអាជីពរបស់ខ្លួនកណ្ដាលទីមានដូចជានាងសុខ ស្រីនាង ,សន ផល្លីកា ,ស្រីណយ,ស្រីណៃ និងស្រីស្អាតគីម ហួរ ជាដើម។អំឡុងពេលដែលបេប៊ី លែងបង្ហាញខ្លួនលើឆាកតន្រ្ដីនេះដែរនាងក៍បានទិញផ្ទះវីឡារទោលតម្លៃខ្ទង់ជាង២០ម៉ឺនដុល្លារយ៉ាងប្រណិតនៅបរីជីពម៉ុង៥៩៨ សង្កាត់ច្រាំងចម្រេះ២ ខណ្ឌឬស្សីកែវ រាជធានីភ្នំពេញ ដែលធ្វើឲ្យមានការសង្ស័យថាគូស្នេហ៍របស់នាងទិញឲ្យ។ប៉ុន្ដែអ្នកស្រីណារី ធ្លាប់បញ្ជាក់ថាគាត់បានលក់ផ្ទះ១ល្វែងទល់មុខពោចិនតុង និងដីធ្លីមួយចំនួនទៀតទើបគ្រប់ចំនួនទិញផ្ទះថ្មីបាន អត់មានអ្នកណាជួយចេញលុយឡើយ។ម្ដាយបេប៊ី ធ្លាប់សារភាពថាកូនស្រីគាត់មានបុរសទាំងក្នុងនិងក្រៅស្រុកតាមស្រលាញ់ តែចិត្តគាត់ចេះតែបារម្ភថាខ្លាចតែកូនស្រី”អ្នកក្រមិនហ៊ាន អ្នកមានមិនចូល “នោះគឺនឹងធ្វើឲ្យនាងគ្មានប្ដីសីដូចគេឡើយ។
ទស្សនិកជនរងចាំមើលថាបេប៊ី នឹងវិលវិញនាពេលខាងមុខនេះដូចការប្ដេជ្ញារបស់នាង មែន ឬមួយស្រីស្អាតដើរលើផ្លូវដូចនាងសុខ ស្រីនាង ដែលហ៊ានចាកចេញពីអាជីពដែលខ្លួនស្រលាញ់ដើម្បីស្នេហា?
