ភ្នំពេញ៖ម៉ាក សែនសូនីតា បានសម្រាលកូនប្រុសទី២កាលពីវេលាម៉ោង៨យប់ ថ្ងៃទី២១ សីហា ដោយនាងបានដាក់ឈ្មោះថាប៉ុល បូនីតតេ ហើយនាងបង្ហាញសុខភាពល្អធម្មតា ខណៈដែលស្វាមីនាងលោកប៉ុល វិបូរ ហៅនីត នៅក្បែកាយ៉ាភរិយាជានិច្ច។ការយកកូនទី២នេះ ក្រោយពេលកូនទី១របស់តូតា ដែលជាកូនប្រុសឈ្មោះប៉ុល បូនីតតូ មានអាយុជិត៣ឆ្នាំ ហើយនាងបានដកខ្លួនចេញពីសិល្បៈស្ទើតែទាំងស្រុងតាំងពីក្រោយរៀបការកាលពីថ្ងៃ១៦ មីនា ឆ្នាំ២០២០ ម្លេះដោយងាកទៅធ្វើជំនួញលក់គ្រឿងអលង្ការនៅផ្សារទួលសង្កែរ និងបើកកសិដ្ឋានចិញ្ចឹមគោនៅតំបន់ជាយភ្នំនៅខេត្តមួយចំនួន។ប៉ុន្ដែមុនសម្រាលកូនទី២នេះ តូតា ធ្លាប់ប្រាប់ថានាងមិនមែនផ្ដាច់ខ្លួនពីសិល្បៈទាំងស្រុងឡើយ ពោលគឺនៅតែបន្ដការងារណាខ្លីៗដដែល ពិសេសគឺការថតស្ពត ខណៈដែលស្វាមីនាងលោកវិបូរ ក៍អះអាងដែរថាការមានស្វាមីរបស់តារាស្រីមិនមែនជាការបញ្ជាក់ថានាងបញ្ចប់អាជីពសិល្បៈឡើយ ព្រោះតាមលោកសង្កេតឱក សុគន្ធកញ្ញា មានស្វាមីនិងកូនហើយមែនប៉ុន្ដែនៅតែមានFan គាំទ្រច្រើននៅឡើយ។
ម៉ាក សែនសូនីតា ស្ថិតក្នុងចំណោមតារាស្រីដលែយកកូននៅឆ្នាំថោះ ឬឆ្នាំទន្សាយនេះមានដូចជាឱក សុគន្ធកញ្ញា ,ស៊ឹម សូលិកា និងគង់ ច័ន្ទរដ្ឋា ដែរ ខណៈដែលនាងជ្រើសផ្លូវយកស្វាមីជាថៅកែផលិតកម្មដូចគ្នាទៅនិងអ្នកនាងលីងលីង និងឡាយ សានិកា ជាដើម។ប្រភពបានឲ្យដឹងថាតូតា នៅតាមយកកូនស្រីនៅឆ្នាំបន្ទាប់ទៀត ហេតុនេះនាងកាន់តែរយាលៗខ្លាំងពីអាជីពចាស់ ឬឈានទៅដកថយពីការសម្ដែងតែម្ដង ព្រោះស្វាមីនាងជាអ្នកពូកែរកស៊ី និងចង់ពង្រីកមុខជំនួញបន្ថែមទៀត បើទោះជាមុននេះហាងគ្រឿងសមុទ្ររបស់នាងដែលគ្រោងបើកគ្រប់ខណ្ឌនៅរាជធានីភ្នំពេញនោះត្រូវបានជាប់គាំង និងបិទទីតាំងជាច្រើនក្ដី តែនាងបានងាកទៅរកស៊ីមុខរបរផ្សេងវិញ ពិសេសគឺគ្រឿងអលង្ការ ព្រោះម្ដាយនាងជាអ្នករកស៊ីលក់មាស ពេជ្រ នៅផ្សារតាខ្មៅជាច្រើនឆ្នាំមកហើយ។
ម៉ាក សែនសូនីតា ជាតារាសម្ដែងធ្លាប់លេចធ្លោម្នាក់ដែលក្រសោបបានតួឯកធំៗជាបន្ដបន្ទាប់អំឡុងពេលនាងនៅលីវ ប៉ុន្ដែនាងដកចិត្តមិនរួចឡើយពេលប៉ៈថៅកែAngkor Picture លោកប៉ុល វិបូរ ដែលធ្លាប់ផ្ដល់ឲ្យនាងជាតំណែងតួឯកជាបន្ដបន្ទាប់នោះរហូតនាងផាត់ចោលសំណើរស្នេហ៍លោកឧកញ៉ា និងថៅកែសណ្ឋាគារមួយចំនួនដើម្បីប្រគល់បេះដូងឲ្យលោកនីត ដោយមិនគិតថាលោកជាបុរសពោះម៉ាយនោះទេ។ក្រោយមានស្វាមីជិត៣ឆ្នាំនេះគេឃើញតូតា ជិះរថយន្ដទំនើបៗជាច្រើនគ្រឿងឆា្លស់គ្នា ហើយនាងរស់នៅផ្ទះវីឡារយ៉ាងប្រណិតផងដែរ។ចំណែកក្រុមផលិតករមួយចំនួនដែលធ្លាប់ហៅតូតា ថតវិញពួកគេនិយាយថាបន្ទាប់ពីតារាសម្ដែងរូបនេះមានកូន២នាងនឹងធ្លាក់សម្ដែងពីតួឯកទៅតួម្ដាយដូចតារាផ្សេងៗទៀតដែរបើទោះជាទេពកោសល្យសិល្បៈរបស់នាងនៅតែលល្អហើយសម្រស់មិនធ្លាក់ចុះក្ដី។តែតូតា ធ្លាប់ប្រាប់អ្នកយកព័តមានយើងមុនសម្រាលកូនទី២ ថារឿងដែលនាងបារម្ភនោះគឺក្រោយមានស្វាមីនិងកូនគឺគីឡូឡើងជ្រុលបន្ដិចទើបធ្វើឲ្យនាងពិបាកសន្យាឲ្យច្បាស់ថាពេលណាវិលទៅថតសម្ដែងវិញបាននោះ។នាងថាស្វាមីនាងលោកវិបូរ មិនហាមឃាត់នាងក្នុងការសម្ដែងរឿងឲ្យផលិតកម្មដ៍ទៃឡើយ ទោះជាលោកមានផលិតកម្មខ្លួនឯងដែរក្ដី ពោលគឺនាងអាចធ្វើការងារសិល្បៈតាមចិត្តចង់។
មជ្ឈដ្ឋានមហាជនមើលឃើញថាក្រោយតារាសម្ដែងតូតា ,ឌុច លីដា និងសារ៉ាយ សក្ខណា ជាដើមមានស្វាមីនិងកូនរៀងៗខ្លួនបែបនេះធ្វើឲ្យបច្ចុប្បន្នពិបាករកតារាសម្ដែងស្រីណាលេចធ្លោខ្លាំងដូចមុន ព្រោះមានតារាខ្លះរះមកមួយប្រាវក៍រលត់បាត់ទៅវិញអស់ក៍មានដែរ។ប៉ុន្ដែលោកមិញ សុធីវណ្ណ ធ្លាប់និយាយថារឿងតារាមានប្ដីមានកូនគឺជារឿងធម្មតា ព្រោះជីវិតមនុស្សលោកមិនអាចអ្នកណារស់នៅម្នាក់ឯងជារៀងរហូតបានឡើយ ហើយកុំបារម្ភព្រោះគេ គាំទ្រតារានៅលើសម្ថភាពដូចជានាងBeyonc’e មានប្ដីកូនហើយនៅតែល្បីដដែល។
តូតា បានយកឈ្នះតារាសម្ដែងស្រីស្អាតមួយចំនួនទៀតដែលធ្លាប់លេចឭពាក់ព័ន្ធស្នេហាជាមួយលោកវិបូរ ព្រោះនៅទីបំផុតលោកនីត ក្លាយទៅជាស្វាមីស្របច្បាប់របស់នាង ហើយគេជឿរថាក្រោយទទួលបានកូន២នេះថៅកែផលិតកម្មរូបនេះនឹងកាន់តែថ្នាក់ថ្នមប្រពន្ធដូចស្វាមីឱក សុគន្ធកញ្ញា ដែរជាមិនខាន៕
